1 وَ بَعَدْ دَا، دَاوُدْ قَالْ: «الْبَكَانْ دَا يَبْقَى بَيْت اللّٰهْ الرَّبّ. وَ الْمَدْبَحْ الْبَنِي إِسْرَائِيلْ يِقَدُّمُوا فَوْقَهْ ضَحَايَا مُحَرَّقِينْ.»
دَاوُد جهّز بُنى بيت اللّه
2 وَ دَاوُدْ أَمَرْ يِلِمُّوا كُلَّ الْأَجَانِبْ الْقَاعِدِينْ فِي بَلَدْ إِسْرَائِيلْ. وَ هُو كَلَّفَاهُمْ يَنْقُشُوا حُجَارْ لِيَبْنُوا بَيْهُمْ بَيْت اللّٰهْ. 3 وَ دَاوُدْ جَهَّزْ حَدِيدْ كَتِيرْ الْيِسَوُّوا بَيَّهْ مَسَامِيرْ الْبِيبَانْ وَ حَدِيدْ الْيِرَكُّبُوا بَيَّهْ الْبِيبَانْ. وَ لَمَّ نَحَاسْ كَتِيرْ الْمَا يِنْوَزِنْ. 4 وَ لَمَّ حَطَبْ الْأَرْز كُلَ كَتِيرْ مَا يِنْحَسِبْ أَشَانْ نَاسْ مِنْ بَلَدْ صَيْدَا وَ صُورْ جَابَوْا حَطَبْ الْأَرْز لِدَاوُدْ بِكَتَرَةْ.
5 وَ دَاوُدْ قَالْ: «وِلَيْدِي سُلَيْمَانْ لِسَّاعْ صَبِي وَ مَا عِنْدَهْ عِرْفَةْ. وَ لَاكِنْ الْبَيْت النَّبْنُوهْ لِلّٰهْ وَاجِبْ يِحَجُّوا بِكُبْرَهْ وَ جَمَالَهْ فِي كُلَّ الْأَرْض. وَ فِي شَانْ دَا، أَنَا ذَاتِي نِجَهِّزْ لِبُنَى الْبَيْت دَا.» وَ بِمِثِلْ دَا، دَاوُدْ جَهَّزْ خُمَامْ كَتِيرْ قَبُلْ مَا يُمُوتْ.
دَاوُد كلّف وِلَيْده يبْني البيت
6 وَ دَاوُدْ نَادَاهْ لِوِلَيْدَهْ سُلَيْمَانْ وَ أَمَرَهْ يَبْنِي بَيْت لِلّٰهْ إِلٰـهْ بَنِي إِسْرَائِيلْ. 7 وَ دَاوُدْ قَالْ لِسُلَيْمَانْ: «يَا وِلَيْدِي! زَمَانْ أَنَا ذَاتِي عِنْدِي نِيَّةْ نَبْنِي بَيْت لِلّٰهْ إِلٰـهِي. 8 وَ لَاكِنْ اللّٰهْ حَجَّى لَيِّ وَ قَالْ: ‹إِنْتَ دَفَّقْت دَمّ كَتِيرْ وَكِتْ الْحُرُوبْ الْكَتِيرْ. إِنْتَ مَا تَبْنِي لَيِّ بَيْت أَشَانْ إِنْتَ دَفَّقْت دَمّ كَتِيرْ فِي الْأَرْض قِدَّامِي. 9 وَ لَاكِنْ تِجِيبْ وِلَيْد وَ هُو يَبْقَى سِيدْ الرَّاحَةْ وَ أَنَا نَنْطِي لَيَّهْ رَاحَةْ مِنْ كُلَّ عُدْوَانَهْ الْمُجَاوِرِينَهْ. وَ الْوِلَيْد دَا، يِنَادُوا سُلَيْمَانْ (مَعَنَاتَهْ السَّلَامْ). أَشَانْ نِجِيبْ السَّلَامْ وَ الْأَمَانْ فِي بَلَدْ إِسْرَائِيلْ فِي كُلَّ مُدَّةْ حَيَاتَهْ. 10 وَ هُو بَسْ الْيَبْنِي لَيِّ بَيْت. وَ أَنَا نَبْقَى لَيَّهْ أَبُو وَ هُو يَبْقَى لَيِّ إِبْن. وَ أَنَا نِثَبِّتْ مُلْكَهْ فِي إِسْرَائِيلْ إِلَى الْأَبَدْ.›»
