دَاوُد درّجوه ملك
1 وَ كُلَّ بَنِي إِسْرَائِيلْ جَوْا لِدَاوُدْ فِي حِبْرُونْ وَ قَالَوْا لَيَّهْ: «شِيفْ! أَنِحْنَ مِنْ دَمَّكْ وَ لَحَمَكْ. 2 زَمَانْ وَكِتْ شَاوُولْ مَلِكْ، إِنْتَ قَاعِدْ تُقُودْ دَيْش بَنِي إِسْرَائِيلْ. وَ فِي الْوَكِتْ دَاكْ بَسْ، اللّٰهْ إِلٰـهَكْ قَالْ لَيْك: ‹إِنْتَ تَبْقَى رَاعِي لِشَعَبِي بَنِي إِسْرَائِيلْ وَ تَحْكِمْ فَوْقهُمْ.›»
3 وَ فِي شَانْ دَا، كُلَّ شُيُوخْ بَنِي إِسْرَائِيلْ جَوْا لِدَاوُدْ فِي حِبْرُونْ وَ هُو سَوَّى مَعَاهُمْ مُعَاهَدَةْ قِدَّامْ اللّٰهْ. وَ هُمَّنْ مَسَحَوْه وَ دَرَّجَوْه مَلِكْ فِي بَنِي إِسْرَائِيلْ حَسَبْ كَلَامْ اللّٰهْ الْقَالَهْ زَمَانْ بِوَاسِطَةْ صَمُوِيلْ.
دَاوُد شال مدينة أُورُشَلِيم
4 وَ يَوْم وَاحِدْ، دَاوُدْ وَ كُلَّ بَنِي إِسْرَائِيلْ مَشَوْا أُورُشَلِيمْ. وَ فِي الْوَكِتْ دَا، الْحِلَّةْ دِي أُسُمْهَا يَبُوسْ وَ الْيَبُوسِيِّينْ بَسْ سَاكْنِينْ فِيهَا. 5 وَ الْيَبُوسِيِّينْ قَالَوْا لِدَاوُدْ: «إِنْتَ مَا تَقْدَرْ تَدْخُلْ فِي الْحِلَّةْ دِي.» وَ لَاكِنْ دَاوُدْ شَالْ بَكَانْهُمْ الْقَوِي الْأُسْمَهْ صَهْيُون. وَ بَيْدَا، سَمَّوْا الْبَكَانْ دَا مَدِينَةْ دَاوُدْ. 6 وَ قُبَّالْ مَا يِشِيلْ الْبَكَانْ دَا، دَاوُدْ قَالْ: «النَّادُمْ الْيُقُمّ أَوَّلْ وَ يَهْجِمْ الْيَبُوسِيِّينْ، أَنَا نِدَرِّجَهْ قَايِدْ الدَّيْش.» وَ خَلَاصْ فِي الْبَكَانْ دَا، يُوَابْ وِلَيْدهَا لِصَرُويَةْ هَجَمَاهُمْ أَوَّلْ وَ هُو بِقِي قَايِدْ الدَّيْش.
7 وَ دَاوُدْ سَكَنْ فِي الْبَكَانْ الْقَوِي دَا. وَ أَشَانْ دَا بَسْ، سَمَّوْا الْبَكَانْ دَا مَدِينَةْ دَاوُدْ. 8 وَ هُو وَسَّعْ الْحِلَّةْ مِنْ أَيِّ جِيهَةْ وَ دَا مِنْ دُرْدُرْ الدِّفَاعْ السَّمَّوْه مِلُّو لَحَدِّي حَوَالَيْهَا. وَ يُوَابْ كَمَانْ جَدَّدْ الْبَاقِي هَنَا الْحِلَّةْ. 9 وَ قُدْرَةْ دَاوُدْ قَاعِدَةْ تِزِيدْ بِزِيَادَةْ أَشَانْ اللّٰهْ الْقَادِرْ قَاعِدْ مَعَايَهْ.
