Ge yam mba kä ad’u suma te yambid’a
1 Ar suma pet a ge yazi kä ad’u suma te yamba, kayam te yamba bei tcholï ata Alonid’a nga d’i. Alona tamba mi tin suma te yamba ni mamu. 2 Ni hina ba, sama so vun suma te yambina, mi so ni vun ma he ma Alona mi huma. Suma a so vunina, sariyad’a mba d’i vaziya. 3 Kayam suma a le sun nda djivid’ina a nga ki mandarâ avok suma te yamba d’i. Wani suma a le sun nda tchod’ina a nga le mandarâ avoroziya. Ang min le mandara ma te yamba d’uo zu? Ang le ni djivid’a. Hina wani, mam mba mi yorongû. 4 Kayam mam mi ma sunda hAlonina á ing kur djivid’a. Wani le ang le tchod’a ni, ang le mandarâ, kayam mam nga kad’enga á gad’ang gagazi. Kayam mam mi ma sunda hAlonina á tak ayîna hAlonina woi á gat sama le tchod’ina. 5 Wani agi gagi yagi kä ad’u suma te yamba ni yam ayîna hAlonina hol li, wani ni ki djib’er ra kurugid’a mi.
6 Kayam ndata, ar agi hagi tara. Kayam suma te yamba ni suma sunda hAlonina ata yima a nga le sun mazid’a burâ ki burîna. 7 Ar agi hagi mi nge nge pî va mama. Agi hagi tara mi sama tara, agi hagi dalalana mi sama tar dalalana, agi gagi yagi kä avok sama ndak agi gagi yagi kä avoroma, agi hugi sama ndak á hud’ina mi.
O d’a yam ndrangîd’a
8 Agi aragi balâ hi sa kagi d’i, wani ni balâ hi od’ina hol, nala, ar agi lagi yam tagiya. Kayam sama nga mi le yam ndramina, mi nda’î vun gata memet. 9 Kayam vun ma hed’a mi dala: Ar ang le mizeuna d’i, ar ang tchi sa d’i, ar ang kul li, ar ang le d’od’oka d’uo mi. Vun ma he ma dingâ pet a togomî kur vun ma he máma tu ala: Ang le yam ndrangâ d’igi ang tanga na. 10 Sama nga mi le od’ina nga mi le ndrama tcho d’i. Kayam ndata, od’a nga d’i ndak vun gata memet.
Min tad’a yam mbad’a hi Christ-sa
11 Kayam ndata, mbeî agi lagi hina mi, kayam agi wagi atchogoi meid’a. Ki tchetchemba, yina ndak wa kagi á zlid’igi akulo kur sena, kayam sut meid’a ti mba wa go kal bur ma ei hei gagazid’ina. 12 Andjeged’a ti ar wa go á kala, yina mi ar wa go á fod’a. Kayam ndata, ei arei sunda hi nduvundid’a woyo, ar ei tchugi ahle suma dur ayîna atei á duri ayîna kur b’od’a. 13 Ar ei tid’i d’ingêr d’igi tit ta faleid’a na, bei batranga, bei guruta ki süma, bei le mizeuna, bei gaulangâ, bei yalâ, bei yungôra mi. 14 Wani ar agi hlagi ni djib’er ra awili d’a Salad’a Jesus Christ mi hagizid’a. Ar agi djib’eregi yam ahlena hi sa magi ma adjeunina á ndak vun d’od’ok mamba d’i.
© Azumeina Bible © Alliance Biblique du Tchad, 1999.
