An we Ma didina ni ma ngolâ
1-2 Agi gilegi Ma didina!
Agi gilegizi simiyêmu!
Agi azungeîna hi Ma didina
suma nga tchola kur gong mamba
nala kur gulumuna hi gonga hAlonid’ina,
agi gilemu!
3 Agi gilegi Ma didina
kayam mam mi ma djivina!
Suburugizi simiyêm ki sawala!
Hina wani, ni vama djivina avoromu.
4 Kayam Ma didina mi man Jakob,
mi tin Israel mi ka’î mama.
5 Gagazi, an we Ma didina ni ma ngolâ;
Salad’a ni ma kal akulo yam alona petna.
6 Vama lara ma Ma didina mi min luma mi lumu,
mi lum kur akulod’a, yam andagad’a,
kur alum ma nglona,
kur zul galilei mazina pet mi.
7 Nga mi ka d’ugula akulo
avun dabid’a handagad’id’a,
nga mi wile á se alona,
nga mi buzugï simetna woi
ata yi mam ma ngei ahlena.
8 Ni ma tchi gro suma a vut avo’â
hi Ezipte-na woi
tin ad’ud’a ata suma
gak mba yam d’uwarîna mi.
9 Mi sunï ahle suma simata
kahle suma yoyouna
yam andaga d’a Ezipte-d’a
á dur Faron kazungeî mama pet.
10 Mi tchi andjaf suma ablaud’a,
mi tchi amulei suma ad’engâ,
11 nala, Sihon, amul ma Amor-râ,
Ok, amul ma Basan-na,
kamulei suma Kanan-na pet mi.
12 Mi handaga mazid’a woi djona
mi mam suma Israel-lâ.
13 Ma didina, simiyêng mi nga gak didin;
Ma didina, suma a nga djib’er kangî
kur atchogoi d’a lara ge pet.
14 Ma didina mba mi ka sariyad’a hi sum mamid’a,
mba mi we hohowa azungeî mama mi.
15 Fileina handjaf suma dingîna
nahle suma a lazi ni ki kawei ma hapma ki lorina;
ni sun nda suma a lat kabozid’a.
16 Azi nga ki vuna, a nga de zla d’i;
azi nga ki ira, a nga we d’i;
17 azi nga ki humba, a nga hum mbi,
azi nga ki vuna, a nga fo va d’uo mi!
18 Suma a lazina a hle tazi ni d’igi azi na,
suma pet suma a tin huruzi kazina,
a hle tazi ni d’igi azi na mi.
19 Agi andjafâ hi Israel-lîna,
agi suburugi Ma didina;
agi andjafâ hi Aron-na,
agi suburugiziya;
20 agi andjafâ hi Levi-na,
agi suburugiziya;
agi suma lagi mandara Ma didinina,
agi suburugiziya;
21 agi suma avo Siyon-na,
agi suburugi Ma didin
ma nga kaka avo Jerusalem-ma.
Agi gilegi Ma didina!
© Azumeina Bible © Alliance Biblique du Tchad, 1999.
