1 Amuleina 7 - Azumeina Bible 1999 (MPG)

Salomon mi min gong nga amula hamulîd’a

1 Salomon mi min gong mam mba amula mi. Mi le bizad’a dogo yam hindi mi dap gongîyona minda pet. 2 Mi min gong nga a yat ala Gong nga hagu d’a Liban-nda d’a. Fiyagat ni metred’a dok vahl, bubuwat ni metred’a dok mbà yam vahl, fiyagat ta akulod’a ni metred’a dogo yam vahl mi. Mi minit ni yam agu sedre ma murguli ma djirdid’a fid’ina, mi ndja pateina hagu sedre ma bebed’e ma aduburo’â kat mi. 3 Duguluzud’a hagu sedre ma dok fid’i yam vahlâ, ti ka’î yam djirdi d’a hindid’a, d’a lara ge pî agu mat ma bebed’e ma murgulina ni dogo yam vavahl. 4 Gong nga lara pî ti nga ki fenetred’a djirdid’a hindi hindi kagu matna memet. Fenetre d’a lara pî ngagad’a yam ndrata memet. 5 Bap ma lara pî agu mam ma apeina nabo tam tu, mam mi ngad’a yam ndram ma hindina aduk gagaî.

6 Salomon mi min gonga kagu ma murgulina fiyagat ni metred’a dok mbà yam vahl, bubuwat ni metred’a dogo yam vahl, mi min gong nga djola avun aziyamî kahina d’a murgulid’a.

7 Mi min gonga kua a yat ala Gong nga zlamba, a yat ala Gong nga ka sariyad’a mi, ni yima Salomon mi le sariyad’a kuana. Mi ndja agu sedrena kä andaga dei gak i akulo.

8 Gong nga Salomon mi kak kuruta nata yima dingâ bugol gong nga djol la avun aziyamba. Wani mi min gonga mi Faron gorom mba mi vata ni d’igi gong nga djol la mam minit yam zlambid’a na mi.

9 Salomon mi min aziyam pet ni kahina d’a a manata. Suma a tched’etna a tched’et nabo tat tu, a ngad’at ni ki sï ma kaweina abo hî abo hî, a tinit ad’u kä dei gak i akulo, tinï ad’ud’a ata gulumun ma abuna dei gak mba ata gulumun ma ngolâ. 10 Ad’umba kä d’a a tinit ni kahina d’a nglo d’a djifâ. Ta fiyagat ni metred’a fifid’id’a ti nga, ta fiyagat ni metred’a vavahla ti nga mi. 11 A tin ahina d’a tchet ta djifâ kä ad’uwa a ndja agu sedrena akulo kat mi. 12 Bugol atrang nga ngola a min gulumuna kat kahina d’a a tched’et ta djirdid’a hindid’a, a gägu sedre ma bebed’e ma aduburo’â kat d’igi a le yam atrang nga avun gong nga kud’ora hi Ma didinid’a na, d’igi a le yam gong nga djol la avunata na mi.

Sun nda a hat abo Hiram-mba

(Gol 2 Sun hAm 2.12-13)

13 Sana mi nga avo Tir a yum ala Hiram. Salomon mi mbamï Jerusalem. 14 Hiram mi we suna kawei ma hleuna. Abumî ma Tir-râ, wani asumî d’a Neftali-d’a, natcha d’a modonod’a. Mam mi sama d’al ma wad’ud’a; mi wäd’u sun nda yor kawei ma hleuna djivid’a heî. Kayam ndata, mi mba gen Salomon á min ahlena pet suma mam minizi á led’ina.

Kawei ma hleu ma murgulina

(Gol 2 Sun hAm 3.15-17)

15 Hiram mi yor kawei ma hleu ma murgulina mbà, fiyagam mba akulod’a ni metred’a zlengâ, surumî metred’a karagaya. 16 Mi yor kawei ma hleuna d’igi djumba na mbà, mi tinimzi akulo kamu, d’a lara pî fiyagat ta akulod’a ni metred’a mbà ki nusa. 17 Mi yor kawei ma hleu ma dingâ d’igi abeina na, d’igi erdjena na á d’ud’uzi ata djum mba tud’a kid’iziya kid’iziya. 18 Mi min vama d’igi vud’a grenatna na na djirdid’a mbà, avun kawei ma abeyabei ma a d’ud’um ata djumba akulo yam kawei ma murgulinina, mi le ma yam kawei ma murguli ma mbàna ni na mi.

