Yor tad’a hi sama a digim mbeina
(Ni zla d’a tud’a ki Saw Gil 42)1 Alo mana, ang kan sariya manda,
ang ngomon abo andjaf suma bei we hohowa suma,
ang prud’un ndei abo suma lemba ki suma mbut ira.
2 Alo mana, angî ma ndjununa.
Ni kayam me ba, ang gan ndei na ge?
Ni kayam me ba, ang aran kur ndaka
abo man suma djangûna na ge?
3 Ang tagan b’o manga ki gagazi manga,
ar a ndjununu,
ar a tinin yam ahina mang
nga ang tinit irat vat ta ang nga kaka kuad’a.
4 Hina wani, an mba ni i ata yi mang
ma ngal ahle suma ngat buzuna
gen ang Alo man ma furîd’a ki hur ma hapma.
Ang Alo mana, an mba ni gileng kadingâ.
5 An nga ni djop tan ala:
Ni kayam me ba, an mbut hohoud’a hina ge?
Ni kayam me ba, an djib’er hina ge?
An tin hurun ni yam Alo mana, an mba ni gilem kua.
Mam mi Alo man ma sud’una.
© Azumeina Bible © Alliance Biblique du Tchad, 1999.
