Jeremi 52 - Azumeina Bible 1999 (MPG)

HLE D’A A HLE JERUSALEM-MBA

Nebukanezar mi ve Sedekiyas

1 Kid’a Sedekiyas mi kak amulid’a, bizamî dok mbà yam tu. Mi tamula avo Jerusalem bizad’a dogo yam tu. Asum a yat ala Hamutal ni Jeremi ma Libina-na goromba. 2 Mi le sun nda tchod’a avok Ma didina d’igi Jojakim na. 3 Ahle suma a le ndazina a djiu ayîna hi Ma didinina á kak djangûna ki suma Jerusalem-ma ki suma Juda-na gak mi digizi woi dei avoromu.

Sedekiyas mi tchol huneîd’a kamul ma Babilon-na. 4 Kur biza d’a zlengâ d’a Sedekiyas nga mi tamulid’a, kur bur ma dogona hi til ma dogonina, Nebukanezar amul ma Babilon-na mi mba ki azigar mama pet á dur Jerusalem. A vanguvora avorot d’ar, a nguyut tei d’uhl. 5 Azì ma ngolâ mi ar nguid’a kä gak biza d’a dogo yam tu d’a Sedekiyas nga mi tamulid’a.

6 Kur til ma fid’ina kur bur ma zlengîna hi til mámina, baktara d’a ngola ti nde yam suma kur azì ma ngolîna. Suma kur ambasina a nga fe vama te d’i. 7 Kur bur máma, azigar suma Babilon-na a tcho ir gulumuna hazì ma ngolîna. Suma Juda suma dur ayîna ki zla tazi pet a yo ringâ, a buzuk kei kur azì ma ngolâ kandjege dangâla ki lovot ta avun agrek ma aduk gulumun ma mbànina, go kasinena hamulîna, a hle lovot ta i Araba-d’a. Ata yi máma azigar suma Babilon-na a nga nguid’a yam azina. 8 Wani a dik amulâ Sedekiyas ad’um gak a vumï sä hur ful la Jeriko-d’a. Azigar mama pet a ndjoî woi vivreng, a aramu.

9 Suma Babilon-na a vumu, a im mamul ma Babilon-na avo Ribla yam ambas sa Hamat-ta. Nebukanezar mi kam sariyad’a kam ata yi máma. 10 Mi ngat Sedekiyas groma iram kä na, mi ngat mam suma nglo suma Juda-na woi pet mi. 11 Bugola, mi tcho ir Sedekiyas seyo, mi gum alei ma kawei ma hleuna asem mi im Babilon, mi gum dangeina gak mat mama.

Nebuzaradan mi fat vun b’laka hi Jerusalem-mba woyo

(Gol 2 39.8-102 Amul 25.8-21)

12 Kur biza d’a dogo yam zlengâ d’a Nebukanezar amul ma Babilon-na nga mi tamulid’a, kur til ma vahlâ kur bur ma dogona hi til mámina, Nebuzaradan ma ngolâ hi suma a ngom yina ma kur sunda hamul ma Babilon-nina, mi mba mi kal avo Jerusalem. 13 Mi ngal gong nga kud’ora hi Ma didinid’a kazì ma amula kazì ma ding ma Jerusalem-ma pet, mi ngal azì ma nglo ma dingâ woi kakud’a pepet mi. 14 Azigar suma Babilon-na pet suma a nga zlapa ki ma ngolâ hi suma a ngom yinina, a hô gulumun ma ngui Jerusalem-ma kä woi ki zla tam pepet.

15 Ata yi máma Nebuzaradan ma ngolâ hi suma a ngom yinina, mi yo suma kid’ak suma a ar kur azì ma ngolina ki suma a i ad’u amul ma Babilon-nina zlapa ki suma d’al suma a arâ mi. 16 Wani mi he lovota mi suma hou suma aduk suma kur ambasina á ngom guguzlud’a, á zuma mi.

