Tchenda hi sama bei zlad’a kama
1 David mi tchen Alona.
Ma didina, ang hum tchen man nda d’ingêra,
ang tin humang á hum tchi mana,
kayam an nga ni tcheneng ki hur ma tuna.
2 Ar ang kan sariya manda d’ingêr,
ang tin irang á gol d’ingêr manda mi.
3 Ang fegen wa hurunu, ang golon andjege,
ang kugun wa, ang fe nga va atan ndi.
Zla man nda ded’a ni tu ki djib’er manda.
4 Kayam zla d’a ndeï avunanga,
an wal tan ndei ki suma asa’atna
yam sun nda azi nga lata.
5 An nga ni tit kur lovot manga,
asen nga mi djok kei d’i.
6 Alo mana, an nga ni yangû,
kayam ang nga humunu.
Ang tin humang hum zla manda.
7 Angî ma nga sut suma a nga hal yima ngeid’a atang
abo suma a kak djangûna ki sed’ezina,
ang tak djivi mang nga kal teglesa woyo.
8 Ang ngomon d’igi irang nga aduka na,
ang bar gigingâng kan d’igi aleina na
9 abo suma asa’at suma a nga djobon vunana,
abo man suma djangû suma a nga halan á tchid’a suma a nguyuna mi.
10 A b’al huruzi kiki,
a nga de zla d’a subur tad’a.
11 A nga tchid’in asenu, a nguyun wa,
a nga tin irazi kan á kazlan kä andaga
12 d’igi azlo ma meid’a tchum ma nga mi kahl azarîna na,
d’igi gor azlo ma nga mi ndjol ata yam ma dominina na.
13 Ma didina, ang tchol akulo,
ang ngavaziya, ang zud’uzi kä,
ang prud’un ndei abo suma asa’atna ki mbigeu mang nga fiyaka.
14 Ma didina, ang prud’un ndei abo sum ndazina.
Azi ni suma yam andagad’a ka hina.
Suma b’rau mazid’a ni ka hî kur duniya ndatina.
Ang hobozi hayazi ki vama ang ngazizi kazina,
ang hobozi grozina,
a ar ad’ud’a mi grozi ngolona mi.
15 Wani anu, yam d’ingêr manda, an mba ni wang irangû;
ata yima an mba ni zlit akulona,
an mba ni golong tatâ ni hop van hop.
© Azumeina Bible © Alliance Biblique du Tchad, 1999.
