Gat ta yam ahle suma ngat buzu suma burâ ki burîna
1 Ma didina mi de mi Moise ala: 2 Ang he vun ma wana mi Israel-lâ, ang dazi ala: Ma didina mi dala: Agi gologi tagi djivi á han he d’a hawa man nda ndak á handjid’a ata yima a ngama, nala, te ma a handji he d’a hawa d’a ngal la his sa afufuîd’ina.
3 Vama ngat buzu ma ngal ma agi handji mi an Ma didina burâ ki burîna ba wana: Gro tumiyô suma bizazi tutu suma bei dakina mbà, ni he d’a hawa d’a ngal la didinda. 4 Ang mba he gor timi ma dingâ tu yorogo, ma hîna ki fladege d’a afata i nikid’a mi. 5 Ata yi máma ang mba kafut ta adiged’id’a kilona tu ki nusa, mbul ma d’igila hirwilingâ nus lidirâ mi. 6 Ni he d’a hawa d’a ngala burâ ki burâ d’igi d’a a hat yam ahina d’a Sinai-d’a na d’a, ni he d’a hawa d’a ngal la his sa afufuîd’a avogon an Ma didinid’a mi. 7 Ata yima ang mba ki gor timi ma yorogona á ngatina, ang mba ki süm guguzlud’a lidirâ tu ki nusa, ang handji nata yima a tinim iram vama. 8 Ata yima ang mba ki gor timi ma mbàna ki fladege d’a afata i nikid’a, ang mba ki süm guguzlud’a d’igi d’a ang mbat yorogod’a na. Ni vama ngat buzu ma ngal ma his ma afufuîna ma avogon an Ma didinina.
Gat ta yam bur ma sabatnid’a
9 Ma didina mi de kua ala: Kur bur ma sabatna agi hagi gro tumiyô suma bizazi tutu suma bei dakina mbà zlapa ki he d’a hawa d’a afut ta adiged’i d’a a tib’eget ki mbulîd’a kilona karagaya zlapa ki süm guguzlud’a mi. 10 Wana ni he d’a hawa d’a ngal la kur bur ma sabat ma lara ge peta, ki he d’a hawa d’a ngal la didinda zlapa ki süm guguzlud’a mi.
Gat ta yam bur ma avok kikidjina hi tilîna
11 Ma didina mi de kua ala: Kur bur ma avo’â hi til ma lara ge petna agi hagi he d’a hawa d’a ngala mi an Ma didina amuzlei suma azungeîna mbà, gamlâna tu ki gro tumiyô suma bizazi tutu suma bei dakina kid’iziya mi. 12 Agi mbagi kafut ta adiged’i d’a a tib’eget ki mbulîd’a kilona zlengâ yam amuhlâ, agi mbagi kafut ta adiged’i d’a a tib’eget ki mbulîd’a kilona karagaya yam gamlâna, 13 agi mbagi kafut ta adiged’i d’a a tib’eget ki mbulîd’a kilona hindi yam gor timina. Wana ni he d’a hawa d’a ngal la his sa afufuîd’a avogon an Ma didina. 14 Agi hagi he d’a hawa d’a süm guguzlud’a lidirâ yam amuhlâ, lidirâ mbà yam gamlâna, lidirâ tu ki nusa yam gor timina mi. Wana nahle suma ngat buzu suma ngal suma agi mba hazi kur bur ma avok kikidjina hi til ma lara ge kur bizad’a petna.
15 Agi hagi mbekmberena á zlup yam tchod’a mi an Ma didina zlapa ki he d’a hawa d’a ngal la didinda ki süm guguzlud’a mi.
Gat ta yam vun til ma Pa’îd’a
16 Ma didina mi de kua ala: Kur bur ma dogo yam fid’ina hi til ma avo’îna, agi lagi vun til ma Pa’â á suburunu.
17 Kur bur ma dogo yam vahlâ hi til mámina, ni bur ma le vun tilâ, agi tagi avungô ma a lum bei angufina gak burâ kid’iziya. 18 Kur bur ma avok máma agi togogi tok ka a tinit irat vata á kud’uron an Ma didina, agi lagi sun nda kaud’a kur ri. 19 Agi han he d’a hawa d’a ngala amuzlei suma azungeîna mbà, gamlâna tu ki gro tumiyô suma bizazi tutu suma bei dakina kid’iziya mi. 20 Agi mbagi kafut ta adiged’i d’a a tib’eget ki mbulîd’a kilona zlengâ yam amuhlâ, agi mbagi kafut ta adiged’i d’a a tib’eget ki mbulîd’a kilona karagaya yam gamlâna, 21 agi mbagi kafut ta adiged’i d’a a tib’eget ki mbulîd’a kilona hindi hindi yam gor timi ma lara ge pet mi.
22 Agi hagi mbekmberena vama ngat buzu ma zlup yam tchod’a á zlubugi yam tcho magid’a. 23 Agi hagi he d’a hawa d’a ngat buzu ndata zlapa ki he d’a hawa d’a ngal la yorogo d’a didinda. 24 Agi hagi he d’a hawa ndata burâ ki burâ gak burâ kid’iziya; ni te ma ngat buzu ma ngal ma his ma afufuîna avogon an Ma didina. Agi hagizi zlapa ki he d’a hawa d’a ngal la didinda ki süm guguzlud’a mi. 25 Kur bur ma kid’iziyana agi togogi tok ka a tinit irat vata á kud’uron an Ma didina, agi lagi sun nda kaud’a kur ri.
Gat ta yam Pantekot-nid’a
26 Ma didina mi de kua ala: Kur bur ma Pantekot-na ata yima agi mbagi kawu magi ma navo’îna, agi mba togogi tok ka a tinit irat vata á kud’uron an Ma didina, agi mba lagi sun nda kaud’a kur ri. 27 Agi hagi he d’a hawa d’a ngal la his sa afufuîd’a mi an Ma didina amuzlei suma azungeîna mbà, gamlâna tu ki gro tumiyô suma bizazi tutuna kid’iziya, 28 agi mbagi kafut ta adiged’i d’a a tib’eget ki mbulîd’a kilona zlengâ yam amuhlâ, agi mbagi kafut ta adiged’i d’a a tib’eget ki mbulîd’a kilona karagaya yam gamlâna, 29 agi mbagi kafut ta adiged’i d’a a tib’eget ki mbulîd’a kilona hindi hindi yam gor timi ma lara ge pet mi.
30 Agi hagi mbekmberena á zlup yam tcho magid’a. 31 Ahle suma ngat buzu ndazina pet, agi hagizi ni zlapa ki he d’a hawa d’a ngal la didinda ki he d’a hawa d’a afuta mi, agi hagi nahle suma bei daka ba na zlapa ki süm guguzlu d’a a he vuna kat da d’a.
© Azumeina Bible © Alliance Biblique du Tchad, 1999.
