Tchi ma abo pupulukina ki subura mi
1 Ni sawal la David mi hlat mi hat mi ma ngolâ hi suma hle sawalina.
2 Alo mana, Alo mana,
ni kayam me ba, ang aran ndei ge?
Ni kayam me ba, ang wal lei dei ki sed’en á ndjunun nge?
Ni kayam me ba, ang hum tchi mana d’uo ge?
3 Alo mana, an nga ni yang falei á ndjununu,
wani ang nga humun ndi;
andjege pî, an nga ni tuk tan ndi.
4 Wan pî, angî Alo ma bei tchod’ina,
ang nga kaka yam zlam manga,
Israel-lâ a nga gileng teteu mi.
5 Abuyomi a deng tazi atangû;
a deng tazi atangû; ang sud’uzi mi.
6 A tchi kangû; ang sud’uziya;
a deng tazi atangû; a mbut nga zulona d’i.
7 An mbut ni d’igi ndjuvulâ na, an ni sa d’i;
suma a ngulunu, suma a golon is mi.
8 Suma a golona pet a san ad’unu,
a nga bet vunazi ad’unu,
a nga hle yazi woi ad’un vivik mi.
9 A nga de kan ala:
Mi ar zla mamba abo Ma didina.
Djiviya! Ar Ma didina mi pad’am mbeyo!
Le Ma didina nga mi le kamu ni,
djiviya, ar mi sud’umu!
10 Ma didina,
ni ang ba, ndanï woi kur asunu,
ni ang ba, ngomon avun apona hasuna bei va lan ba mi.
11 Kur vut manda dei, a han nabong angû;
ata yima an vutna, angî Alo mana.
12 Ang wal lei dei ki sed’en ndi;
ki tchetchemba, an nga go avun bad’a,
wani sama mba á ndjununa nga d’i.
13 Man suma djangûna a nga mola geven
d’igi amuzlei suma andjofâ na,
a nguyun
d’igi amburei suma ayî suma Basan-na na.
14 Azi mal vunazi atan
d’igi azlo ma mi ve vana bugol mi oîna na.
15 Ad’engên dap pei d’igi mbiyo ma sid’am kä na na,
ir asogon pat tei tutu pet,
ve ta manda ti lau woi kurun d’igi dubangâ na.
16 Delen nda horzlomba ti so kaka d’igi lubu ma ab’lorina na,
sinan b’al akulo ata d’id’iganu,
ang aran kä aduk guguma d’igi sama matna na.
17 Suma murud’umba a nga ngui gevenu,
a nguyun kä d’igi ades adureina a ngui suma na,
a b’alan abon kasenu.
18 An ndak á ndum asogon pet.
Man suma djangûna a so irazi kanu, a nga golonu.
19 A b’rau baru mana aduk taziya,
a tum baru man nda ngola gumara mi.
20 Wani Ma didina, ar ang wal lei dei ki sed’en ndi;
angî ad’eng manda,
ang mbei atogo ndjununu.
21 Ang sud’un ndei avun mbuguyo mazi suma fuyogeina,
ang sud’un ndei avun adurei ndazina,
22 ang sud’un ndei avun azlo máma,
ang sud’un ndei avun adif avun máma mi.
Gagazi, ang hum tchen manda!
23 An mba ni dang zlang ngei aduk b’oziyona,
an mba ni gileng aduk ablaud’a hi sumid’a.
24 Agi suma d’engzengâ hi Ma didinina,
agi suburugiziya;
agi andjafâ hi Jakob-ma pet,
agi gilemu;
agi andjafâ hi Israel-lîna pet,
agi hum ngola,
25 kayam nga mi gol sama hohoud’a is si,
nga mi aram mbei d’i,
nga mi ngei tam avorom mbuo mi.
Wani ata yima nga mi yuma,
nga mi hum yi mamba.
26 Ma didina, ni kayam ang ba,
an mba ni gileng aduk tok ka ngola hi sumid’a;
an mba ni ndak vun vun ma hle ma an hlangzi
avok suma a lang mandarangâ.
27 Suma lulumana a mba të, a mba hoba;
suma a nga hal Ma didinina
a mba gilemu; ar va lazi d’i.
28 Suma yam andagad’ina pet
a mba djib’er yam Ma didina, a mba mbeï gevemu;
andjaf suma pet a mba grif kä andaga avoromu.
29 Kayam Ma didina namul ma ngolâ,
ni ma nga mi te yam andjaf sumina.
30 Suma bege suma yam andagad’a a te na
a mba a kud’uromu,
suma a mba a bona pet
suma a ndak nga a ngom ari mazid’a d’uo na
a mba kud’urom mi.
31 Andjavazi mba mi lum sunda,
mba mi de zla Salad’a woi
mandjavazi ma kur atchogoi d’a nga d’i mbad’ina.
32 Mba mi de mi suma a mba vud’uzi bugolâ
yam d’ingêr ra Ma didina mi lat ki sum mamid’a.
© Azumeina Bible © Alliance Biblique du Tchad, 1999.
