Bur ma a hum á le Pa’îna
1 Ma didina mi de zlad’a mi Moise abagei hur ful ma Sinai-na kur til ma avo’â hi biza d’a mbàd’a ma azi buzugï woi kur ambas sa Ezipte-d’ina ala: 2 Ar Israel-lâ a le vun til ma Pa’â kur bur ma a ngama. 3 Agi lumî kur bur ma dogo yam fid’ina hi til mamina ki fladege d’a afata i nikid’a d’igi gata ki vun man ma hed’a a de kam na mi.
4 Moise mi de zla ndata mi Israel-lâ, kayam a le vun til ma Pa’â. 5 A le vun til ma Pa’â kur bur ma dogo yam fid’ina hi til ma avo’îna ki fladege d’a afata i nikid’a hur ful ma Sinai-na. Israel-lâ a le hina dedege d’igi Ma didina mi he vuna mi Moise na.
6 Suma ding suma a mbut tazi ndjendjed’a ki matna suma a ndak a le vun til ma Pa’â kur bur máma d’uo na a nga. A mba avok Moise azi ki Aron kur bur máma tamba. 7 Sum ndazina a de mi Moise ala: Ami mbud’umi ndjendjed’a ni yam matna. Ni kayam me ba, a mba d’elemi woi kur bur ma a ngama á he he d’a hawa mamid’a zlapa ki Israel-lâ ge?
8 Moise mi dazi ala: Agi djubugi gak an wäd’u zla d’a Ma didina mba mi dat kagid’a tua.
9 Ma didina mi de mi Moise ala: 10 Ang i de mi Israel-lâ ala: Ma didina mi dala: Le sana adigagi ini d’oze kur atchogoi d’a nga mbad’a mi mbut tam ndjendjed’a ki matna d’oze mi i akoi d’a dei d’a ni, mba mi le vun til ma Pa’â á suburun an Ma didina. 11 A lumî kur til ma mbàna kur bur ma dogo yam fid’ina ki fladege d’a afata i nikid’a. Azi mba mut tumiyô suma a ngad’azi á Pa’îna kavungô ma a lum bei angufina, zlapa kahlap ma aglarâ. 12 A ar va akulo gak yorogo d’i, a kus asok kei d’uo mi; a lumî d’igi gata ti de kam na.
13 Le sana mi yed’et mi i nga akoid’a d’uo ba, mi d’el tam mbei á le vun til ma Pa’â ni, sa máma a mba pad’am mbei aduk sum mama; kayam mi he nga he d’a hawad’a mi an Ma didina kur bur ma a ngama d’i, sa máma mba mi zi aneka hi tcho mambid’a kamu.
14 Le angei ma nga kaka adigagina mi le vun til ma Pa’â hi an Ma didinina ni, mi lumî d’igi gata ki vun man ma hed’a a de kam na. Gat ndata ni tu kagi agi pet, yam gor vuta, yam angeina mi.
D’ugula ti kulup yam zlub’u d’a ngaf tad’a
15 Kur bur ma a ve zlub’u d’a ngaf tad’a akulona, d’ugula ti kulubut yat b’eb’et. Ti nga kat d’igi akud’a na ki fladeged’a dei gak tcha yorogo. 16 Ti nga ni kulupa hina andjege ki faleya yam zlub’ud’a; kandjeged’a ti b’o ni d’igi akud’a na.
17 Ata yima d’ugula ti tan ndei yam zlub’ud’ina, Israel-lâ a tchol id’a; ata yima ti tchol kuana, Israel-lâ a ve kang mazina kua mi. 18 Israel-lâ a i nad’u vun ma hed’a hi Ma didinina, a ve kangâ nad’u vun ma hed’a hi Ma didinina mi. Le d’ugula nga tchola yam zlub’ud’a tua ni, azi ni kaka hina mi. 19 Le d’ugula nga tchola yam zlub’ud’a tatâ ni, Israel-lâ a ge yazi kä ad’u vun ma hed’a hi Ma didinina, a nga i d’i. 20 Le d’ugula nga tchola yam zlub’ud’a burâ tcha ni, azi ve kangâ ad’u vun ma hed’a hi Ma didinina a i nad’u vun ma hed’a hi Ma didinina mi. 21 Le d’ugula ti tchol yam zlub’ud’a ki fladeged’a gak yorogo ba, ti tchol tanda ni, azi i mi. Le d’i le ni burâ tu ba, ti tchol tanda ni, azi i mi. 22 Le d’ugula ti tchol yam zlub’ud’a ni burâ mbà d’oze tilâ sop poze bizad’a tu ni, Israel-lâ a ve kang mazina, a nga i d’i. Le d’i tchol tanda ni, azi i mi. 23 Azi ve kangâ nad’u vun ma hed’a hi Ma didinina, azi i nad’u vun ma hed’a hi Ma didinina mi. A nga ge yazi kä ad’u vun ma hed’a hi Ma didinina d’igi mi hum mi Moise na.
© Azumeina Bible © Alliance Biblique du Tchad, 1999.
