قِسِم الأرْض هنا قبيلة يَهُوذَا
1 وَ دَاهُو قِسِمْ الْأَرْض هَنَا قَبِيلَةْ يَهُوذَا حَسَبْ خُشُومْ بُيُوتْهُمْ مِنْ حُدُودْ أَدَوْم لِصَحَرَاء سِينْ وَ لَحَدِّي صَحَرَاء نَقَبْ فِي آخِرْ الْجُنُوبْ.
2 وَ حُدُودْهُمْ فِي الْجُنُوبْ مِنْ خَشُمْ الْبَحَرْ الْمَيِّتْ الْمُقَابِلْ الْجُنُوبْ. 3 وَ مِنْ هِنَاكْ، الْحُدُودْ يِحَوُّقُوا جُنُوبْ لِقِيزَانْ الْعَقَارِبْ وَ يِعَدُّوا بِصَحَرَاء سِينْ. وَ الْحُدُودْ دَوْل يَطْلَعَوْا جُنُوبْ لِقَادِشْ بَرْنِيعَ وَ يَمْشُوا لِتُرَابْ حَصْرُونْ وَ يَطْلَعَوْا عَلَيْ أَدَّارْ وَ يِقَبُّلُوا عَلَيْ تُرَابْ قَرْقَعْ. 4 وَ مِنْ الْبَكَانْ دَا، يِعَدُّوا بِعَصْمُونْ لَحَدِّي وَادِي مَصِرْ وَ مِنَّهْ لَحَدِّي الْبَحَرْ الْأَبْيَضْ. وَ دَوْل بَسْ حُدُودْهُمْ مِنْ جِيهَةْ الْجُنُوبْ.
5 وَ حُدُودْهُمْ فِي الصَّبَاحْ يَمْشُوا مِنْ الْبَحَرْ الْمَيِّتْ لَحَدِّي خَشُمْ بَحَرْ الْأُرْدُنْ.
وَ مِنْ الْمُنْشَاقْ، الْحُدُودْ يَبْدَوْا مِنْ نَفْس الْبَكَانْ فِي خَشُمْ بَحَرْ الْأُرْدُنْ 6 وَ يَطْلَعَوْا لَحَدِّي بَيْت حُقْلَةْ وَ يِعَدُّوا مُنْشَاقْ لِبَيْت عَرَبَةْ وَ يَطْلَعَوْا لَحَدِّي الْحَجَرْ الْبِنَادُوهْ بُوهَنْ أُسُمْ هَنَا وِلَيْد رَأُوبِينْ. 7 وَ الْحُدُودْ يَمْشُوا عَلَيْ دَبِيرْ بِوَادِي عَكُورْ وَ يِقَبُّلُوا مُنْشَاقْ عَلَيْ قِلْقَالْ الْمُقَابِلَةْ الْقَوْز هَنَا أَدُومِيمْ الْقَاعِدْ وَطِي لِلْوَادِي. الْحُدُودْ دَوْل يِعَدُّوا قَرِيبْ لِأَلْمِي هَنَا عَيْن شَمْس وَ يَمْشُوا لَحَدِّي عَيْن رُوقِلْ. 8 وَ الْحُدُودْ يِعَدُّوا بِوَادِي بَنِي هِنُّومْ وَ الدِّلَّيَّةْ الْوَطِي لِجَبَلْ الْيَبُوسِيِّينْ يَعْنِي أُورُشَلِيمْ. وَ مِنْهَا يَطْلَعَوْا لَحَدِّي رَاسْ الْجَبَلْ الْمُقَابِلْ وَادِي بَنِي هِنُّومْ فِي الْغَرِبْ فِي خَشُمْ وَادِي رَفَايِينْ فِي الْمُنْشَاقْ. 9 وَ الْحُدُودْ يِقَبُّلُوا مِنْ رَاسْ الْجَبَلْ لَحَدِّي عَيْن نِفْتُوحْ وَ يَمْشُوا عَلَيْ الْحِلَّالْ الْفِي جَبَلْ عَفْرُونْ وَ يِقَبُّلُوا عَلَيْ بَعْلَةْ يَعْنِي قَرْيَةْ يَعَرِيمْ. 10 وَ مِنْ بَعْلَةْ، الْحُدُودْ يِقَبُّلُوا غَرِبْ عَلَيْ جَبَلْ سَعِيرْ وَ يَطْلَعَوْا فِي الدِّلَّيَّةْ هَنَا جَبَلْ الْغَابَاتْ فِي الْمُنْشَاقْ يَعْنِي جَبَلْ كَسَالُونْ. وَ يِدَّلَّوْا بِبَيْت شَمْس وَ يِعَدُّوا بِتِمْنَةْ. 11 وَ الْحُدُودْ يَمْشُوا لَحَدِّي الدِّلَّيَّةْ هَنَا حِلَّةْ عَقْرُونْ فِي الْمُنْشَاقْ وَ يِقَبُّلُوا عَلَيْ شِكَارُونْ وَ يِعَدُّوا بِجَبَلْ بَعْلَةْ وَ يَمْشُوا لَحَدِّي يَبْنِيِيلْ وَ يَقِيفُوا فِي الْبَحَرْ الْأَبْيَضْ.
