1 Baläm mi de mi Balak ala: Ang minin yima ngal ahle suma ngat buzuna kid’iziya ka hî, ang hanï amuzleina kid’iziya ki gamlâna kid’iziya mi. 2 Balak mi le d’igi Baläm mi dum na. Balak ki Baläm a hamuhlâ tu ki gamlâna tu yam yima ngal ahle suma ngat buzu ma lara ge gagang.
3 Baläm mi de mi Balak ala: Ang tchol gen he d’a hawa manga ngala go, an hut tei dei. Dam Ma didina mi mba ini á ngavan kla. Bugola, an mba ni dang zla d’a mam mba mi tagandjid’a. Mi i akulo yam ahinad’a yat ta ked’iwurenga.
4 Alona mi mba mi tak tam mbei mi Baläm. Baläm mi dum ala: An min wa yima ngal ahle suma ngat buzuna kid’iziya, an ni he amuhlâ tu ki gamlâna tu yam yima ngal ahle suma ngat buzu ma lara ge gagang mi.
5 Ma didina mi tin zlad’a avun Baläm, mi dum ala: Ang hulong gen Balak, ang i dum hina. 6 Baläm mi hulong gen Balak. Gola! Mi nga tchola go ki he d’a hawa mam mba ngala zlapa ki suma nglo suma Mowap-ma pet.
7 Baläm mi de zla mam mba d’ogola, mi dala:
Balak mi yanï woi Aram,
amul ma Mowap-ma mi tchugunï asen kä woi
yam ahina d’a abo ma yorogonid’a ala:
Ang mbeï gan andjafâ hi Jakob-ma vuna!
Ang mbeï zal hurung yam Israel-lâ!
8 Ni nana ba, an ni ge vuna mi sama
Ma didina mi gum nga vuna d’uo na ge?
Ni nana ba, an zal hurun yam sama
Ma didina mi zal nga hurum kam mbuo na ge?
9 An wazi akulo yam ahuniyôna yazi d’a ked’iwurenga.
An golozi akulo yam ahuniyô suma djodjohlâ.
Gola! Ni suma yazi ma kaka iram vama,
ni suma a nga zlapa kandjaf ma dingâ tu d’uo na.
10 Ni nge ba, mi ndak á ndum andjafâ hi Jakob-ma ge?
Ni nge ba, mi ndak á ndum abo Israel-lâ sop ke?
Ar an mit ni matna hi suma d’ingêr sum ndazinina.
Ar dabi manda ti dap mi d’igi mazid’a na mi.
11 Balak mi de mi Baläm ala: Ang lan ni me na ge? An yangî ala ang gan ni man suma djangûna vuna. Gola! Ang nga b’e ni vuna kazi zang!
12 Baläm mi hulong dum ala: An ni de ni zla d’a Ma didina mi tinindji avunanda d’uo zu?
Baläm b’e vuna yam á mbàd’a
13 Balak mi dum ala: Ang mbeï i yam yima dingâ, ang mba wazi pet; ka hî wani, ang nga wazi pet ti; sä hî ang mba gandji vuna.
14 Mi i ki sed’em abagei hur ful ma Sofim-ma yam ahina d’a Pisga-d’a yat ta ked’iwurenga, mi min yima ngal ahle suma ngat buzuna kid’iziya, mi hamuhlâ tu ki gamlâna tu yam yima ngal ahle suma ngat buzu ma lara ge gagang.
15 Baläm mi de mi Balak ala: Ang tchol ka hî gen he mang nga hawa d’a ngala go, an i ni ngaf kAlona.
16 Ma didina mi nde tam mbei ir Baläm, mi tinim zlad’a avunamu, mi dum ala: Ang hulong gen Balak, ang dum hina. 17 Mi hulong gen Balak.
Gola! Balak mi nga tchola go ki he d’a hawa mam mba ngala zlapa ki suma nglo suma Mowap-ma. Mi de mi Baläm ala: Ma didina mi dangâ na ge?
18 Baläm mi de zla mam mba d’ogola, mi dala:
Balak, ang tchol akulo;
Sipor goroma, ang tin humang humunu.
19 Alona mi nga ni sana á ka zlad’a d’i,
mi nga ni sana á mbut djib’er mamba kä d’uo mi.
Vama mi duma, mba mi lum mbuo zu?
Vama mi de kama, mba mi ndagam vunam mbuo zu?
20 Gola! A han vuna ná b’e vuna kaziya,
kayam Alona mi b’e wa vunam kazi da’.
An ndak á hulongôm mbei d’i!
21 Mi we nga tchod’a ata andjafâ hi Jakob-ma d’i.
Mi we nga bei d’ingêra ata Israel-lâ d’uo mi.
Ma didina Alo mazina mi nga ki sed’eziya.
A nga hum del la subur amulâ nadigaziya.
22 Alona mi buzuguzï woi kur Ezipte,
mam kazi ni d’igi ad’enga havündid’a na.
23 Kumana nga mi landjafâ hi Jakob-ma va d’i.
Sama djop fileina nga mi le Israel-lâ va d’uo mi.
Ata atchogoi d’a a ngata a mba de mandjafâ hi Jakob-ma
nala Israel-lâ ala:
Wana ni sunda hAlonid’a!
24 Gola! Ni suma a nga tchol akulo d’igi azlod’a na,
d’igi azlona mi djiger tam akulo na na.
Nga mi bur kä d’i gak mi kizak vama mam vuma,
gak mi tche buzuwa vama mam vuma tua mi.
25 Balak mi de mi Baläm ala: Le ang gazi vuna d’uo ni, ang b’e vuna kazi d’uo mi!
26 Baläm mi hulong de mi Balak ala: An dang nga ala an mba ni le nahlena pet suma Ma didina mba mi dandjina d’uo zu?
Baläm b’e vuna yam á hindina
27 Balak mi de mi Baläm ala: Ang mbeï an ni i ki sed’eng ata yima dingâ. Dam Alona tam mba d’i lum djivid’a kla, ata yi máma ang mba gan sum ndazina vuna.
28 Balak mi i ki Baläm akulo yam ahina d’a Peyor-ra yat ta ked’iwurenga ata yima gol sä hur fulâ woina.
29 Baläm mi de mi Balak ala: Ang minin yima ngal ahle suma ngat buzuna kid’iziya ka hî, ang hanï amuzleina kid’iziya ki gamlâna kid’iziya mi.
30 Balak mi le d’igi Baläm mi dum na, mi hamuhlâ tu ki gamlâna tu yam yima ngal ahle suma ngat buzu ma lara ge gagang.
© Azumeina Bible © Alliance Biblique du Tchad, 1999.
