A tchen Alona yam b’laka hi gong nga kud’ora
1 Ni sawal la gile d’a Asaf mi hlata.
Alo mamina, ni kayam me ba,
ang arami woi ki irang hina fafat ke?
Ni kayam me ba,
hurung zal ata ami tumiyô mang suma ang nga polomina na ge?
2 Ang djib’er yam mang suma ang guzuzi adjeu dedeina,
ang djib’er yam andjaf sumala ni mang suma ang hlazi djona na,
ang djib’er yam Siyon ndala ni yi mang ma kaka d’a.
3 Ang i gak ata yima mi b’lak kei dedeina.
Ma djangûna mi b’lak wa yi mang
ma a tinim iram vama woi kakazeî.
4 Mang suma djangûna a nga siwel
ata yima ang nga tok ki sed’emi kuana,
azi pe drapo mazid’a akulo
d’igi vama taka na ala azi kus wa da’.
5 A wazi ni d’igi suma a hlandjetna akulo
á ka agu d’a ndindikina na.
6 Ki tchetchemba, ahle suma a tched’ezina pet,
azi b’lagazi woi kandjetna kabo tchafa mi.
7 Azi do yi mang ma a tinim iram vama akud’a,
azi to gulumun mangâ woyo,
a miret yima a yang simiyêng kuana kä kaseziya.
8 Azi nga de tazi kami ala: Ei i b’lageizi woi pepet!
Azi ngal yima lara ma ami nga kud’urong kua ma kur ambasina woi mi.
9 Ami wami nga vama tak mala ang nga ki sed’emiya na d’uo d’a,
ma djok vun mang nga d’uo d’a.
Sama adigami ma wala ahle ndazina,
a mba le ni gak mindja ge na nga d’i.
10 Alo mamina, ma djop vun suma mba mi lazangî hina gak mindja ge?
Ma djangûna mba mi ngulung anguzangî hina gak mindja ge?
11 Ni kayam me ba, ang d’ut abong vunadigang hina djang nge?
Ang pad’am mbeyo, ang b’lagazi woyo!
12 Alo mana, angî amul ma kad’u tinda dedeina,
angî ma prut suma woi avun ayîna yam andagad’ina.
13 Angî ma wal alum ma ngolâ woi kad’eng mangina,
angî ma wak yam amburei suma nglo suma aduk mbina woina.
14 Angî ma wak ambur ma a yum ala Leviyatan-na
yam mba tetenga woina,
ang mbud’um vama tena mahle suma abagei hur fulîna.
15 Angî ma nga lau golongeîna ki horina,
angî ma nga so alum ma nglo ma bei sod’a ba na woina.
16 Faleid’a ni manga, andjeged’a ni manga mi,
ni ang ba, lafata ki tilâ mi.
17 Ni ang ba, tin hagad’a handagad’id’a,
ni ang ba, tin amenda ki vun simetna mi.
18 Ma didina, ang djib’era!
Ma djangûna nga mi ngulungû,
andjaf ma lilid’a nga mi panang simiyêngû.
19 Ar ang he mang suma ang hurung vazi heîna
abo suma tchona d’i,
ar ang mar yam mang suma hohoud’a d’uo mi.
20 Ang djib’er yam vun mang ma djinda,
kayam yima nduvun ma i’îlik ma yam andagad’ina,
mi mbut ni yima kaka hi suma tchi matnina.
21 Ar suma a djobozi vunazina a mbut zulona d’i,
ar suma houd’a ki suma hohoud’a a gileng simiyêngû.
22 Alo mana, ang tchol akulo, ang de woi yam zla manga,
ang djib’er yam ngul la andjaf suma lilid’a
a nga ngulung burâ ki burîd’a.
23 Ar ang mar yam zla d’a ded’a hi mang suma djangûnid’a
ki suma djangû suma a nga siwel kang burâ ki burîna d’i.
© Azumeina Bible © Alliance Biblique du Tchad, 1999.
