Tchenda hi sama banama mi mbud’um irama
1 Ni sawal la gile d’a David mi hlat kadingâ mi hat mi ma ngolâ hi suma hle sawalina.
2 Alo mana, ang tin humang á hum tchen manda;
ata yima an nga ni tchenengâ, ang ngei tang avoron ndi.
3 Ang tin humang hulongôn humba.
An nga ni tcha tata, djib’era kal kan
4 abo zla d’a ded’a hi man suma djangûnid’a,
avok suma asa’at suma a nga djobon vunana mi,
kayam azi nga de zla d’a tchod’a kanu,
a nga tchugun zlad’a kan kayîna mi.
5 Vunadigan ndi pat fek,
an nga ni le mandara matna.
6 An nga ni le mandarâ, an nga ni zlaga,
vunadigan ndi pat fek mi.
7 An dala: Ladjï an nga ki gigingâ d’igi gugud’a na ni,
an mba ni pir ni i tuk tan ata yima dingâ.
8 An mba ni ring ngei dei,
an mba ni kak sä abagei hur fulâ.
Tchol ndjö9 An mba ni ring atogo zak
á ngei tan abo babar ma ngol ma bibi’â.
10 Salad’a, ang b’lak nga hurâ hi man suma djangûnina woyo,
ang walazi djib’er mazid’a kä,
kayam an we huneîd’a ki yalâ a nga kur azì ma ngolâ.
11 Azi nga ngui gulumun mama andjege ki faleya;
kurum krovo ni hohoud’a ki ndaka.
12 Kurum krovo ni b’laka;
zla d’a kad’a ki mbut ira a wal nga woi ki sed’em mbi.
13 Ladjï man ma djangûna mi de zla d’a tchod’a kan ni mamu ni, an ve tanu;
ladjï man ma d’ugura tchol dur ayîna ki sed’en ni mamu ni,
an mba ni ngei tan avoromu.
14 Wani ni ang ndran ma ndeina,
ni ang banan ma tita.
15 Ei yoi siret ma djivina aduk teya,
ei suburi Alona kur gong mamba abo tei tu mi.
16 Ar man suma djangûna a bo ni mad’abilâ,
azi kal azulei ni ki irazi ata yima nduvunda,
kayam asa’ata nga oîd’a kuruziya.
17 Wani an nga ni yAlona;
Ma didina mi sud’unu.
18 Yorogo, faleya ki fladege,
an nga ni tchenem tchen nda hohoud’a;
mam nga mi humun mi.
19 Mam nga mi sud’un ndei kur ayî ma durâ,
mi han b’leng nga halasa,
kayam suma a dur ayîna ki sed’ena a nablaud’a.
20 Alo ma nga kaka yam zlam mamba gak didina,
mba mi huma, mba mi hulongôzi yazi kä,
kayam azi nga mbut huruzi yam tcho mazid’a d’i,
a nga lum mandaram mbuo mi.
Tchol ndjö21 Sama nana mi mbut ni ir buniyôma,
mi b’lak vun mam ma djinda woi mi.
22 Vunam ma ded’a ni mbulâ,
wani kurum krovo nayî ma durâ.
Zla mam mba ded’a tugung tang d’igi mbulâ na,
wani ti ni d’igi mbigeu d’a fiyak
ka pad’at tei kur aziyata na.
23 Ang tchuk ahle suma a hang djib’erina yam Ma didina,
mam mba mi ndjunung á tchola,
kayam mam nga mi ar sama d’ingêrâ á ka azlard’eid’a d’i.
24 Wani ang Alo mana, ang mba tchi suma tchi matna
ki suma mbut ira woyo.
Azi mba tcha ata bur ma ang ngazizina d’i,
wani an tin hurun ni kang angû.
© Azumeina Bible © Alliance Biblique du Tchad, 1999.
