Ar hurung zal ata suma asa’atna d’i
1 Ni sawal la David mi hlata.
Ar hurung zal ata suma asa’atna d’i,
ar hurung hat ata suma a nga le sun nda ata yat tuo d’ina d’i.
2 Kayam azi mba so woi atogo d’igi asuna na,
azi mba so woi d’igi asu ma nguloma na.
3 Ang deng tang ata Ma didina,
ang le djivid’a mi.
Hina wani, ang mba kak yam andaga manga,
ang mba kak ki b’leng nga halasa mi.
4 Ang le furîd’a yam Ma didina,
mam mba mi hang vama hurung minima mi.
5 Ang ar zla manga mi Ma didina,
ang deng tang atamu; mam mba mi le sunda kat mi.
6 Mam mba mi ndang d’ingêr manga woi d’igi b’od’a na,
sariya mang nga irata mba d’i nde woi d’igi afat ta faleid’a na.
7 Ang kak irang sik avok Ma didina, ang ve tang djubumu;
ar hurung zal ata sama nga mi fahlena kur lovot mambina d’i,
ar hurung zal ata sama nga mi ndak vun djib’er mam mba tchod’ina d’uo mi.
8 Ang ar ayîna woyo,
ang ar hur mang ma akuna woyo,
ang ar hurung zal li,
ahle ndazina a ni tchod’a.
9 Kayam suma asa’atna, a mba tchazi woyo,
wani suma a nga djup Ma didinina a mba tandagad’a djona.
10 Ar ndjö ang mba fe sama asa’atna d’i,
ang mba hal yima mam kuana,
ang mba fum mbi.
11 Wani suma lulumana a mba tandagad’a djona,
azi mba le furî d’a ngola kur b’leng nga halas sa kal teglesa.
12 Sama asa’atna nga mi djib’er kurum á le sama d’ingêrâ tchod’a,
mi et siyam atam mi.
13 Wani Salad’a nga mi san ad’umu,
kayam mam we bur mam ma dabid’a nga mi mba.
14 Suma asa’atna a nga pat mbigeu mazi d’a fiyaka,
a nga ndir yeû mazid’a.
A le hina á tchi suma hohoud’a ki suma houd’a woyo,
á tchi suma d’ingêrâ woi mi.
15 Wani mbigeu mazi d’a fiyaka mba d’i tchogozi ni azi tazid’a,
yeû mazid’a mba d’i kus sei mi.
16 Vama ngiyeû ma nga abo sama d’ingêrîna
djivid’a ngola kal vama ngol ma nga abo sama asa’atnina.
17 Kayam ad’enga hi suma asa’atnid’a mba d’i dap peyo,
wani Ma didina mba mi ndjun suma d’ingêrâ.
18 Ma didina mi we kaka hi suma iratnid’a ka hî yam andagad’a;
a mba te djona gak didin.
19 Ata yima ndaka azi nga mbut zulona d’i,
kur bur ma baktarad’a azi nga hoba.
20 Wani suma asa’atna a mba ba woyo;
suma a kak djangûna ki Ma didinina
a mba mbut ni d’igi b’od’a hasunid’a na,
a mba yak keyo, a mba val lei d’igi andosâ na.
21 Sama asa’atna mi nde balâ abo sana,
nga mi wuragam mbi;
wani sama d’ingêrâ mi we hohou sana, mi hum hawa.
22 Suma Ma didina mi b’e vunam kazina
a mba tandagad’a djona,
wani suma mi gazi vunina
a mba tchazi woi mi.
23 Ni Ma didina ba, nga mi ndjun sana kur tit mamba,
tam nga d’i lum djivid’a yam lovot mamba mi.
24 Le mi puk kä pî, nga mi ba kä d’i,
kayam Ma didina nga mi vum abom akulo.
25 An kazongôn dei, ki tchetchemba an mbut wa mamara,
wani an we Alona mi ar nga sama d’ingêrâ woi yam tu d’i,
andjavam nga mi talal á hal tena d’uo mi.
26 Mam nga mi we hohowa suma teteu,
nga mi he balâ mi suma mi;
Alona mi b’e vunam yam andjavam mi.
27 Ang ar tchod’a woyo, ang le djivid’a.
Hina wani, ang mba kak karid’a gak didin.
28 Kayam Ma didina mi min ni d’ingêra,
nga mi ar mam suma d’engzengâ woi d’i.
Nga mi ngomozi burâ ki burâ,
wani andjafâ hi suma asa’atnina, a mba tchazi woyo.
29 Suma d’ingêrâ a mba tandagad’a djona,
azi mba kak kat gak didin.
30 Zla d’a ndavun ma d’ingêrîd’a ni d’alâ,
mi de ni zla d’a gagazid’a mi.
31 Gata hAlo mamid’a ti nga kurumu,
asem nga mi giget tuo mi.
32 Sama asa’atna nga mi tchiget ma d’ingêrâ,
mi hal á tchum mbei mi,
33 wani Ma didina mba mi aramzi abom mbi.
Ata yima a nga kam sariyad’a kama,
Ma didina nga mi aram mbei d’i.
34 Ang tin hurung yam Ma didina, ang tit kur lovot mamba;
mam mba mi hlang yang akulo,
ang mba tandagad’a djona.
Fata mi tchi suma asa’atna woid’a,
ang mba wazi ki irangû.
35 An we sama asa’atna mi nga tchola ad’enga,
nga mi ruî woi d’igi agu ma ngulom ma nga tchola
ata yima mi deî kuana na.
36 Bugol an kal ata yi máma, gola, mi nga d’i!
An halamu, an fum nga d’i!
37 Ang tin irang yam sama iratna,
ang gol sama d’ingêrâ,
kayam sama halas máma mba mi i avogovogo.
38 Wani suma a tchila yam gatina pet, a mba ba woyo;
suma asa’atna a mba i avogovok ki.
39 Ma didina ni ma sut suma d’ingêrîna,
mam mi ma ngomozi kur bur ma ndakina.
40 Ma didina nga mi ndjunuziya, nga mi prud’uzi woi mi,
nga mi prud’uzi woi abo suma asa’atna,
mi sud’uzi kayam azi ngei tazi natamu.
© Azumeina Bible © Alliance Biblique du Tchad, 1999.
