2 Samuel 5 - Azumeina Bible 1999 (MPG)

DAVID NGA MI TAMULA YAM ANDJAFÂ HI ISRAEL-LÎNA PET

(a) DAVID MI TIN AD’UD’A Á TAMULA

Israel-lâ pet a tin David amula avo Hebron

1 Andjaf Israel-lâ pet a mba gen David avo Hebron, a dum ala: Ami ni simiyêngû, ami ni hliwing mi. 2 Avok ka Saul nga tamula kami tua d’a, ni ang ba, i ki Israel-lâ á durâ, ang hulong ki sed’ezi mi. Ma didina mi dang ala: Ni ang ba, mba pol man suma Israel-lâ, ang mba kak amulâ hi Israel-lîna mi.

3 Ni hina ba, suma nglo suma Israel-lâ pet a mba gen amulâ David avo Hebron. David mi djin vunam ki sed’ezi avok Ma didina avo Hebron. Azi manam a tinim amula yam Israel-lâ. 4 Kid’a David mi tamulid’a, bizamî dok hindi; mi tamula bizad’a dok fid’i. 5 Mi tamula avo Hebron yam suma Juda-na bizad’a kid’iziya ki tilâ karagaya, mi tamula avo Jerusalem yam Israel-lâ ki suma Juda-na pet bizad’a dok hindi yam hindi mi.

David mi hle Jerusalem

(Gol 1 Sun hAm 11.4-91 14.1-2)

6 Amulâ David ki sum mama a i á dur Jerusalem. Suma Jebus suma a nga kaka kur ambas ndatina, a de mi David ala: Ang mba kal ka hî d’i, kayam ni suma duka ki suma dileîd’a tazi go ba, a mba diging ngeyo! A de nala: David mba mi kal ka hî d’i! 7 Wani David mi kus yam azì ma ad’eng ma ngungu ma Siyon-na; yi máma mi arî Azì ma ngolâ hi David-na.

8 Kur bur máma David mi dala: Nge nge pî ma min dur Jebus-sâ, mbeî mi kalî kur b’irlim ma djang mbina kä ad’u andagad’ina á tchi suma duka ki suma dileî suma an David ni noyôzina woyo! Ni kayam ndata ba, a nga dala. Suma duka ki suma dileîd’a a mba kal kur gong nga kud’ora hi Ma didinid’a d’i.

9 David mi ar kaka kur azì ma ad’eng ma ngungu máma, mi yum ala Azì ma ngolâ hi David-na. Mi nguyum mbei ki gulumun ma minda, tinï ad’ud’a bugol Milo dei gak krovo mi. 10 David simiyêm nga mi yï avogovogo; Ma didina Alo ma ad’engêm kal petna mi nga ki sed’emu.

11 Hiram amul ma Tir-râ, mi sunï suma gen David kagu sedrena, zlapa ki suma tchet aguna ki suma tchet ahinad’a á min gong nga amula mi David. 12 David mi wala Ma didina nga mi siram á tamula yam Israel-lâ, amul mamba nga d’i i avogovok yam mam suma Israel-lâ mi.

David grom suma mi vud’uzi avo Jerusalem-ma

(Gol 1 Sun hAm 3.5-91 14.3-7)

13 Kid’a David mi arza Hebron ndei mi mba Jerusalem-mba, mi vik arop suma gureina karop suma dingâ kua, mi vut gro andjofâ ki gro aropma. 14 Wana ni grom suma mi vud’uzi avo Jerusalem-ma: Samuwa, Sobap, Natan ki Salomon, 15 Jibar, Elisuwa, Nefek ki Jafiya, 16 Elisama, Eliyada ki Elifelet.

David mi kus yam Filistê-na

(Gol 1 Sun hAm 14.8-16)

17 Kid’a suma Filistê-na a hum ala a tina wa David amula yam Israel-lâ d’a, azigar mazina a i á vumu. David mi huma, mi i kal kur azì ma ad’eng ma mi nguyum ki gulumunina. 18 Suma Filistê-na a mba ndjar kä woi kur hor ra Refa-d’a. 19 David mi djop Ma didina ala: An i dur ayîna ki suma Filistê-na zu? Ang mba handji abon ndju?

Ma didina mi de mi David ala: Ang iya! An mba ni hangzi abongû.

20 David mi mba Bäl-Perasim. Ata yi máma mi kus kaziya, mi dala: Ma didina mi mal lovota aduk man suma djangûna d’igi mbiyona mi hulut damana na. Ni kayam ndata ba, a yi yi máma ala Bäl-Perasim . 21 Suma Filistê-na a ar filei mazina teteng ngei ata yi máma; David ki sum mama a yomîya.

22 Suma Filistê-na a hulongî kua d’ei, a ndjar kä woi kur hor ra Refa-d’a. 23 David mi djop Ma didina kua. Ma didina mi hulong dum ala: Ang i d’i. Ang mbud’ï blogoziya, ang tezezi ngagad’a yam agu murâ teteng. 24 Le ang hum asem ma tita nga mi tchi akulo hum agu murâ ni, ang b’at tang atogo. Ni an Ma didina ba, nga ni tit avorong á dur azigarâ hi Filistê-nina.

25 David mi le d’igi Ma didina mi hum vuna na, mi dur suma Filistê-na, tinï ad’ud’a Geba dei gak mba Gezer.