1 Mi dala:
Aman nda hurun vak heîd’a,
Gola! An nga ni kal kur asine mana,
an nga ni gul mir mana,
ki mbul man ma his ma afufuîna,
an nga ni te se ayuma ki mbul ayum mana,
an nga ni tche süm guguzlu manda kambir manda mi.
(Buniyôzina)
Buniyôzina a dala:
Buniyômina, agi tagiya, agi tchagiya,
agi gurud’ugi woi ki od’a
d’igi suma a gurut ki süma na.
Sawal la fid’id’a
Ti malam vun agrek matna, wani ndak kuo da’
(Ndad’u)
2 Ti dala:
An bur sena,
wani djib’er manda nga tinda,
an hum dela hi ma an hurun vuma
nga mi tum vun gonga.
(Mamu)
Mi dala:
Aman nda an hurun vak heîd’a,
ndak malan vuna woyo.
Gugu manda, ndjondjoî manda,
yan ndi ras abo mbad’ïd’a,
tumus sa kanda ti ras abo mbad’ï
d’a nga d’i tol ka andjeged’a.
(Ndad’u)
3 Ti dala:
An fok wa baru manda woyo,
an dok tchugut atan nduo d’a!
An mbus asen ndei da’,
an min mbud’um zozota d’uo d’a.
4 Ma an hurun vum heîna,
mi nigï abom ir vun gonga;
mugulan nga mi hat kam heî.
5 An tchol akulo
á mal vuna mi ma an le kam heîna.
Mir ma abona nga mi sor kä
ma ata tchitchid’ana, mi yam mbei
ata kawei ma ata bapmina.
6 An mal vuna mi ma an hurun vum heîna,
wani mi han huyogomu, mi iya.
Zla mamba ti had’an hurunu,
an halamu, ni fum nga d’i.
An yumu,
wani mi hulongôn nga humba d’i.
7 Suma ndjol vun gulumun
suma a nga ngui hur azì ma ngolîna,
a ngavanu, a tonu, a kan tan mbilâ,
a fok baru man nda an d’ud’ut atanda woyo.
8 Agi yugunei suma Jerusalem-ma,
an nga ni djobogiya:
Le agi fagi ma an hurun vum heîna ni,
agi mba duma na ge?
Agi dum ala an mbut wa amangeîd’a kur od’a.
(Yuguneina)
9 Yuguneina a djobot ala:
Ndak ka djif heî kal aropmid’a, ndak damiya,
ma ndak le kam heîna, mi kal ndroma ni ki me ge?
Ma ndak le kam heîna, mi kal ndroma ni ki me ba,
ndak djobomi kam hina ge?
(Ndad’u)
10 Ti dala:
Ma an hurun vum heîna,
mi djif heî, iram nga d’i wile wiwilik,
mi djif kal suma dudubu dogona.
11 Yamî d’igi lor ra bei zozota ba d’a na,
tumus sa kamba nga d’i ngal wiwilik,
ti wurad’a d’igi gagauna na.
12 Iram mbi djif d’igi gugu
d’a nga kaka avun toliyondid’a na,
mi mbus tamî aduk ambira,
mi tuk tamî aduk duzîd’a mi.
13 Agozlomî d’igi asine ma a pe agu
ma his ma afufuîna kua tetengâ na.
Vunam ma dalalâ ni d’igi tamas
sa mirâ nga mi djang ngei kuad’a na mi.
14 Abomî d’igi ngangam ma lor ma a ndalam
kahina d’a a yat ala Krisolitid’a na.
Tamî d’igi sï ahlok ma a tched’em a ndalam
kahina d’a a yat ala Safirid’a na mi.
15 Asemî d’igi agu ma murgulina
hahina d’a a yat ala marbre d’a hapa
ma a nigim kä kur lor ra kal teglesid’a na.
Iram mba gola ni d’igi ahuniyô suma Liban-na na,
ti vat zenen d’igi agu sedrena na mi.
16 Vunam mbulâ, zlam lan heî!
Agi yugunei suma Jerusalem-ma,
wana ni ma an le kam heîna,
wana ni banan ma kokodjona!
© Azumeina Bible © Alliance Biblique du Tchad, 1999.
