Bowas mi ve Rut
1 Bowas mi i avun azina ata yima suma a min zlad’a kuana, mi kak kä. Sama ad’u andjafâ hi Elimelek ma Bowas mi de zlad’a mi Rut kama, nga mi kala. Bowas mi yum mi dum ala: Vani, ang mbeï kak kä wana. Mi mba mi kak kä mi.
2 Bowas mi yoï suma dogo aduk suma nglo suma kur azinina, mi dazi ala: Agi kagagi kä. Azi kak kä mi. 3 Mi de mi ma ndak á te djona hi Elimele’â ala: Naomi ti tcholï yam ambas sa Mowap-pa ti mba, nga d’i gus asinena hi wiyeina Elimele’â woyo. 4 Kayam ndata, an nga ni gang humangû, ang hlum djona avok suma nglona ki suma a nga kaka kä wana. Le ang min á hlumu ni, ang hlumu; le ang min á hlum mbuo ni, ang danu, an we; ma avorongâ nga d’i; an te djona ni blogongû.
Sa máma mi de mi Bowas ala: An min á hlum djona.
5 Bowas mi hulong dum ala: Le ang gus asinena abo Naomi ni, ang ve Rut ta Mowap pa ndjuvut mi mita mi, kayam simiyêm sil lei d’i.
6 Ma te djo máma mi dum ala: Le ni na ni, an min ndi, kayam ahle mana a b’lak kei d’i. Ang te djo máma, kayam an ndak ki.
7 Adjeu Israel-lâ a le ni na: Le sana mi te ni djona hi sa d’oze mi mbut ni va ni, ta suma a wala ahle ndazina a le gagazid’a wani, sana mi pat atuguru ma asema, mi hum mi ndrama. Wana ni glangâs ma aduk Israel-lîna.
8 Kayam ndata, ata yi máma sa máma mi de mi Bowas ala: Ang gus asinena, mi pat atuguru ma asema, mi humziya.
9 Ata yi máma Bowas mi de mi suma nglona ki suma pet suma a nga kaka kä ata yi mámina ala: Agi ni glangâs mana ini tala an gus wa asinena abo Naomi kahlena pet suma hi Elimele’â ki suma hi groma Kiliyon azi ki Malon-na mi. 10 An nga ni ve Rut ta Mowap pa atchad’a hi Malon-nda kayam blangâm sil lei d’i, kayam andjavam mi i avogovok aduk sum mama, ata yima a min zlad’a kua na mi. Agi ni glangâs mana mi.
11 Suma nglona ki suma pet suma a nga kaka kä ata yi mámina a dala: Â, ami ni suma glangâsâ. Ar Ma didina mi b’e vunam yam atcha d’a ang nga vata; ar ti mbut ni d’igi Rachel azi ki Lea, aropma hi Jakob suma mbà suma a tin ad’u andjaf Israel-lîna na. Ar ang ka’î sama ndjondjoîna aduk andjafâ hi suma Efrat-na; ar simiyêng mi yï kur ambas sa Betelehem-mba mi. 12 Ar Ma didina mi hang grona katcha d’a gor ndata, ar andjavang mi ka’î d’igi andjafâ hi Peres ma Tamar ri vud’um mi Juda-na na.
13 Bowas mi ve Rut atchad’a, mi zlap ki sed’ed’u. Ma didina mi b’e vunam kad’u, ti ve wirâ, ti vut gor mandjufâ. 14 Arop suma Betelehem-ma a de mi Naomi ala: Ar ei suburi Ma didin ma hak ini gor mandjuf ma mba mi ndjunu’â. Ar gorok ngolo máma simiyêm mi yï aduk Israel-lâ. 15 Mam mba mi b’lengêk hurugu, mba mi ndjunuk kur mamar maka mi, kayam akunok ka hurut vak heîd’a, ti vud’uk wa gro’â, ti kal grok suma kid’iziyana.
16 Naomi ti hle gorâ, ti gum adigad’u, ti ngomomu. 17 Ndrot sumazina a dala: A vut wa gorâ mi Naomi, a yum ala Obed. Obed mi vut Jesse, Jesse mi vut David.
Andjafâ hi David-na
18 Wana ni David abuyom ngolo: Peres mi vut Hesron, 19 Hesron mi vut Ram, Ram mi vut Aminadap, 20 Aminadap mi vut Nason, Nason mi vut Salmon, 21 Salmon mi vut Bowas, Bowas mi vut Obed, 22 Obed mi vut Jesse, Jesse mi vut David mi.
© Azumeina Bible © Alliance Biblique du Tchad, 1999.