11 وَ دَاوُدْ قَالْ بَتَّانْ: «هَسَّعْ دَا، يَا وِلَيْدِي، خَلِّي اللّٰهْ يُكُونْ مَعَاكْ. وَ بَيْدَا، تَنْجَحْ وَ تَقْدَرْ تَبْنِي بَيْت اللّٰهْ إِلٰـهَكْ حَسَبْ الْكَلَامْ الْهُو قَالَهْ فَوْقَكْ. 12 وَ خَلِّي اللّٰهْ يَنْطِيكْ عَقُلْ وَ فِهِمْ وَكِتْ يِدَرِّجَكْ مَلِكْ فِي إِسْرَائِيلْ. وَ بَيْدَا، تَقْدَرْ تَحْفَضْ وَصَايَا اللّٰهْ إِلٰـهَكْ. 13 أَيْوَى، إِنْتَ تَنْجَحْ كَنْ تَحْفَضْ الْقَوَانِينْ وَ الشُّرُوطْ الْاللّٰهْ أَمَرْ بَيْهُمْ مُوسَى لِبَنِي إِسْرَائِيلْ. أَبْقَى شَدِيدْ وَ فَحَلْ، مَا تَخَافْ وَ لَا تِنْبَهِتْ. 14 شِيفْ بِتَعَبْ أَنَا جَهَّزْت لِبُنَى بَيْت اللّٰهْ زِيَادَةْ مِنْ 3 مَلْيُونْ كِيلَوْ هَنَا دَهَبْ وَ زِيَادَةْ مِنْ 30 مَلْيُونْ كِيلَوْ هَنَا فُضَّةْ. وَ لَمَّيْت نَحَاسْ وَ حَدِيدْ كَتِيرْ مَا يِنْوَزِنْ. وَ أَنَا جَهَّزْت الْخَشَبْ وَ الْحَجَرْ وَ إِنْتَ تِزِيدْ فَوْقَهْ بَتَّانْ. 15 وَ إِنْتَ تَلْقَى خَدَّامِينْ كَتِيرِينْ وَ نَقَّاشِينْ الْحَجَرْ وَ نَجَّارِينْ الْحَطَبْ. وَ تَلْقَى بَتَّانْ نَاسْ الْعِنْدُهُمْ خِبْرَةْ فِي أَيِّ خِدْمَةْ. 16 وَ هَسَّعْ عِنْدَكْ الدَّهَبْ وَ الْفُضَّةْ وَ النَّحَاسْ وَ الْحَدِيدْ بَلَا عَدَدْ. قُمّ وَ أَخْدِمْ! اللّٰهْ مَعَاكْ.»
17 وَ دَاوُدْ أَمَرْ كُلَّ مَسَائِيلْ بَنِي إِسْرَائِيلْ يِسَاعُدُوا وِلَيْدَهْ سُلَيْمَانْ. 18 وَ قَالْ لِلْمَسَائِيلْ: «اللّٰهْ إِلٰـهْكُو مَا يُكُونْ مَعَاكُو وَلَّا؟ وَ مَا أَنْطَاكُو الرَّاحَةْ مِنْ كُلِّ جِيهَةْ؟ أَشَانْ اللّٰهْ سَلَّمْ لَيِّ كُلَّ سُكَّانْ الْبَلَدْ دِي فِي إِيدَيْنِي. وَ هَسَّعْ هِي قَاعِدَةْ تِحِتْ اللّٰهْ وَ شَعَبَهْ. 19 هَسَّعْ دَا، قُمُّوا بِكُلَّ قُلُوبْكُو وَ قُدْرِتْكُو لِتِتَابُعُوا اللّٰهْ إِلٰـهْكُو. قُمُّوا وَ أَبْنُوا بَيْت مُقَدَّسْ لِلّٰهْ إِلٰـهْكُو لِتِجِيبُوا صَنْدُوقْ مُعَاهَدَةْ اللّٰهْ وَ الْمُعِدَّاتْ الْمُخَصَّصِينْ لِلّٰهْ فِي الْبَيْت التَّبْنُوهْ لَيَّهْ.»
© La Bible en arabe tchadien © Alliance biblique du Tchad, 2019