الفُرّاس المعْروفين هنا دَاوُد
10 دَاهُو كُبَارَاتْ فُرَّاسْ دَاوُدْ السَّاعَدَوْه مَرَّةْ وَاحِدْ فِي كُلَّ وَكِتْ مُلْكَهْ. وَ هُمَّنْ مَعَ كُلَّ بَنِي إِسْرَائِيلْ دَرَّجَوْه مَلِكْ حَسَبْ كَلَامْ اللّٰهْ فِي بَنِي إِسْرَائِيلْ. 11 وَ دَاهُو أَسَامَيْ فُرَّاسْ دَاوُدْ.
الْأَوَّلَانِي يَشَبْعَامْ وِلَيْد نَادُمْ وَاحِدْ مِنْ حِلَّةْ حَكْمُونْ وَ هُو قَايِدْ مَجْمُوعَةْ التَّلَاتِينْ. وَ هُو بَسْ الْبِحَرِبْتَهْ كَتَلْ 300 رَاجِلْ فِي الدُّوَاسْ فِي يَوْم وَاحِدْ.
12 وَ التَّانِي أَلِعَازَرْ وِلَيْد دُودُو مِنْ حِلَّةْ أَخُوخْ. هُو كُلَ فَارِسْ مِنْ الْفُرَّاسْ التَّلَاتَةْ. 13 وَ هُو بَسْ الْمَشَى مَعَ دَاوُدْ فِي فَاسْ دَمِّيمْ وَكِتْ الْفِلِسْطِيِّينْ لَمَّوْا لِلْحَرِبْ. وَ فِي الْبَكَانْ دَا، فِيَّهْ زَرَعْ هَنَا قَمَحْ أَبْيَضْ وَ رُجَالْ بَنِي إِسْرَائِيلْ عَرَّدَوْا مِنْ الْفِلِسْطِيِّينْ. 14 وَ كَرَسَوْا فِي لُبّ الزَّرَعْ وَ بَعَدْ دَا، مَرَقَوْا وَ حَارَبَوْهُمْ لِلْفِلِسْطِيِّينْ. وَ اللّٰهْ أَنْطَى نَصُرْ كَبِيرْ لِبَنِي إِسْرَائِيلْ.
15 وَ يَوْم وَاحِدْ، تَلَاتَةْ مِنْ الْفُرَّاسْ التَّلَاتِينْ هَنَا دَاوُدْ جَوْا لِقَوْه لِدَاوُدْ فِي كَرْكُورْ عَدُلَّامْ. وَ فِي الْوَكِتْ دَا، مُعَسْكَرْ الْفِلِسْطِيِّينْ قَاعِدْ فِي وَادِي رَفَايِينْ. 16 وَ دَاوُدْ قَاعِدْ فِي بَكَانَهْ الْقَوِي. وَ الْفِلِسْطِيِّينْ كَمَانْ قَاعِدِينْ فِي مُعَسْكَرْهُمْ فِي بَيْت لَحَمْ. 17 وَ طَوَّالِي دَاوُدْ أَتْمَنَّى وَ قَالْ: «يَاتُو يِجِيبْ لَيِّ أَلْمِي نَشْرَبْ مِنْ الْبِيرْ الْقَاعِدَةْ فِي مَدَخَلْ بَيْت لَحَمْ؟» 18 وَ خَلَاصْ الْفُرَّاسْ التَّلَاتَةْ دَوْل مَشَوْا دَخَلَوْا فِي مُعَسْكَرْ الْفِلِسْطِيِّينْ، شَالَوْا أَلْمِي مِنْ الْبِيرْ الْقَاعِدَةْ فِي مَدَخَلْ بَيْت لَحَمْ، جَابَوْه وَ أَنْطَوْه لِدَاوُدْ. وَ لَاكِنْ هُو أَبَى مَا يَشَرْبَهْ وَ قَدَّمَهْ هَدِيَّةْ شَرَابْ لِلّٰهْ. 19 وَ قَالْ: «إِسْتَغْفَرْ اللّٰهْ! أَبَداً مَا نِسَوِّي شَيّءْ مِثِلْ دَا! مَا نَقْدَرْ نَشْرَبْ مِنْ الْأَلْمِي دَا أَشَانْ هُو مِثِلْ دَمّ الرُّجَالْ الْمَشَوْا جَابَوْه بِتَمَنْ حَيَاتْهُمْ. أَيْوَى! بِتَمَنْ حَيَاتْهُمْ بَسْ هُمَّنْ جَابَوْا الْأَلْمِي دَا.» وَ دَاوُدْ أَبَى مَا يَشْرَبْ الْأَلْمِي دَا. وَ دَا الشَّيّءْ السَّوَّوْه الْفُرَّاسْ التَّلَاتَةْ دَوْل.
