A ngui Jerusalem, wani a prud’ut teyo
1 Wana ni zla d’a Ma didina mi ngop ki Israel-lîd’a:
Ma didin ma b’eng akulod’a
ma gäd’u andagad’a
ma le muzu’â kur sanina, mi dala:
2 Gola! An nga ni mbut Jerusalem ni kop ma süm ma gurut suma yam suma a nguyutna pet. A mba le ki Juda ni hina ata yima a ngui Jerusalem kä na mi. 3 Kur bur máma an mba ni mbut Jerusalem nahina d’a anek ka suma a mba hlat akulod’a. Suma a mba hlat akulona mba d’i kazi mbil ma matna. Ata yi máma andjaf suma yam andagad’ina pet a mba tok kat á durâ.
4 An Ma didina nga ni dagiya: Kur bur máma an mba ni mbut akulumeina lilid’a pet, an mba ni gurut suma a djangâzina woi mi. Wani an mba ni tin iran ni yam suma Juda-na, an mba ni duk ir akulumeina handjaf suma dingîna woyo. 5 Amulei suma Juda-na a mba de kuruzi ala: Nata Alo Ma didin ma ad’engêm kal petna ba, suma Jerusalem-ma a fad’enga. 6 Kur bur máma an mba ni mbut amulei suma Juda-na ni d’igi aku d’a ti ndaduk agud’id’a d’oze d’igi aku d’a bolom mba ti ngal awu ma mbugulu ma nga tchuka kä na na. A mba ngal suma a nguyuzina, abo ma ndjufâ, abo ma gulana mi. Jerusalem mba d’i ar kaka ata yad’u.
7 Ma didina mi dala mba mi mba á sut andjafâ hi Juda-na tala andjafâ hi David-na ki suma Jerusalem-ma a hle yazi akulo ala azi kal suma Juda suma a arâ d’uo d’a. 8 Kur bur máma Ma didina mba mi ngom suma Jerusalem-ma. Ma amangeî ma adigazina mba mi mbut ni d’igi David na, ma ad’u andjafâ hi David-nina mba mi mbut ni d’igi Alona na, d’igi malaikana hi Ma didinina na avorozi mi.
Hor ma tchi ma kur ambasa petna
9 Ma didina mi de kua ala: Kur bur máma an mba ni mba á b’lak andjaf suma pet suma a mba mba á dur ki suma Jerusalem-mina woyo. 10 Ata yi máma an mba ni vo muzuk ma suma ma hud’a yam andjafâ hi David-na, yam suma Jerusalem-ma. Azi mba mbut irazi kanu, azi mba tchi hor ra sama a tchogoma d’igi a tchi horâ gor ma abo abum tuna na, a mba tchi tchi ma hat hurâ kam d’igi a tchi yam gor ma a vud’um avo’â na mi. 11 Kur bur máma a mba tchi hor ma ngolâ avo Jerusalem d’igi a tchim yam Hadat-Rimon kur hor ra Megido-d’a na. 12 Suma kur ambasina a mba tchi horâ ad’u adesâ teteng, adesâ hi David-na vamu, aropma vaziya, adesâ hi Natan-na vamu, aropma vaziya, 13 adesâ hi Levi-na vamu, aropma vaziya, adesâ hi Simei-na vamu, aropma vaziya, 14 ades ma dingâ pet, ades ma lara pî vam teteng, aropma vazi mi.
© Azumeina Bible © Alliance Biblique du Tchad, 1999.
