Tchenda hi Paul-la
1 Kayam ndata, b’oziyon suma od’a, an nga ni hat hurun ngola á wagiya, kayam agi ni furî manda ki subur manda. Buniyôn suma od’a, ar agi kagagi ngingring kur tit magid’a zlapa ki Salad’a.
2 An nga ni tchen Evodi ki Sintik, ar azi kak ki djib’er ra tud’a yam Salad’a. 3 Ndran ma sun ma d’engzengâ, an nga ni tchenengû, ang ndjun arop ndazina. Kayam azi dur ayîna geven á b’rau Zla d’a Djivid’a zlapa ki Klemâ ki ndron suma sun suma simiyêzi nga b’ira kur mbaktum mba arid’ina mi.
4 Ar agi lagi furîd’a yam Salad’a. An nga ni dagi kua: Agi lagi furîd’a.
5 Ar agi tagagi luluma magid’a woi avok suma pet, kayam Salad’a mi ar go á mbad’a. 6 Ar djib’eregi ti b’lak yam va tu d’i, wani kur ahlena pet ar agi tagagi Alona vama agi kid’agagizina. Ar agi tchenegi Alona ki hud’a, agi lum mersi mi. 7 Hina wani, b’leng nga halasa hAlona d’a kal yam wad’ud’a peta, mba d’i ngomogi djib’er magid’a ki muzugagi yam Jesus Christ.
8 B’oziyona, zla d’a ara: Ar agi tinigi djib’er magid’a yam ahle suma djivi suma ndak á giled’ina kahlena pet suma gagazina kahle suma a yorozina kahle suma d’ingêrâ kahle suma yed’etna kahle suma djivi suma ndak á hud’ina. 9 Ahle suma agi had’agizina kahle suma agi vagizina kahle suma agi humugizina kahle suma agi wazi atana, ar agi laziya. Hina wani, Alo ma b’leng nga halasa mba mi kak ki sed’egiya.
Paul mi le mersi yam he d’a hawad’a
10 Wani an nga ki furîd’a yam Salad’a, kayam bugol burâ ablaud’a, agi hulong djib’eregi kanu. Kayam agi nga ki djib’era kan adjewe, wani agi fagi nga lovota á ndjunun ndi. 11 An de hina, nala, an kid’ak va d’i, kayam an hat á kak ki furîd’a kur ahle suma a nga lana. 12 An we á kak ki houd’a, an we á kak ki duzîd’a. Kur ahlena pet an hat á kak ki meid’a, á kak ki tena, á kak kur ndjondjoîd’a, á kak kur kid’aka mi. 13 An ndak á lahlena pet yam ad’eng nga Christ mi handjid’a. 14 Wani ata yima agi ndjunun kur ndak mandina, agi lagi djiviya.
15 Agi suma Filip-ma, agi tagi wagiya, avok ka an tin ad’u tchi wal Zla d’a Djivid’a ata yima an ar Maseduwan-na, Tok ka ding nga ti ndjunun ti han vanid’a nga d’i, ni agi hol. 16 Kid’a an nga avo Tasalonik-ka pî ni, agi sunun he d’a hawad’a yagi mbà yam kid’ak manda. 17 Wani an halî he d’a hawad’a d’i, wani an min ala djivi magid’a ti i avogovogo. 18 Kayam an fe he d’a hawa magi d’a agi sunundji abo Epafrodit-ta pet ndaganu. An nga kahle suma ndagana pet da’. He d’a hawa magid’a ni his ma afufuîna, ni vama ngat buzu ma djivi ma Alona tam mbi lum djivid’a kama. 19 Wani Alo mana mba mi hagi ahle mam suma ndjondjoî suma kal teglesâ yam kid’ak magi d’a yam Jesus Christ-sa. 20 Ar ei suburi Abui Alona gak didin. Amin!
Dep pa dabid’a
21 Agi gagi suma hAlona suma zlap tu ki Jesus Christ-sâ depa. B’oziyon suma a nga zlapa ki sed’ena, a gagi depa. 22 Suma hAlonina pet a gagi depa, kal pet ni suma avo hi Sesar-râ.
23 Ar Salad’a Jesus Christ mi vagi sumad’a pet.
© Azumeina Bible © Alliance Biblique du Tchad, 1999.
