Tita hi kretiyênid’a
1 Ang gazi humazi a ge yazi kä ad’u suma te yamba ki suma ad’enga, a humuziya, a min tazi á le sun nda djivi d’a lara ge pet. 2 Ar azi de zla d’a tchod’a yam sa d’i, a hal huneîd’a d’i, wani a le ni djivid’a, a ka’î luluma ki suma pet mi. 3 Kayam adjeu ei ni suma bei ned’a, suma bei hum vuna, suma vit teina. Ei ni suma le magomba mi d’od’oka teteng ki furîd’a hi duniyad’ina, suma asa’atna, suma yungôra. Suma a noyêya, ei noyeî suma ding mi. 4 Wani kid’a djivid’a hAlo ma sud’inid’a ki o mam mba yam sumid’a a nde woid’a, 5 mi sud’i ni yam sun nda d’ingêr ra ei lata d’i, wani ni yam we hohou mamba. Mi sud’i woi ki mbusa ata yima Muzuk ma bei tchod’a ba na mi vud’i vut ta awilid’ina, mi hei ari d’a awilid’a mi. 6 Kayam Alona mi vo Muzuk mama kei ngola ni yam Jesus Christ ma sud’ina. 7 Ni kayam suma mamba ba, mi mbud’i suma d’ingêrâ avoromu, kayam ei fei ari d’a didin nda ei tini huri kata. 8 Zla ndata ni zla d’a irata.
An min ala ang dazi zla ndata kad’enga, kayam suma he gagazid’a yam Alonina a min tazi á le sun nda djivid’a. Zla ndata ni zla d’a djivid’a yam suma á led’a. 9 Wani ang wal lei ki djop pa lilid’a kandjaf ma ndum ma dabi mamba nga d’uo na ki yalâ ki tuguyo d’a yam gatid’a. Kayam ahle ndazina a nga ki mbina d’i, wani nahle suma hawa ya’â. 10 Sama nga mi mba ki wala aduk Tokina, ang gad’am yang tu d’oze mbà. Bugola, ang wal lei ki sed’emu. 11 Ang we sama hina na mi walï woi ki lovot ta d’ingêra, tcho mamba tak kei ala zlad’a vum wa.
Tchen nda dananda
12 Le an sun sä Artemas d’oze Tisik gevengû ni, ar ang b’at tang á fan avo Nikopolis, kayam an djib’er ala an mba kak sä kua vun simetna. 13 Ang tin ni Zenas ma wäd’u gata hi Romê-d’ina ki Apolos atogo. Ang ndjunuzi kur tit mazid’a, ar va kid’agazi d’i. 14 Ar sum meina a hat á le sun nda djivid’a teteu, kayam a fahle suma a kid’agazina, kayam tit mazid’a kak bei vuta d’i.
15 Suma a nga zlapa ki sed’ena pet, a gang depa. Ang ge buniyoî suma ei le kazi kur he gagazid’ina depa.
Ar Alona mi vagi sumad’a pet.
© Azumeina Bible © Alliance Biblique du Tchad, 1999.
