أيُّوب يحجّي بلا فايْدة
1 وَ بَتَّانْ أَلِيهُو شَالْ الْكَلَامْ وَ قَالْ:
2 إِنْتَ تَحْسِبْ عِنْدَكْ حَقّ وَكِتْ تُقُولْ:
«أَنَا صَالِحْ زِيَادَةْ مِنْ الرَّبّ.»
3 أَشَانْ إِنْتَ قُلْت لِلرَّبّ:
«دَا مُفِيدْ لَيْك وَلَّا؟
كَنْ مَا نَذْنِبْ دَا،
يَنْفَعْنِي بِشُنُو؟»
4 أَنَا بَسْ النُّرُدّ لَيْك،
نُرُدّ لَيْك إِنْتَ
وَ لِرُفْقَانَكْ الْمَعَاكْ.
5 أَنْظُرْ السَّمَاءْ وَ شِيفَهْ عَدِيلْ
وَ شِيفْ السَّحَابْ مِنْ فَوْق لَيْك!
6 كَنْ تَذْنِبْ دَا،
تُضُرّ الرَّبّ بِشُنُو؟
وَ كَنْ عِصْيَانَكْ يَبْقَى كَتِيرْ كُلَ،
تِسَوِّي لَيَّهْ شُنُو؟
7 وَ كَنْ إِنْتَ عَادِلْ، هُو يِسْتَفِيدْ شُنُو؟
وَ يَلْقَى مِنَّكْ شُنُو؟
8 أَشَانْ فَسَالْتَكْ دِي تُضُرّ نَاسْ مِثْلَكْ بَسْ
وَ عَدَالْتَكْ كُلَ تَنْفَعْ إِنْسَانْ بَسْ.
9 النَّاسْ يِكَوْرُكُوا بِسَبَبْ
كَتَرَةْ الظَّالِمِينْ
وَ يِكَوْرُكُوا لِلْفَزَعْ
مِنْ إِيدْ الْقَوِيِّينْ.
10 لَاكِنْ مَا فِي نَادُمْ الْيُقُولْ:
«وَيْن الرَّبّ الْخَلَقَانِي،
هُو الْأَنَا نِنَادِيهْ بِغِنَيْ بِاللَّيْل؟
11 وَيْن هُو الْأَنْطَانَا عَقُلْ زِيَادَةْ
مِنْ بَهَايِمْ الْأَرْض،
وَ سَوَّانَا حَكِيمِينْ
مِنْ طُيُورْ السَّمَاءْ؟»
12 خَلَاصْ، النَّاسْ يِكَوْرُكُوا
وَ الرَّبّ مَا يُرُدّ لَيْهُمْ
أَشَانْ إِسْتِكْبَارْ الْفَسْلِينْ دَوْل.
13 أَكِيدْ، الرَّبّ مَا يَسْمَعْ كُرَوْرَاكْهُمْ فِي الْفَاضِي،
وَ الْقَادِرْ مَا يِجِيبْ خَبَرْهُمْ.
14 يَا أَيُّوبْ، كَنْ كَيْ دَا،
الرَّبّ مَا يَسْمَعَكْ
وَكِتْ تُقُولْ إِنْتَ مَا قَاعِدْ تِشِيفَهْ
وَ مُشْكِلْتَكْ قَاعِدَةْ قِدَّامَهْ وَ إِنْتَ تَرْجَاهْ.
15 وَ زِيَادَةْ مِنْ دَا، تُقُولْ غَضَبْ الرَّبّ مَا يُقُمّ
وَ مَا عِنْدَهْ حَاجَةْ بِالْعِصْيَانْ.
16 يَا أَيُّوبْ، تِحَجِّي سَاكِتْ
وَ تِكَتِّرْ كَلَامَكْ بَلَا فَايْدَةْ!
© La Bible en arabe tchadien © Alliance biblique du Tchad, 2019