20 وَ أَبِشَايْ أَخُو يُوَابْ هُو بَسْ قَايِدْ التَّلَاتَةْ. وَ يَوْم وَاحِدْ، هُو بَسْ بِحَرِبْتَهْ كَتَلْ 300 رَاجِلْ. وَ أُسْمَهْ بِقِي طَالِعْ أَمْبَيْن الْفُرَّاسْ التَّلَاتَةْ دَوْل. 21 وَ هُو لِقِي شَرَفْ زِيَادَةْ مِنْ التِّنَيْن وَ هُو بِقِي قَايِدْهُمْ. وَ مَا فِي الْيُفُوتَهْ أَمْبَيْن الْفُرَّاسْ التَّلَاتَةْ.
22 وَ بَنَايَا الْمِنْ حِلَّةْ قَبْصِيلْ، هُو وِلَيْد يَهُويَدَعْ رَاجِلْ وَاحِدْ فَحَلْ. وَ بَنَايَا دَا، هُو ذَاتَهْ فَحَلْ وَ شَدِيدْ. دَا هُو الْكَتَلْ رُجَالْ إِتْنَيْن فَحَلِينْ هَنَا بَلَدْ مُوَابْ. وَ يَوْم وَاحِدْ وَكِتْ التَّلَجْ نَزَلْ، هُو دَخَلْ فِي نُقْرَةْ وَ كَتَلْ دُودْ. 23 وَ بَتَّانْ هُو بَسْ كَتَلْ مَصْرِي الطُّولَهْ يِسَاوِي 5 دُرَاعْ وَ عُودْ حَرِبْتَهْ قَدُرْ مُرْدَاسْ اللِّقْدَابَةْ. وَ بَنَايَا مَشَى لَيَّهْ هَجَمَهْ بِعَصَاةْ وَ قَلَعْ مِنَّهْ حَرِبْتَهْ وَ كَتَلَهْ بَيْهَا. 24 وَ دَوْل الْأَعْمَالْ السَّوَّاهُمْ بَنَايَا وِلَيْد يَهُويَدَعْ وَ أُسْمَهْ بِقِي طَالِعْ مِثِلْ الْفُرَّاسْ التَّلَاتَةْ. 25 وَ هُو لِقِي شَرَفْ زِيَادَةْ مِنْ التَّلَاتِينْ وَ لَاكِنْ مَا لِحِقْ التَّلَاتَةْ. وَ دَاوُدْ خَطَّاهْ مَسْؤُولْ حَرَسَهْ.
26 وَ دَاهُو رُجَالْ فُرَّاسْ آخَرِينْ هَنَا دَاوُدْ.
