Sawal la yam tela hamulîd’a
1 Ni sawal la Kore groma a hlat kadingâ a hat mi ma ngolâ hi suma hle sawalina. Ni sawal la od’a.
2 Hurun nga oîd’a ki zla d’a djivid’a.
An nga ni dala: Sun man nda an nga ni lata ná subur amulâ!
Ar sinan ka’î d’igi sama d’al ma b’ir djivid’a heîna na!
3 Ang djif mangâ kal suma pet.
Zla d’a sumad’a nga d’i buzuk kei avunangû.
Ni kayam ndata ba, Alona mi b’e vunam kang ki iram fafat.
4 Ma ad’eng ma dur ayîna, ang djin mbigeu mang nga fiyaka furungû.
Ti ta’î subur manga ki haheî manga mi.
5 Ki subur manga, ang nga yam akulum mangâ.
Ni yam gagazid’a ki lulumad’a ki d’ingêra ba, ang nga kus ayîna,
ni kad’eng manga ba, ang mba hle bangâna.
6 Yeû manga siyat ni feta dedelem.
Ang mba yet ki mang suma djangûna;
azi mba puk kä avorongû.
7 Alona, zlam mang nga amula ni d’a gak didinda.
Ang nga te leu manga ni ki d’ingêra.
8 Ang min ni d’ingêra, ang noî asa’ata.
Ni kayam ndata ba, Alona, Alo mangâ mi manangû,
mi vong mbul ma furîd’a kangû,
mi hang yima hud’a kal ndrongâ mi.
9 Mbul ma his ma afufuîna,
nala, mirâ, alowena ki kasâ,
a nga his ata baru mangâ.
Ata yima ang nga nde woi
kur azì mang ma a minim djifâ ki sï ahlo’îna,
suma a nga gileng ki furîd’a kadingâ.
10 Gro aropma hamuleinina a nga aduk amiyông suma subura;
amula ti nga yam bigang nga ndjufa
ki lor ra Ofir-ra tchuka atad’u.
11 Goronda, ndak huma, ndak we, ndak tin humak huma,
ndak mar yam sum ma’â ki suma avo habu’â.
12 Ar amulâ tam mbi lum djivid’a yam djif ma’â.
Kayam mam mi sala’â, ndak hum ngola.
13 Suma Tir-râ a mba mba ki he d’a hawa mazid’a,
suma ndjondjoî mazid’a kal teglesâ a mba hal djivi maka.
14 Amulâ goromba nga d’i wile kur azina hamulîna,
baru mata ni d’udjod’a ki lora.
15 A nga it mamulâ ki baru mat ma d’udjod’a teteng máma atad’u;
ti nga d’i i ki ndrot yuguneina gen amulâ.
16 A nga tinizi ki aîd’a ki hur ma hapma;
a kal avo hurazina hamulîna.
17 Amulâ, grongâ a mba vrak balum abuyong ngolo,
ang mba tinizi amulei suma nglona yam andagad’a pet.
18 An mba ni dang zlang ngei
kur atchogoi d’a lara ge pet.
Andjaf suma a mba suburung gak didin mi.
© Azumeina Bible © Alliance Biblique du Tchad, 1999.