19 Djum mba yam kawei ma murgulina hi gong nga ndjolinid’a, fiyagat ta akulod’a ni metred’a mbà. Mi lat ni d’igi b’od’a hi tamasid’a na. 20 Wani mi lahlena akulo yam djumba woi hina ngungugudjuk. Ahle ndazina nakulo yam kawei ma abeyabeina ki vud’a grenat ma kikis mbà ma a ndjam huyok djum mba lara ge peta.

21 Hiram mi pe kawei ma hleu ma murgulina mbà avun gong nga djola hi gong nga kud’ora hAlonid’id’a, tu abo ma ndjufâ a yum ala Jakin , tu abo ma gulana a yum ala Bowas mi. 22 Djum mba a lat d’igi b’od’a hi tamasid’a na d’a, mi tinit akulo yam kawei ma hleu ma murgulina. Ni hina ba, Hiram mi dap suna kawei ma murgulina led’a.

Hal ma ngol ma kawei ma hleuna

(Gol 2 Sun hAm 4.2-5)

23 Hiram mi yor hal ma ngol ma kawei ma hleuna ngungul; bubuwamî metred’a vahl, fiyagam mba akulod’a ni metred’a mbà ki nusa, vunam ma dalal ma nguid’a ni metred’a dogo yam vahl mi. 24 A d’udjo kurud’u vira avun hal máma nguyum mbei d’uhl, a ndjar kurud’u vira ad’u djirdid’a mbà, dok mbà kur metre d’a tud’a, dok mbà kur metre d’a tud’a, a d’udjo kurud’u, avir ndata ni ki minda hi halîd’a tu. 25 Hal máma mi tinimî akulo yam amuzlei suma dogo yam mbà suma a yorozi ki kawei ma hleunina. Suma hina hindi irazi ni mbuta abo ma norâ, suma hina hindi irazi nabo ma fladegena, suma hina hindi irazi nabo ma sutna, suma hina hindi irazi nabo ma yorogona, wani arigiyezi ni mbuta abo ma krovona ad’u halâ kä. 26 Aduburoka hi hal mámid’a ni go ki santimetred’a klavandi, vunamî d’igi kopma na, mi lum tamî d’igi b’od’a hi tamasid’a na mi. Hal máma hurum vo lidirâ ni go ki 80.000.

Pus ma kawei ma hleuna

27 Hiram mi yor pus ma kawei ma hleuna dogo; ma lara pî fiyagamî metred’a mbàmbà, bubuwamî metred’a mbàmbà, fiyagam mba akulod’a ni metred’a tutu ki nus nus mi. 28 Minda had’u pusîd’a ba wana: Mi yor kawei ma hleuna bebed’ed’a hina tchüût, mi djinim ki kawei ma nglo ma murguli ma kä ad’una, mi le ma abo hina ni hina dedege mi. 29 Mi d’udjo azlona kamuzleina ki tcherebêna akulo ata kawei ma nglo ma murguli máma, mi d’udjo b’od’a hi tamasid’a ad’u azlona azi kamuzleina kä hina mi. 30 Pus ma lara pî mi nga kasem ma kawei ma hleuna fifid’i. Kawei máma nga ata abom ma fifid’i mama ná vum akulo. Kawei máma vunam nga djinda kabo pusâ ad’u kä bugol ahle suma ndjundjû ndazina. 31 Vunam ma akulona mi ni dalalâ abo tam tu, fiyagam mba akulod’a ni nus metred’a, bubuwamî santimetred’a dok kid’iziya yam vahl mi. Ahle suma d’udjo suma dingâ a nga kua mi. Kawei ma bebed’e ma a minim ad’u pusîna nabo tam tu, nga ni ngungul li. 32 Pusâ abom ma fid’ina mi ni kä ad’u kawei ma bebed’ena, kawei ma ata aboma vunamî djinda ata pusâ. Abom ma lara pî fiyagam mba akulod’a ni santimetred’a dok kid’iziya yam vahl. 33 Abo pus máma a lumî d’igi abo pus ma dur ayîna na. Abom ki zla tam pet ni kawei ma hleu ma a yoroma. 34 Kawei ma fid’i ma ve pusâ akulona, mi ni djinda ata pusâ abom ma fid’ina, mi ni zlapa ki kawei ma atama. 35 Pusâ vunam ma akulona mi ni dalalâ abo tam tu, fiyagam mba akulod’a ni santimetred’a dok mbà yam vahl. Kawei ma a djinim ata vunam ma akulona, mi ni zlapa tu ki pusâ tamba mi. 36 Mi tin tcherebêna kazlona kamulongeîna akulo yam kawei ma bebed’e ma yam ma murguli ma djigim akulona ki ma apei pusîna ata yima ar hawana, b’od’a hi tamasid’a nguyuzi woi d’uhl mi. 37 Pus ma dogo máma ma lara pî a lumî ki kawei ma tu máma, nga mazid’a nabo tat tu, min mazid’a nabo tat tu mi.

