Vama nde tam á klavandid’ina: Pus ma dur ayî ma fid’ina
1 Vama dingâ mi nde tam mbei iran kua. An we pus ma dur ayîna fid’i mi buzuk kei aduk ahuniyôna mbà. Ahuniyô ndazina ni kawei ma hleuna. 2 Pus ma avo’â akulumei mama a ni hleud’a, pus ma mbàna akulumei mama a ni wurogeid’a, 3 pus ma hindina akulumei mama a ni hobiyod’a, pus ma fid’ina akulumei mama a ni mord’eina. 4 An djop malaika ma dan zlad’ina ala: Salana, ahle ndazina ni me ge?
5 Malaika máma mi hulong dan ala: Azi ni simet ma fid’i ma akulo ma buzugï woi ata yam ma tchola avok Salad’a ma te yam andagad’a petna.
6 Akulumei suma wurogeina a hle pus ma dingâ, a i irazi yam ambas sa abo ma norîd’a. Akulumei suma hobiyona a i blogoziya, akulumei suma mord’eina a i irazi yam ambas sa abo ma sutnid’a mi. 7 Akulumei suma hleuna a i a djop ala azi i ngui tita yam andagad’a. Malaikana mi dazi ala: Agi i nguyugï tita yam andagad’a. Azi i ngui tita yam andagad’a mi.
8 Malaikana mi yanu, mi dan ala: Suma a i irazi abo ma yam ambas sa abo ma norîd’a, a i tin nayî mana yam suma kur ambas sa abo ma norîd’a.
Avaval la lor ra a kulubut yam Josue-d’a
9 Ma didina mi dan ala: 10 Ang ve kawei ma hapma ki lora abo Heldai, Tobiya ki Jedaya suma a tcholï kur magomba Babilon a mbana. Ang tanga mba i kur bur máma, ang mba i avo hi Josiyas Sofoni goroma; ni yima azi tcholï Babilon a mba kak kuana. 11 Ang yo kawei ma hapma ki lora, ang yorozi avavala, ang kulubut yam ma ngol ma ngat buzuna Josue Josadak goroma. 12 Ang dum ala: Ma didin ma ad’engêm kal petna mi dala:
Sana simiyêm ala Agu ma hud’ura
mba mi hud’urï ata yamu,
mba mi min gong nga kud’ora hi an Ma didinid’a akulo.
13 Mba mi min gong man nda kud’ora akulo,
mba mi tchuk ahle suma subura atamu,
mba mi kak yam zlam mam mba amula á tamula.
Ma ngat buzuna tu mba mi tchol gevemu,
azi djak darigï d’a gagazid’a
mba d’i kak adigaziya.
14 Avavala ti arî vama ge humba kur gong man nda kud’ora yam Heldai, Tobiya ki Jedaya kandjaf ma danana hi Sofoni-na mi.
15 Suma a mba tcholï ata yima deina, a mba le sunda kur gong nga kud’ora hi Ma didinid’a. Kur bur máma agi mba wagi ala ni Ma didin ma ad’engêm kal petna ba, mi sununï gevegiya. Le agi gagi yagi kä ad’u Salad’a Alo magina gagazi ni, ahle ndazina pet a mba le na mi.
© Azumeina Bible © Alliance Biblique du Tchad, 1999.
