Ester 3 - Azumeina Bible 1999 (MPG)

HAMAN NGA MI HAL LOVOTA Á TCHI JUIF-FÂ WOYO

Zlad’a nga aduk Haman azi ki Mardose

1 Bugol ahle ndazina, amulâ Asuwerus mi tin Haman Hamedata ma Aga’â goroma ngola yam mam suma nglo suma kal tegles suma a nga le sunda zlapa ki sed’ema. 2 Suma a nga le sunda avo hamulîna pet, a nga grif kä avok Haman á kud’uromu, kayam amulâ mi he vuna kam hina. Wani Mardose nga mi grif kä avorom mboze mi kud’urom mbuo mi. 3 Suma a nga le sunda avo hamulîna, a de mi Mardose ala: Ni kayam me ba, ang tchila yam vun ma hed’a hamulîna na ge? 4 Burâ ki burâ azi nga dum hina, wani mam nga mi humuzi d’i. Azi i de zla ndata mi Haman, na ni Mardose mba mi i avogovok ki zla mam ndata hina zu? Kayam Mardose mi dazi ala mam mi ma Juif-fâ. 5 Ata yima Haman mi wala Mardose nga mi grif kä avorom á kud’urom mbuo na, mi mbut ayîna.

6 Ata yi máma mi nga hurum á tchi Mardose, wan pî, ndagam nga d’i, kayam a dum ala: Mardose ni ma Juif-fâ. Ni kayam ndata ba, mi nga hurum á dap Mardose b’oziyom Juif suma a nga yam ambasa hamulâ Asuwerus-sina woi pet. 7 Kur til ma avok ma a yum ala Nisan-na, kur biza d’a dogo yam mbà d’a Asuwerus nga mi tamulid’a, a nde le pur-râ, nala, togina, avok Haman burâ ki burâ, gak mba mi nde kur til ma dogo yam mbà ma a yum ala Adar-râ.

Haman mi min tam á dap andjaf Juif-fâ woyo

8 Haman mi de mamulâ Asuwerus ala: Andjaf suma dingâ a nga. A b’rau nga woi aduk suma kur ambas mangina pet, gat mazid’a ni vat zenen ki d’a hi suma pet, a nga tit yam gat manga d’uo mi. Le ang arazi hawa na ni, djivi mata ni me ge? 9 Le ang mina ni, ang he vuna, ang b’ir mbaktumba á tchazi woyo, an mba ni nga bege d’a hapa tonna kikis hindi mi suma sunda á tchugut kur gong nga ngom ahlena hamulîd’a.

10 Amulâ mi pat ngangam ma aboma, mi hum mi Haman Hamedata ma Aga’â gorom ma djangûna hi Juif-fîna.

11 Amulâ mi de mi Haman ala: An arang beged’a ki sum ndazina pet nabongû; ang le vama hurung minima.

12 Kur bur ma dogo yam hindina hi til ma avo’îna, a yï suma b’ir mbaktum suma kur leu mambina. A b’ir mbaktumba ni ki vun ma hed’a hi Haman-na mi suma nglona hamulîna ki suma te yam suma kur ambas sa lara ge, mi suma nglo suma kal tegles suma lara ge, kur ambas sa lara ge pet. A b’irit mi nge nge pî ki b’ir mamba ki vun mam ma ded’a. A b’irit ni ki simiyê amulâ Asuwerus, a tum tampong mama kua mi. 13 A sun mbaktumba abo suma sunda yam ambas sa amulâ nga mi te kata pet ala: A i b’lak Juif-fâ woyo, a tchazi woyo, a dabazi woi pet, nala, azungeîna, momorogeina, kemba karopma kur bur ma tuna, nala, kur bur ma dogo yam hindina hi til ma dogo yam mbà ma a yum ala Adar-râ, ar a hurumuzi ahligiyezi mi.

14 A b’rau mbaktum ndata woi kur ambas sa lara ge pet, a tchi wala woi mi suma pet, kayam a min tazi yam bur ma ngama. 15 Suma sunda a buzuk a i ki vun ma hed’a hamulîna atogo zak, suma dingâ a tchi wal zla ndata kur azì ma Sus-sâ mi. Ata yima amulâ ki Haman a kak kä á tched’ina, suma kur azì ma ngol ma Sus-sâ djib’erezi b’lak ngola.