38 Hiram mi le yima mbus ma kaweina dogo, mi ndjaram akulo yam pus ma dogo máma. Yima mbus ma lara pî hurumî lidirâ dubu yam kikisa karagaya. Ma lara pî fiyagam mba akulod’a ni metred’a mbà. 39 Mi tin pusâ vahl apei gonga abot ma ndjufâ, ti tin pusâ vahl apei gonga abot ma gulana, mi tin hal ma ngolâ apei gonga abot ma ndjufâ abo ma sutna ngagad’a yam abo ma yorogona.

Ndumba hahle suma a yorozina

(Gol 2 Sun hAm 4.7—5.1)

40 Hiram mi yor hal ma mbusa teteng, mi yor pelâ ki tazana mi. Ni hina ba, Hiram mi dap sun nda amulâ Salomon mi humzi á led’a kur gong nga kud’ora hi Ma didinid’a. 41 Ahle suma Hiram mi yorozina ba wana:

Kawei ma hleu ma murgulina nga ped’a mbà;

Djumba mbà á kulubut yam kawei ma hleu ma murguli máma;

Kawei ma hleu ma iram ndjâna mbà á kulubum yam djum mba nga yam kawei ma hleu ma murgulinid’a;

42 Vud’agu grenatna kikis fid’i nga ndjinda ata kawei ma hleu ma abeyabei ma mbàna, djirdid’a hi vud’agu grenat ma lara pî mbàmbà nga ngapa ata kawei ma hleu ma abeyabei ma nga kulupa akulo yam djumbina;

43 Pusâ dogo;

Hal ma mbusa nga kam akulo dogo;

44 Hal ma ngolâ tu;

Amuzleina dogo yam mbà a nga tchola kä ad’u hal ma ngol máma;

45 Anduru ma yo butna ki pelâ ki tazana mi.

Ahle ndazina pet nahle suma amulâ Salomon mi he vuna mi Hiram kazi á lazi yam gong nga kud’ora hi Ma didinid’ina, mi lazi ni ki kawei ma hleu ma a hegem mbeina. 46 Mi yorozi nata yima kikid’i’â kur hor ra Jurdê-d’a aduk azì ma Sukot-na ki ma Sartan-na. 47 Salomon mi tchuguzi kur gong nga kud’ora hi Ma didinid’a bei mi hlaneka hi kawei ma hleu ma a yorom máma ba, kayam ti kal ablaud’a heî á wed’a.

48 Wana nahle suma lor suma Salomon mi lazi kua yam gong nga kud’ora hi Ma didinid’ina:

Yima ngal dubang ma his djivid’a ma mi lum ki lorina;

Tabul ma a tin avungô ma a tinim iram vam mAlona kam ma mi lum ki lorina;

49 Agu ma a tin lalamba kama dogo ni ki lor ra bei zozota ba d’a, vahl abo ma ndjufâ, vahl abo ma gulana avok yima a tinim iram vam ma kal teglesâ;

B’o aguna, lalamba ki ma deu ma lora;

50 Yima mbus abona teteng nga mangas sa a min ki lalambid’a, tazana, kopma ki yima a ngal ahlena kuana, mi lazi ni ki lora bei zozota ba d’a;

Kawei ma a nik bapma kuana mi lumî ki lora, mi ni yam vun gong nga krovo d’a a kal ki ata yima a tinim iram vam ma kal teglesîna, mi ni yam vun gong nga a kal ki klavi kur gong nga kud’orid’a mi.

51 Kid’a amulâ Salomon mi dap sunda hi gong nga kud’ora hi Ma didinid’a peta, mi yoï kawei ma hapma ki lora kahlena teteng suma abum David mi tinizi irazi vazi mi Ma didinina, mi tchuguzi kur gong nga ngom ndjondjoî d’a kur gong nga kud’ora hi Ma didinid’a.