A he pusâ he d’a hawad’a mi Ma didina
1 Ata yima Moise mi dap zlub’ud’a ved’a dapma, mi vot mbulâ kad’u, mi tinit irat vat zlapa kahle suma sunda pet ki yima ngal ahle suma ngat buzuna kahle mam suma sunda pet, mi tinizi irazi vazi pet mi.
2 Ata yi máma suma nglo suma avok andjafâ hi Israel suma avok sum mazinina a mba ki he d’a hawa mazid’a. Azi ni suma avok suma a ndumuzina mi. 3 A mba ki he d’a hawa mazid’a avok Ma didina, nala, pus ma yam zlupina karagaya kamuzleina dogo yam mbà. Pusâ tu ni ngad’a yam suma nglona mbà, amuzleina ni ngad’a yam suma nglona gagang mi. A mba ki sed’ezi avun zlub’u d’a ngaf tad’a.
4 Ma didina mi de mi Moise ala: 5 Ang ve he d’a hawa ndata aboziya, ang hat mi suma hi Levi-na tala a le ki sunda hi zlub’u d’a ngaf tad’a ngad’a yam sunda hi nge nge pî d’a mi lata d’a.
6 Moise mi yo pusâ kamuzleina, mi hazi mi suma hi Levi-na. 7 Mi yo pusâ mbà kamuzleina fid’i, mi hazi mi Gerson groma ngad’a yam sun mazid’a. 8 Mi yo pusâ fid’i kamuzleina klavandi, mi hazi mi Merari grom suma a le sunda ad’u vun ma hed’a hi Itamar ma Aron ma ngat buzuna goromina ngad’a yam sun mazid’a mi. 9 Wani mi he nga pus soze amuhl mi Kehat groma d’i, kayam sunda hahle suma a tinizi irazi vazina ni mazid’a; ni azi ba a yozi keleziya.
A tin yima ngal ahle suma ngat buzuna iram vamu
10 Suma nglona a he he d’a hawa mazid’a ni kur bur ma a vo mbulâ yam yima ngal ahle suma ngat buzuna á tinim iram vama. 11 Ma didina mi de mi Moise ala: Ar suma nglo suma avok sumina a mba ki he d’a hawa mazid’a kur burâ gagang á tin ki yima ngal ahle suma ngat buzuna iram vamu.
12-83 A mba ki sed’et d’igi Ma didina mi he vuna na.
Kur bur ma avok kikidjina, Nason Aminadap gorom ma ad’u andjafâ hi Juda-nina, mi mba ki mamba.
Kur bur ma mbàna, Netanel Suwar gorom ma ad’u andjafâ hi Isakar-rîna, mi mba ki mamba.
Kur bur ma hindina, Eliyap Helon gorom ma ad’u andjafâ hi Zabulon-nina, mi mba ki mamba.
Kur bur ma fid’ina, Elisur Sedewur gorom ma ad’u andjafâ hi Ruben-nina, mi mba ki mamba.
Kur bur ma vahlâ Selumiyel Surisadai gorom ma ad’u andjafâ hi Simeon-nina, mi mba ki mamba.
Kur bur ma karagayana, Eliyasaf Dewel gorom ma ad’u andjafâ hi Gad-nina, mi mba ki mamba.
Kur bur ma kid’iziyana, Elisama Amihut gorom ma ad’u andjafâ hi Efraim-mina, mi mba ki mamba.
Kur bur ma klavandina, Gamliyel Pedasur gorom ma ad’u andjafâ hi Manase-nina, mi mba ki mamba.
Kur bur ma zlengîna, Abidan Gidoni gorom ma ad’u andjafâ hi Benjamin-nina, mi mba ki mamba.
Kur bur ma dogona, Ahiyezer Amisadai gorom ma ad’u andjafâ hi Dan-nina, mi mba ki mamba.
Kur bur ma dogo yam tuna, Pagiyel Okran gorom ma ad’u andjafâ hi Aser-rîna, mi mba ki mamba.
Kur bur ma dogo yam mbàna, Ahira Enan gorom ma ad’u andjafâ hi Neftali-nina, mi mba ki mamba.
Nge nge pî mi mba ki he d’a hawa mamba ni na:
Hal ma kawei ma hap ma anegem ndak ir grama 1300-na ki taza ma kawei ma hap ma halhal ma anegem ndak ir grama 700 suma anegezi ndak ir bege d’a a ngat á hed’a yam zlub’u d’a kud’orid’a. Ahle suma mbà ndazina a ni oîd’a kafut ta adiged’i d’a a tib’eget ki mbulâ yam he d’a hawa d’a afutid’a.
Kop ma lor ma anegem ndak ir grama 100 mi ni oîd’a ki dubang ma his djivid’ina á ngala.
Amuhlâ tu ki timi ma bizam tuna tu mi ngad’a yam vama ngat buzu ma ngala.
Mbekmberena tu ngad’a yam vama ngat buzu ma zlup yam tchod’a.
Amuzleina mbà, gamlâna vahl, mbekmberena vahl ki tumiyô suma bizazi tutuna vahl ngad’a yam vama ngat buzu ma zlap darigïd’a.
84 Wana ni ndumba hahle suma suma avok Israel-lâ a hazi á tin yima ngal ahle suma ngat buzuna iram vama:
Hal ma kawei ma hapma dogo yam mbà, taza ma kawei ma hapma dogo yam mbà, kop ma lora dogo yam mbà mi. 85 Hal ma lara pî anegemî ir grama 1300, taza ma lara pî anegemî ir grama 700 mi. Anegezi d’a peta ni ir kilona 24, ndak ir aneka hi bege d’a a ngat á hed’a yam zlub’u d’a kud’orid’a.
86 Kop ma lor ma lara pî anegemî ir grama 100, ki zla tam mba dogo yam mbàd’a pet ni ir grama 1200, mi ni oîd’a ki dubang ma his djivid’a á ngalina.
87 Amuzleina dogo yam mbà, gamlâna dogo yam mbà, tumiyô suma bizazi tutuna dogo yam mbà, ngad’a yam vama ngat buzu ma ngala zlapa ki he d’a hawa d’a afuta, ki mbekmberena dogo yam mbà ngad’a yam vama ngat buzu ma zlup yam tchod’a. 88 Amuzleina pet a ni dok mbà yam fid’i, gamlâna dok karagaya, mbekmberena dok karagaya, tumiyô suma bizazi tutuna dok karagaya ngad’a yam vama ngat buzu ma zlap darigïd’a. Wana ni he d’a hawa d’a a hat á tin yima ngal ahle suma ngat buzuna iram vamba.
89 Ata yima Moise mi kal kur zlub’u d’a ngaf tad’a á de zlad’a ki Ma didinina, mi hum del la nga d’i dum zlad’a ei akulo yam yima we hohou suma ma nga tinda yam zandu’â hAlonina aduk tcherebêna mbà, ti dum zlad’a mi.
© Azumeina Bible © Alliance Biblique du Tchad, 1999.