عَسَاحِيلْ أَخُو يُوَابْوَ أَلِحَنَانْ وِلَيْد دُودُو مِنْ بَيْت لَحَمْ27 وَ شَمُّوتْ مِنْ حِلَّةْ هَرُورْوَ حَالَصْ مِنْ حِلَّةْ فَلُونْ28 وَ عِيرَا وِلَيْد عِقَيْش مِنْ حِلَّةْ تَقُوعَةْوَ أَبِعَازَرْ مِنْ حِلَّةْ عَنَتُوتْ29 وَ سِبَّكَايْ مِنْ حِلَّةْ حُوشَىوَ عِلَايْ مِنْ حِلَّةْ أَخُوخْ30 وَ مَهْرَايْ مِنْ حِلَّةْ نَطُوفَاوَ خَالِدْ وِلَيْد بَعَنَى مِنْ حِلَّةْ نَطُوفَا31 وَ إِتَّايْ وِلَيْد رِيبَايْ مِنْ حِلَّةْ قِبَيْعَةْ مِنْ قَبِيلَةْ بَنْيَامِينْوَ بَنَايَا مِنْ حِلَّةْ فِرْعَتُونْ32 وَ حُورَايْ مِنْ وَادِي قَعَشْوَ أَبِيِيلْ مِنْ حِلَّةْ عَرَبَةْ33 وَ عَزْمَاوَتْ مِنْ حِلَّةْ بَحَرُومْوَ أَلِيَحْبَا مِنْ حِلَّةْ شَعَلْبُونْ34 وَ أَوْلَادْ هَاشِمْ مِنْ حِلَّةْ قِزُونْوَ يُونَتَانْ وِلَيْد شَاقِي مِنْ حِلَّةْ هَرَارْ35 وَ أَخِيَامْ وِلَيْد سَاكَرْ مِنْ حِلَّةْ هَرَارْوَ أَلِفَالْ وِلَيْد أُورْ36 وَ حِيفَرْ مِنْ حِلَّةْ مَكِيرَةْوَ أَخِيَّا مِنْ حِلَّةْ فَلُونْ37 وَ حَصْرُو مِنْ حِلَّةْ كَرْمَلْوَ نَعَرَايْ وِلَيْد أَزْبَايْ.38 وَ يُوِيلْ أَخُو نَاتَانْوَ مِبْحَارْ وِلَيْد هَاقْرِي39 وَ سَلَخْ الْعَمُّونِيوَ نَحْرَايْ مِنْ حِلَّةْ بِيرُوتْ هُو الشَّايِلْ سِلَاحْ يُوَابْ وِلَيْدهَا لِصَرُويَةْ40 وَ عِيرَا وَ قَارِبْ كُلُّهُمْ مِنْ عَايِلَةْ يِتْرِي41 وَ أُرِيَّا الْحِتِّيوَ زَبَادْ وِلَيْد أَحْلَايْ42 وَ عَدِينَا وِلَيْد شِيزَا شَيْخ خَشُمْ بَيْت رَأُوبِينْ وَ مَعَايَهْ 30 عَسْكَرْ43 وَ حَنَانْ وِلَيْد مَعَاكَةْوَ يُشَافَاطْ مِنْ حِلَّةْ مِتَنْ44 وَ عُزِّيَّا مِنْ حِلَّةْ عَشْتَرُوتْوَ شَمَعْ وَ يَعِيِيلْ أَوْلَادْ حُوتَامْ مِنْ حِلَّةْ عَرُوعِرْ45 وَ يَدِيَعِيلْ وِلَيْد شِمْرِي وَ أَخُو يُوحَا مِنْ حِلَّةْ تِيصِي46 وَ أَلِيِيلْ مِنْ حِلَّةْ مَحَوَةْوَ يَرِبَايْ وَ يُشَوْيَا أَوْلَادْ أَلِنَاعَمْوَ يِتْمَا مِنْ بَلَدْ مُوَابْ47 وَ أَلِيِيلْ وَ عُبَيْد وَ يَعْسِيِيلْ مِنْ حِلَّةْ صُوبَةْ.© La Bible en arabe tchadien © Alliance biblique du Tchad, 2019
