Zla d’a yam suma lilid’id’a
1 He ngola mi sama lilid’a ni d’igi nes ma se awalina na, d’oze d’igi alo ma se ata yima dut awunina na mi.
2 Vun ma ge ma a gum bei zlam ba na, mi ni d’igi aleina kababei suma a nga pir bei tuk tazi ba na na, nga mi ve sa d’i.
3 Blafâ ni yam akuluma, djamad’a ni yam korona, azlingâta ná to suma lilid’a mi.
4 Ar ang hulong humba mi sama lilid’a ndak yam lili mamba ba, ang mbut d’igi mam na d’i. 5 Ar ang hulong humba mi sama lilid’a ndak yam lili mamba ba, mi gol tam ala mam mi sama ned’a d’i.
6 Sama mi sun sama lilid’ina mi ni d’igi mi ka nasem mbei na, mi fe ni ndaka mi.
7 Zla d’a d’ogol la ti ndavun sama lilid’id’a, ti ni d’igi asem ma gugutu ma mi mbut amangeîd’ina na.
8 Subur sama lilid’a ni d’igi sama mi djin ahinad’a kä kur mbiu mamba ndindingâ na.
9 Zla d’a d’ogol la ti ndavun sama lilid’id’a, ti ni d’igi awei d’a ti tchok sama mi gurut ki sümina abom na.
10 Sama mi sun sama lilid’a d’oze sama mi tit akulo hawana, mi ni d’igi ma yet yeû ma nga mi yet suma ata yima lara ge petna na.
11 Sama lili ma hulong ata sun mamba lilid’ina, mi ni d’igi adi ma mi hulong ata vin ma mam vinim mbeina na.
12 Le ang we sama mi gol tam ala mam mi sama ned’a na ni, ang tin hurung yam sama lilid’a kalamu.
Zla d’a yam sama azulombid’a
13 Sama azulomba nga mi dala: Azlona mi nga glovod’o, azlona mi nga ir palumba.
14 Sama azulomba nga mi mbut tam kä yam azang mama, d’igi bapma nga mi mbut ata kawei mama na.
15 Sama azulomba nga mi nik abom kä kur angota, wani ad’enga ki sed’em á hulong mi hlum á im avunamba.
16 Sama azulomba mi djib’er ala ne mamba kal suma ne suma kid’iziya suma a nga hulong humba ki lovod’otna.
Zla d’a d’ogol la dinga
17 Sama mi hak tam aduk huneî d’a ndolom nga d’uo d’a, mi ni d’igi sama mi vädina ki humama na.
18 Sama gurut ma nga mi dur suma kakud’a ki yeûd’a mi hal á tchi matnina, 19 mi ni d’igi sama mbut ir ndrama mbut ba, mi hulong dum ala: An dangî zla d’a sanda hawa na na.
20 Le aguna mi nga d’uo ni, akud’a ti mit teyo; ata yima sama gigined’a mi nga d’uo na, huneîd’a ti nga d’uo mi.
21 Sama nga mi hal huneîd’a heîna, mi ni d’igi gordjo ma a tchugum yam kiwilîna na, d’igi agu ma a tchugum aku á vakud’ina na mi.
22 Zla d’a ndavun sama gigined’id’a, ti ni d’igi ambla d’a mbulâ na, ti kal gak ti i kur bibirina.
23 Sama vunam akud’a ma hurum tchod’ina, mi ni d’igi dei ma andaga ma a gulud’um ki sud’o kawei ma hapmina na.
24 Sama noî sumina mi lop de zlad’a ni ki vunamu, hurum krovo ni mbut ira. 25 Le nga mi de zla d’a djivid’a ki vunam ko, ang he gagazid’a kam mbi, kayam ahle suma ndjendjed’a kid’iziya a nga kurumu. 26 Nga mi ngei noî ta mamba kä ki lem mamba, wani asa’at mamba ad’ut mba d’i nde woi aduk toka hi sumid’a.
27 Sama mi djugot zula kä avok ndramina, mam tam mba mi nde kuru; sama nga mi ligat ahinad’ina, mba d’i hulongî sulogota kä kamu.
28 Sama ka zlad’a nga mi noî vama mam zalam huruma, sama mi lop suma ki vunam ma mbulîna nga mi mba ki b’laka.
© Azumeina Bible © Alliance Biblique du Tchad, 1999.
