AHLE SUMA A BUZUK KEI IR ZAKARI-NA
Ma didina nga mi yi Israel-lîd’a
1 Kur til ma klavandina kur biza d’a mbà d’a Dariyus nga mi tamulid’a, Ma didina mi de mi mam ma djok vuna Zakari Berekiya gorom ma Ido gorom ngolonina ala: 2-3 Ang he vuna mi Israel-lâ ala: An Ma didin ma ad’engên kal petna hurun mi zal ngola yam abuyogi ngolo. Wani an hlagi vunan ala: Le agi hulongôgi geven an Ma didina ni, an mba ni hulongî gevegi mi. 4 Ar agi lagi d’igi abuyogi ngolo suma adjeuna na d’i. Suma djok vuna a dazi ala: Ma didin ma ad’engêm kal petna mi dala: Agi hulongôgï woi kur sun magi d’a tchod’a, kur tit magi d’a ata yat tuo d’a. Wani azi hum nga d’i, a djib’er nga yam zla d’a an Ma didina ni data d’uo mi. 5 Abuyogi ngolo a nga ni lara ini ge? Suma djok vuna a ndak á kak didin ndju? 6 Wani zla manda ki vun ma hed’a suma an hazi mazungeî man suma djok vunina, a vabuyogi ngolo ki zlad’a. Azi hulongî gevenu, a djok tit mazid’a, a dala: Ma didin ma ad’engêm kal petna mi le ki sed’ei ni ngad’a yam sun meid’a ki tit meid’a d’igi mi nga hurum na.
Vama nde tam mbei ir Zakari avo’â: Akulumeina
7 Kur bur ma dok mbà yam fid’ina hi til ma dogo yam tu mala ni til Sebat-na na ni kur biza d’a mbà d’a Dariyus nga mi tamulid’a, Ma didina mi de zlad’a mi mam ma djok vuna Zakari Berekiya gorom ma Ido gorom ngolonina. Zakari mi dala: 8 Kur andjeged’a vana nde tam mbei iranu, an we sana mi nga yam akulum ma hleuna, mi nga tchola aduk agu mirtena gumunu, akulumei suma hleuna kakulumei suma bolona kakulumei suma hobiyona a nga tchola blogomu. 9 An djobom ala: Salana, akulumei ndazina ni me ge?
Malaika ma Ma didina mi hum vuna á dan zlad’ina mi dan ala: An mba ni vang ad’ud’a kaziya.
10 Sama nga tchola aduk agu mirtenina mi dan ala: Azi nakulumei suma Ma didina mi sunuzï á ngui tita yam andagad’ina.
11 Malaika suma djang akulumei ndazina a de mi malaikana hi Ma didina ma nga tchola aduk agu mirtenina ala: Ami nguyumi yam andagad’a ki zla tat pet, wani suma yam andagad’ina a nga kaka ki halasa bei va mi lazi ba.
12 Ata yi máma malaika máma mi dala: Ma didin ma ad’engêng kal petna, ni mindja ba, ang mba we hohowa suma Jerusalem-ma ki suma kur azì ma nglo ma Juda suma ang hurung zal kazi gak bizad’a dok kid’iziyana ge?
13 Ma didina mi hulong ki zla d’a de d’a djivid’a ki zla d’a b’leng hurâ mi malaika mám ma nga mi de zlad’a ki sed’ena.
Ma didina mba mi man Jerusalem man nda dinga
14 Malaika ma nga mi dan zlad’ina mi dan ala: Ang er ad’ung akulo, ang tchi wala ala: Ma didin ma ad’engêm kal petna mi dala:
An nga ki hur ma hat ma ngolâ
yam Jerusalem ki Siyon.
15 Wani hurun mi zal ngola
yam andjaf suma a nga subur tazina,
kayam an hurun mi zalî
hina nde ganang yam Israel-lâ,
wani azi lazi tchod’a ngola.
16 Kayam ndata, an Ma didin ma ad’engên kal petna
nga ni dagiya:
An mba ni hulongî Jerusalem
á tak djivi manda woyo,
a mba hulong min gong man nda kud’ora akulo,
a mba min azì ma ngolâ akulo mi.
17 Malaikana mi dan kua ala: Ang tchi wal la dinga ala: Ma didin ma ad’engêm kal petna mi dala:
Azì man ma nglona mba mi fe djivid’a,
an mba ni man Jerusalem man nda dinga,
an mba ni ndjun Siyon mi.
Vama nde tam á mbàd’ina: Aduveina ki suma tchafa
18 An hle iran akulo, an gol wani vana nde tam mbei iranu, an we aduveina fid’i. 19 An de mi malaika ma dan zlad’ina ala: Aduvei ndazina ni me ge?
Mi hulong dan ala: Azi nandjaf suma ad’eng suma a pleî suma Juda-na ki Israel-lâ ki suma Jerusalem-ma woi yaya’â.
20 Bugola, Ma didina mi tagan suma tchafa fid’i. 21 An dum ala: Azi mba a le ni me ge?
Mi hulong dan ala: Azi nandjaf suma ad’eng suma a ndjoî suma Juda-na woi tala sa mi hle yam akulo avorozi d’uo na. Suma tchaf ndazina a mba ná mbud’uzi mandarâ á dur kandjaf suma ad’eng suma ahle yazi akulo á dur kambas sa Juda-d’a á ndjoî suma kurutna woina.
© Azumeina Bible © Alliance Biblique du Tchad, 1999.
