1 Ar ang subur tang yam vama lavina d’i, kayam ang we nga vama nga mi mba kur bur ma tunina d’i.
2 Ar suma dingâ a suburungî aziya, ar ang subur tang yam tang ngi. Ar sama ding mi suburungî mamu, nga ni ang ba, subur tang go d’i.
3 Ahinad’a ti hlaneka, lesâ maneka heî mi, wani hur ma zal ma sama lilid’a mi zalangzina, mi hlaneka kalaziya.
4 Hur ma zala ni vama tchona, ayîna mi ni d’igi babar ma ngolâ na, wani yungôrâ, sa mi kus kam ni nge ge?
5 Ngop pa ngop sana avunamba kal o d’a a lat kä gumunda.
6 Ngop pa banangâ mi ngobonga nga d’i tak o mam mba kanga woi abua, wani bet ta mang ma djangûna mi bed’eng kokoka ni lop ira.
7 Sama mi hop da na nga mi miret se ayuma kä kasemu, wani sama meid’a ti tchuma, vama aglarâ pî, mi nadjib’eta avunamu.
8 Sama mi wal kambas mamba woi deina, mi ni d’igi alei ma wal kaziyam mbei deina na mi.
9 Mbulâ ki mbul ma his ma afufuîna, a nga le sana tam djivid’a; d’al ma banangâ mi dangzi ki hur ma tunina, mi lang tang djivid’a kal ma ang ngam kurung katang vangâ.
10 Ang ar banangâ d’oze abung banama woi d’i. Ang i avo hi wiyengâ kur bur ma ang nga kur ndakina d’i, kayam ndrang mazina mi kal wiyeng ma sä woi deina.
11 Gorona, ang kak sama ned’a. Hina wani, an mba ni le furîd’a kurun krovo, an mba ni hulong humba mi sama nga mi mangân ndeina mi.
12 Sama ned’a mi we vama tcho ma nga mi mbana, nga mi ngei tamu, wani suma lilid’a a kal kua, a fe ndaka.
13 Ang yo baru mama kayam mi hle vunam á ve balâ mi sama mi wum nga d’uo na, ang ve va mama balâ kad’enga yam sama mam wum nga d’uo máma.
14 Le sana mi nde yorogo tcholol, mi nga mi ge ndrama depa ki delem akulo d’ad’awu ni, a mba ndum zla ndata ni d’igi ngula na.
15 Atcha d’a yal heîd’a, ti ni d’igi azi d’a tchut teteu kur bur ma alona mi senid’a na. 16 Sama mi hal d’eletna ni d’igi mi d’elî simetna na, d’oze d’igi mi ve ni mbulâ akulo hur abom na.
17 Kaweina mi gurî ndram kaweina, sana mi zalî hur ndrama mi.
18 Sama mi ngom tulumina mba mi tum vud’umu; azong ma mi ngom salamina, salama mba mi suburum mi.
19 D’igi ang nga we irang aduk mbina na, hurung nga mi tagang djib’er manga hina mi.
20 D’igi yima azuleina ki zula la yiyika a ndak á hop yazi tu d’uo na, ira hi sanid’a nga d’i kau ki gola d’uo na mi.
21 Deina ni vama a yor ki kawei ma hapmina, fürâ ni vama a yor ki lorina mi, wani a we sana nata simiyêm ma nde yinina.
22 Le ang du sama lilid’a kur zuzud’a zlapa kawuna pî, lili mamba mba d’i wal lei ki sed’em mbi.
23 Ang tin irang yam d’uwar mang ma gureina djiviya, ang ngom d’uwar mang ma nglona djivid’a mi, 24 kayam ndjondjoîd’a nga d’i kak didin ndi, avaval la amula mba d’i i avogovok kur atchogoi d’a lara ge pet tuo mi.
25 Suma a ze hatna yam ahuniyôna. Bugol la mi d’ufa, suma a zum a togom akulo. 26 Tumus tumiyôna a ni baru mang ma tchuka, b’ogeina ni bege d’a ang gus kasinenid’a mi. 27 Ambir b’ogeina ni te ma yam sum mangâ ki yugunei mangîna mi.
© Azumeina Bible © Alliance Biblique du Tchad, 1999.
