1 Kur atchogoi mamba, Nebukanezar amul ma Babilon-na mi mba á dur ayîna kandaga d’a Juda-d’a. Jojakim mi ge yam kä ad’um gak biza d’a hindi. Bugola, mi tchol huneîd’a ki sed’emu. 2 Kayam ndata, Ma didina mi sunï azigar suma Babilon-na ki azigar suma Siri-na ki azigar suma Mowap-ma ki azigar suma Amon-na ata Jojakim á b’lak leu d’a Juda-d’a woi d’igi Ma didina mi de zlad’a avun azungeî mam suma djok vuna na.
3 Ahle ndazina a mba hina ni yam vun ma hed’a hi Ma didinina tamba. Mi min dik suma Juda-na woi avoromu, yam tcho d’a pet ta Manase mi lata, 4 yam tchi d’a mi tchi suma bei zlad’a kazina, mi oî Jerusalem ki buzuwazid’a. Ni kayam ndata ba, Ma didina mi min vat hurum mbei d’uo ni na.
5 Sunda hi Jojakim mba ara kahle suma mi lazina pet, a b’irizi nga kä kur Mbaktum mba de zlad’a yam Sunda hAmulei suma Juda-nid’a. 6 Jojakim mi mit mi i azulei kä ad’u abuyom ngolo. Goroma Jojakin mi vrak tamula blangâmu.
7 Wani amul ma Ezipte-na nga mi nde woi abu kur andaga mamba d’i, kayam amul ma Babilon-na mi hle leu mamba pet, tinï ad’ud’a avun toliyon nda Ezipte-d’a dei gak mba avun alum ma Efrat-na.
Jojakin mi tamul yam Juda-na. Yo mazi d’a avoka
(Gol 2 Sun hAm 36.9-10)8 Kid’a Jojakin mi kak amulid’a, bizamî dogo yam klavandi . Mi tamula avo Jerusalem tilâ hindi. Asum a yat ala Nehusta ni Elnatan ma Jerusalem-ma goromba. 9 Jojakin mi le sun nda tchod’a avok Ma didina d’igi abum na. 10 Kur atchogoi ndata, azigarâ hi Nebukanezar amul ma Babilon-na ki mazi suma nglona a mba ata Jerusalem, a nguyud’u. 11 Kid’a azi nguyuta, Nebukanezar tamba mi mba mi. 12 Ata yi máma Jojakin amul ma Juda-na mi nde woi avun azina kasum kazungeî mama ki mam suma nglona ki mam suma a ngom hurazinina, a i famul ma Babilon-na. Mam vum dangeina, ni kur biza d’a klavandi d’a Nebukanezar nga mi tamulid’a. 13 D’igi Ma didina mi de avok na, Nebukanezar mi yo ahle suma a nga kur gong nga ngom ndjondjoî d’a kur gong nga kud’ora hi Ma didinid’ina ki suma nga kur gong nga ngom ndjondjoî d’a kur azina hamulîd’ina pet, mi to ahle suma lor suma Salomon amul ma Israel-lâ mi minizi á le ki sunda kur gong nga kud’ora hi Ma didinid’ina woi pepet mi. 14 Mi yo suma avo Jerusalem-ma magomba, nala, suma nglo suma sunda pet ki suma gangrangâ pet ablawazi ni 10.000 zlapa ki suma d’alâ ki suma tchafa, mi arî suma hohou mazid’a kal lei ndena hol.
15 Mi i ki Jojakin kasum kamiyôma ki mam suma a ngom hurazinina ki suma ad’eng suma Juda-na magomba avo Babilon. 16 Mi i ki suma gangrang suma durâ ablawazi pet ni 7000 zlapa ki suma d’alâ ki suma tchafa ablawazi ni 1000 mi. Azi pet ni suma gangrang suma ndak á dur ayînina. Amul ma Babilon-na mi izi magomba Babilon.
17 Wani Nebukanezar mi hle Mataniya Jojakin abum ma gorâ, mi tinim amula, mi djogom simiyêm ala Sedekiyas.
Sedekiyas mi tamula yam Juda-na
(Gol Jer 52.1-32 Sun hAm 36.11-12)18 Kid’a Sedekiyas mi kak amulid’a, bizamî dok mbà yam tu. Mi tamula avo Jerusalem bizad’a dogo yam tu mi. Asum a yat ala Hamutal ni Jeremi ma Libina-na goromba. 19 Mi le sun nda tchod’a avok Ma didina d’igi Jojakim na. 20 Ndak ndata ti mba hina ni yam zal la Ma didina hurum mi zal yam suma Jerusalem-ma ki suma Juda-nid’a gak mi digizi woi dei avoromu.
Sedekiyas mi tchol huneîd’a kamul ma Babilon-na.
© Azumeina Bible © Alliance Biblique du Tchad, 1999.
