اللّه يخبِّر بيوم النِهاية
1 وَ اللّٰهْ حَجَّى لَيِّ وَ قَالْ: 2 «أَسْمَعْ، يَا إِبْن آدَمْ! دَاهُو اللّٰهْ الرَّبّ حَجَّى لِسُكَّانْ بَلَدْ إِسْرَائِيلْ وَ قَالْ: ‹دِي هِي النِّهَايَةْ! النِّهَايَةْ تَجِي فِي الْأَرْبَعَةْ جِيهَاتْ هَنَا الْبَلَدْ. 3 وَ هَسَّعْ، جَاتْ نِهَايِتْكُو إِنْتُو. أَنَا نِرَسِّلْ غَضَبِي ضِدُّكُو وَ نِحَاكِمْكُو حَسَبْ دَرِبْكُو الشِّلْتُوهْ وَ نِحَمِّلْكُو نَتِيجَةْ عَمَلْكُو الْمُحَرَّمْ. 4 وَ مَا نِشِيفْكُو بِعَيْن الرَّحْمَةْ وَ لَا نِحِنّ فَوْقكُو أَشَانْ نِحَمِّلْكُو نَتِيجَةْ دَرِبْكُو الشِّلْتُوهْ وَ كُلَّ عَمَلْكُو الْمُحَرَّمْ يَقْعُدْ فِي أُسُطْكُو. وَ بَيْدَا، تَعَرْفُوا كَدَرْ أَنَا بَسْ اللّٰهْ.›»
5 وَ دَاهُو اللّٰهْ الرَّبّ قَالْ: «مَصِيبَةْ، مَصِيبَةْ الْمَا فِي مِثِلْهَا، دِي هِي جَايَةْ! 6 النِّهَايَةْ جَايَةْ! أَيْوَى، النِّهَايَةْ هِي جَايَةْ. هِي قَمَّتْ ضِدُّكُو وَ دِي هِي جَايَةْ! 7 وَ عِقَابْكُو جَايِ، يَا سُكَّانْ الْبَلَدْ! وَكِتْكُو جَايِ، الْيَوْم قَرَّبْ وَ دَا يَوْم هَنَا بَرْجَالْ وَ مَا هَنَا فَرَحْ فِي الْجِبَالْ. 8 وَ هَسَّعْ، قَرِيبْ نِنَزِّلْ غَضَبِي فَوْقكُو مِنْ بِدَايْتَهْ لَحَدِّي نِهَايْتَهْ. وَ نِحَاكِمْكُو حَسَبْ دَرِبْكُو الشِّلْتُوهْ وَ نِحَمِّلْكُو نَتِيجَةْ كُلَّ عَمَلْكُو الْمُحَرَّمْ. 9 وَ مَا نِشِيفْكُو بِعَيْن الرَّحْمَةْ وَ لَا نِحِنّ فَوْقكُو أَشَانْ نِحَمِّلْكُو حَسَبْ دَرِبْكُو الشِّلْتُوهْ وَ كُلَّ عَمَلْكُو الْمُحَرَّمْ يَقْعُدْ فِي أُسُطْكُو. وَ بَيْدَا، تَعَرْفُوا كَدَرْ أَنَا اللّٰهْ بَسْ ضَرَبْتُكُو.
10 «وَ دَاهُو الْيَوْم، دَاهُو عِقَابْكُو جَايِ! الْعُنُفْ زَادْ وَ الْإِسْتِكْبَارْ كِتِرْ. 11 وَ الْعُنُفْ قَمَّ وَ بِقِي عَصَاةْ هِنْت فَسَالَةْ. مَا فِي شَيّءْ يِفَضِّلْ مِنْهُمْ وَ حَرَكَتْهُمْ كُلَ تِنْقَطِعْ وَ كَتَرَتْهُمْ وَ جَمَالْهُمْ كُلَ يَبْقَوْا مَا فِيهُمْ. 12 وَكِتْكُو جَايِ، الْيَوْم قَرَّبْ! خَلِّي الْيَشْرِي مَا يَفْرَحْ وَ الْيِبِيعْ مَا يَحْزَنْ أَشَانْ الْغَضَبْ الشَّدِيدْ يِدَمِّرْ كُلَّ نَاسْ الْبَلَدْ. 13 وَ الْيِبِيعْ مَا يِقَبِّلْ لِبُضَاعْتَهْ حَتَّى كَانْ هُو حَيّ كُلَ. أَشَانْ رُؤْيَةْ الْمُحَاكَمَةْ دِي كُلَ مَا تَفْشُلْ، هِي ضِدّ كُلَّ نَاسْ الْبَلَدْ. وَ أَيِّ نَادُمْ يِعِيشْ فِي خَطَايَهْ وَ أَبَداً مَا يَقْدَرْ يِنَجِّي نَفْسَهْ. 14 كَنْ يَضُرْبُوا الْبُوقْ وَ يِجَهُّزُوا سِلَاحْهُمْ كُلَ، نَادُمْ وَاحِدْ كُلَ مَا يَمْشِي لِلْحَرِبْ أَشَانْ غَضَبِي يِدَمِّرْ كُلَّ نَاسْ الْبَلَدْ.