17 Suma Babilon-na a kus kawei ma murguli ma mbà ma hleu ma kur gong nga kud’ora hi Ma didinid’ina ki kawei ma hleu ma ad’um kä na ki hal ma ngol ma kawei ma hleuna suma a nga kur gong ndatina woyo, a i ki sed’ezi Babilon pet. 18 A yo ahle suma a lazi ki kawei ma hleunina pet suma a nga le sunda ki sed’ezi kur gong ndatina, nala, duguyona, pelâ, mbuguyona, anguleina ki kopma mi. 19 Ma ngolâ hi suma a ngom yinina, mi yo ahlena kua, nala, halâ, andru ma vakud’a, anguleina, duguyona, agu lalamba, kopma ki tazana. Ahle ndazina pet a lazi ni ki lora ki kawei ma hapma.

20 Kawei ma murgulina mbà ki hal ma ngolâ tu kamuzlei suma dogo yam mbà suma kä ad’u halâ suma amulâ Salomon mi lazi adjeu ki kawei ma hleuna mi tinizi kur gong nga kud’ora hi Ma didinid’ina, sana mi ndak á ngazi anek mazid’a d’i. 21 Kawei ma murguli ma lara pî, fiyagam mba akulod’a ni metred’a zlengâ, ziyo ma a nguyum ki na ni metred’a karagaya, bubuwamî santimetred’a klavandi, adigamî zula mi. 22 Yam mba a kat djumbid’a ti nga kam akulo mi. Fiyagat ta akulod’a ni metred’a mbà ki nusa. A nguyut yam mba djum ndata ki kawei ma abeyabeina ki vud’agu grenatna woi d’uhl. A lazi djak nabo tazi tu. 23 Vud’agu grenat ma ata kawei ma abeyabeina abom ma fid’inina ni dok zlengâ yam karagaya. Vud’agu grenat ma ata kawei ma abeyabei ma nguyum mbei d’uhlâ ni kis.

24 Ma ngolâ hi suma a ngom yinina mi ve ma ngol ma ngat buzuna Seraya ki Sofoni ma kam á mbàd’ina ki suma hindi suma a ngom vun gong nga kud’ora hi Ma didinid’ina mi. 25 Mi ve ma ngol ma yam azigarâ hi suma Juda-nina, mi yo suma kid’iziya suma d’al suma a le sunda mamulâ suma kur Jerusalem-ma, mi ve ma b’ir mbaktumba hi ma ngolâ hi azigar ma mi yo suma azigarîna, mi yo suma Juda-na dok karagaya suma a nga avo Jerusalem-ma, 26 mi i ki sed’ezi gen amul ma Babilon-na avo Ribla. 27 Amulâ mi tchazi woi ata yi máma yam ambas sa Hamat-ta.

Ni hina ba, a i ki suma Juda-na magomba woi dei kambas mazid’a.

28 Wana ni ndumba hi suma Juda suma Nebukanezar mi yozi magombina:

Kur biza d’a kid’iziyad’a a ni 3023.

29 Kur biza d’a dogo yam klavandi d’a Nebukanezar nga mi tamulid’a, mi yo suma avo Jerusalem mi 832.

30 Kur biza d’a dok mbà yam hindi d’a Nebukanezar nga mi tamulid’a, Nebuzaradan ma ngolâ hi suma a ngom yinina, mi yo suma Juda-na magomba 745. Azi pet ni 4600.

Amul ma Babilon-na mi we hohowa Jojakin

(Gol 2 Amul 25.27-30)

31 Kur biza d’a dok hindi yam kid’iziya d’a bugol la a i ki Jojakin amul ma Juda-na magombid’a, Evil-Merodak mi kak amula yam suma Babilon-na. Kur biza d’a avok ka mi tamulid’a, kur bur ma dok mbà yam kid’iziyana kur til ma dogo yam mbàna hi biza ndatina, mi we hohowa Jojakin, mi ndumî woi kur dangeina. 32 Mi dum zlad’a ki djivid’a, mi hum ngola avok amulei suma a nga ki sed’em avo Babilon-na pet mi. 33 Mi he vuna mi Jojakin ala ar mi tchuk baru ma dangeina atam mbi, ar mi te tena yam tabulâ hamulîna burâ ki burâ ata yima mi nga ki iram tua na pet. 34 Amul ma Babilon-na mi nga mi hum tena burâ ki burâ gak mat mama ata yima mam nga ki irama pet mi.