Tchod’a ti mba ki matna; Christ mi mba karid’a
1 Kayam ndata, ei mba dei nana ge? Ei mba i avogovok kur tchod’a kayam sumad’a hAlonid’a ti zula zu? 2 Nga na d’i! Ei suma boi woi ata tchod’ina, ei dok i avogovok kur tchod’a d’ei zu? 3 Agi wagi nga d’ala ei pet suma lei batemba á kagei zlapa tu ki Jesus Christ-sâ, ei lei batemba ná zlabei tu ki sed’em kur mat mama d’uo zu? 4 Kur batem meid’a, a tozei zlapa tu ki sed’em kur mat mama. D’igi Christ mi tchol akulo aduk suma matna karid’a kad’eng nga subura hAbumba na, hina mi, ei tid’i ni kur ari d’a awilid’a mi.
5 Le ei zlabei tu ki mam kur mat mama ni, ei mba zlabei tu ki mam kur tchol mamba akulo aduk suma matna mi. 6 Kayam ei wei ala sa mei ma adjeuna a b’alam wa akulo ata aguna zlapa ki Christ á b’lak ad’enga hi hliwi ma tchona woyo. Hina, ei lei magomba mi tchod’a d’uo d’a. 7 Kayam sama mit teina mi nga ad’u ad’enga hi tchod’id’a d’uo d’a. 8 Wani le ei boi woi zlapa ki Christ-zu ni, ei hei gagazid’a ala ei mba kagei karid’a zlapa ki mam mi. 9 Kayam ei wei ala Christ mi tchol akulo aduk suma matna, mi dok mi mit tuo d’a, matna nga kad’enga kam mbuo d’a. 10 Kayam mat ma mi mitna, mi mit ni yam tu yam tchod’a, wani ari d’a mi nga ki sed’et ki tchetchembid’a, mi kak arid’a ni yam Alona. 11 Ar agi gologi tagi d’igi suma matna na ata tchod’a, wani d’igi suma a nga kaka arid’a yam Alona zlapa tu ki Jesus Christ-sâ na mi.
12 Ar tchod’a ti te leud’a yam hliwigi ma matna d’i, ar agi gagi yagi kä ad’u d’od’ok mamba d’uo mi. 13 Ar agi hagi ir hliu tagi mi tchod’a d’igi ahle suma dur ayî suma d’ingêr ruo na na d’i. Wani ar agi hagi tagi mAlona d’igi suma a tchol akulo aduk suma matna suma mbut arid’ina na. Ar agi hagi ir hliu tagi pet mAlona d’igi ahle suma dur ayî suma d’ingêrâ na. 14 Ar tchod’a ti te leud’a kagi d’i, kayam agi nad’u gata d’i, wani agi nad’u sumad’a hAlonid’a.
Ei kagei ni magumeina hi d’ingêrîna
15 Ni nana ge? Ei mba lei tchod’a kayambala ei nga ad’u gata d’i, wani ei nad’u sumad’a hAlonid’a d’a zu? Nga na d’i! 16 Agi wagi nga d’ala le agi gagi yagi kä á le sunda mi sa ni, agi mbud’ugi ni magumeina hi ma agi gagi yagi kä ad’uma, d’oze ni mi tcho d’a igi kur matnid’a, d’oze ni mi ge yam mba kä d’a igi kur d’ingêra avok Alonid’a zu? 17 Wani an le mersi mAlona, kayam me adjeu agi ni magumeina hi tchod’ina, wani ki tchetchemba, agi gagi yagi kä ki hur ma tuna d’igi hat ta a had’agizid’a na. 18 Alona mi pad’agi woi kur tchod’a á mbud’ugi magumeina hi d’ingêrina. 19 An nga ni dagi zlad’a ni d’igi suma na kayam amangeîd’a hi hliwigid’a. Avok agi hagi tagi pet d’igi magumeina na á le sun nda ndjendje d’a tchod’a á tid’igi kur batranga. Wani ki tchetchemba, ar agi hagi tagi pet d’igi magumeina na á le sun nda d’ingêra á tid’igi tit ta irata mi.
20 Kid’a agi ni magumeina hi tchod’a tua d’a, agi ni magumeina hi d’ingêrina d’i. 21 Adjeu agi fagi ni me ata yima agi nga lagi sunda, agi nga lagi zulona kat ki tchetchembid’a ge? Kayam dabid’a hi sun ndatid’a ni matna. 22 Wani ki tchetchemba, agi buzugugi woi kur tchod’a, agi mbud’ugi wa magumeina hAlonina mi. Hina, agi nga tid’igi kur lovot ta d’ingêra yam Alona; dabid’a nari d’a didinda mi. 23 Kayam wurak ka yam tchod’id’a ni matna, wani he d’a hawad’a hAlonid’a nari d’a didinda yam Jesus Christ Saleina.
© Azumeina Bible © Alliance Biblique du Tchad, 1999.