اللّه يقُمّ ضِدّ بني إسرائيل
15 «بَرَّا فِي الْكَدَادَةْ، حَرِبْ! وَ دَاخَلْ فِي الْمَدِينَةْ، وَبَاءْ وَ جُوعْ! أَيِّ نَادُمْ الْفِي الْكَدَادَةْ يُمُوتْ بِالْحَرِبْ وَ أَيِّ نَادُمْ الْفِي الْمَدِينَةْ يُمُوتْ بِالْوَبَاءْ وَ الْجُوعْ. 16 وَ الْفَضَّلَوْا مِنْهُمْ يِعَرُّدُوا وَ يَجْرُوا يِلَّبَّدَوْا فِي الْجِبَالْ. وَ كُلُّهُمْ يَبْكُوا بِحِزِنْ مِثِلْ قِمْرِيْ الْوَادِي بِسَبَبْ خَطَاهُمْ.
17 كُلَّ إِيدَيْهُمْ يِنْرَخُوا
وَ كُلَّ رِكَبُّهُمْ يُمُوعُوا.
18 وَ يَلْبَسَوْا خُلْقَانْ الْحِزِنْ
وَ خَوْف شَدِيدْ يَكْرُبْهُمْ.
وَ الْعَيْب بِنْشَافْ فِي وُجُوهُّمْ
وَ كُلَّ رُوسَيْهُمْ، يِزَيُّنُوهُمْ.
19 وَ يَزْقُلُوا فُضِّتْهُمْ فِي الشَّوَارِعْ
وَ دَهَبْهُمْ يَبْقَى لَيْهُمْ مِثِلْ نَجَاسَةْ.
دَهَبْهُمْ وَ فُضِّتْهُمْ مَا يِنَجُّوهُمْ
فِي يَوْم غَضَبِي أَنَا اللّٰهْ.
هُمَّنْ مَا يَقْدَرَوْا يَرْوُوا نُفُوسْهُمْ
وَ لَا يَمْلَوْا بُطُونْهُمْ.
دَهَبْهُمْ وَ فُضِّتْهُمْ السَّوَّوْهُمْ أَصْنَامْ
بِقَوْا سَبَبْ خَطَاهُمْ.
20 أَيْوَى، أَوَّلْ هُمَّنْ أَسْتَكْبَرَوْا
بِسَبَبْ جَمَالْ زِينِتْهُمْ.
وَ بِزِينِتْهُمْ،
سَوَّوْا أَصْنَامْهُمْ الْمُحَرَّمِينْ
الْيِجِيبُوا لَيْهُمْ الْكَرَاهِيَّةْ
وَ فِي شَانْ دَا،
نِسَوِّي زِينِتْهُمْ نِجْسَةْ.
21 وَ نِسَلِّمْهَا لِلْأَجَانِبْ
وَ هُمَّنْ يَنْهَبَوْهَا.
وَ نَنْطِيهَا غَنِيمَةْ لِعَاصِيِينْ الْأَرْض
وَ مَا يَجْعَلَوْهَا.
22 وَ أَنَا مَا نِوَجِّهْ عَلَيْ شَعَبِي
وَكِتْ مَا يِحْتَرُمُوا بَيْتِي الْغَالِي لَيِّ.
وَ سَرَارِيقْ يَدْخُلُوا فَوْقَهْ
وَ مَا يَجْعَلَوْه مُقَدَّسْ.
23 سَوِّي جَنَازِيرْ أَشَانْ الْبَلَدْ مَلَانَةْ
بِمُحَاكَمَةْ كَتَّالِينْ الدِّمَمْ
وَ الْمَدِينَةْ مَلَانَةْ بِالْعُنُفْ.
24 وَ نِجِيبْ أَفْسَلْ أُمَمْ
أَشَانْ يِشِيلُوا بُيُوتْهُمْ.
وَ نِوَقِّفْ إِسْتِكْبَارْ الْقَوِيِّينْ
وَ بَكَانَاتْهُمْ هَنَا الْعِبَادَةْ يِنَّجَّسَوْا.
25 وَ دَاهُو الْخَوْف شَدِيدْ جَايِ
وَ هُمَّنْ يِفَتُّشُوا السَّلَامْ وَ مَا يَلْقَوْه.
26 وَ تَجِي مَصِيبَةْ وَرَاءْ مَصِيبَةْ
وَ خَبَرْ شَيْن وَرَاءْ خَبَرْ شَيْن.
كَنْ يِفَتُّشُوا رُؤْيَةْ مِنْ نَبِي كُلَ،
مَا يَلْقَوْهَا
وَ رَاجِلْ الدِّينْ
مَا يِعَلِّمْ شُرُوطْ التَّوْرَاةْ
وَ الشُّيُوخْ كُلَ
مَا عِنْدُهُمْ شَوْرَةْ.
27 وَ الْمَلِكْ يَحْزَنْ
وَ الشَّيْخ يِبَرْجِلْ
وَ إِيدَيْن الشَّعَبْ يَرْجُفُوا.
وَ نِحَاكِمْهُمْ
حَسَبْ دَرِبْهُمْ الشَّالَوْه
وَ نِشَارِعْهُمْ
حَسَبْ الشَّرِيعَةْ السَّوَّوْهَا.
وَ بَيْدَا، يَعَرْفُوا كَدَرْ أَنَا بَسْ اللّٰهْ.»
© La Bible en arabe tchadien © Alliance biblique du Tchad, 2019