12 وَ خَلَاصْ الْبَحَرْ الْأَبْيَضْ يَبْقَى حُدُودْهُمْ فِي الْغَرِيبْ. وَ دَوْل بَسْ الْحُدُودْ مِنْ كُلِّ جِيهَةْ هَنَا أَرْض قَبِيلَةْ يَهُوذَا حَسَبْ خُشُومْ بُيُوتْهُمْ.
13 وَ كَالِبْ وِلَيْد يَفُونَى لِقِي قِسْمَهْ مِنْ قَبِيلَةْ يَهُوذَا وَ دَا حَسَبْ كَلَامْ اللّٰهْ لِيَشُوعْ. وَ أَنْطَوْه قَرْيَةْ أَرْبَعَةْ يَعْنِي حِبْرُونْ. وَ أَرْبَعَةْ دَا هُو جِدّ هَنَا بَنِي عَنَقْ. 14 وَ كَالِبْ طَرَدْ تَلَاتَةْ خُشُومْ بُيُوتْ مِنْ بَنِي عَنَقْ وَ شَالْ مِنْهُمْ أَرْضُهُمْ وَ هُمَّنْ شِيشَايْ وَ أَخِمَانْ وَ تَلْمَايْ. 15 وَ مِنْ الْبَكَانْ دَا، هُو قَمَّ ضِدّ سُكَّانْ دَبِيرْ الْأَوَّلْ أُسُمْهَا قَرْيَةْ سِيفَرْ. 16 وَ كَالِبْ قَالْ: «النَّادُمْ الْهَجَمْ قَرْيَةْ سِيفَرْ وَ شَالْهَا، أَنَا نَنْطِيهْ بِنَيِّتِي عَكْسَةْ يَاخُدْهَا.» 17 وَ عُتْنِيِيلْ وِلَيْد قِنَازْ أَخُو كَالِبْ هَجَمْ قَرْيَةْ سِيفَرْ وَ شَالْهَا. وَ كَالِبْ أَنْطَاهْ بِنَيِّتَهْ عَكْسَةْ لِيَاخُدْهَا. 18 وَ لَاكِنْ مِنْ جَاتْ لَيَّهْ، هِي حَرَّشَتَهْ وَ قَالَتْ: «أَسْأَلْ أَبُويِ يَنْطِيكْ زَرَعْ.» وَ بَعَدْ هِي أَدَّلَّتْ مِنْ حُمَارْهَا، كَالِبْ قَالْ لَيْهَا: «تِدَوْرِي شُنُو؟» 19 وَ هِي رَدَّتْ لَيَّهْ وَ قَالَتْ: «هَسَّعْ دَا، بَارِكْنِي. إِنْتَ أَنْطَيْتنِي تُرَابْ فِي صَحَرَاء نَقَبْ وَ هَسَّعْ دَا، أَنْطِينِي عُيُونْ أَلْمِي كُلَ.» وَ هُو أَنْطَاهَا عُيُونْ أَلْمِي الْفَوْق وَ التِّحِتْ كُلَ.
20 وَ دِي بَسْ الْأَرْض الْأَنْطَوْهَا وَرَثَةْ لِقَبِيلَةْ يَهُوذَا حَسَبْ خُشُومْ بُيُوتْهُمْ.
21 وَ الْمُدُنْ هَنَا قَبِيلَةْ يَهُوذَا الْفِي حُدُودْ أَدَوْم فِي الْجُنُوبْ، هُمَّنْ قَبْصِيلْ وَ عِدَرْ وَ يَقُورْ 22 وَ قِيْنَةْ وَ دِيمُونَةْ وَ عَدْعَادَةْ 23 وَ قَدَشْ وَ حَاصُورْ وَ يِتْنَانْ 24 وَ زِيفْ وَ طَلَمْ وَ بَعَلُوتْ 25 وَ حَاصُورْ حَدَتَّةْ وَ قَرْيُوتْ حَصْرُونْ الْبِنَادُوهَا حَاصُورْ 26 وَ أَمَامْ وَ شَمَعْ وَ مُلَادَةْ 27 وَ حَصَرْ قَدَّ وَ حَشْمُونْ وَ بَيْت فَالَطْ 28 وَ حَصَرْ شُوعَلْ وَ بِيرْ سَبْعَةْ وَ الْحِلَّالْ التَّابْعِينْ لَيْهَا 29 وَ بَعْلَةْ وَ عِيِّيمْ وَ عَصَمْ 30 وَ أَلِتُولَدْ وَ كَسِيلْ وَ حُرْمَةْ 31 وَ صِقْلَاقْ وَ مَدْمَنَّا وَ سَنْسَنَّةْ 32 وَ لَبَوُوتْ وَ شِلْحِيمْ وَ عَيْن رِمُّونْ. وَ بِالْجُمْلَةْ 29 مَدِينَةْ وَ حِلَّالْهُمْ التَّابْعِينْ لَيْهُمْ.
33 وَ مُدُنْهُمْ الْفِي سَهَلَةْ شَفِيلَةْ هُمَّنْ أَشْتَوُولْ وَ صَرْعَةْ وَ أَشْنَةْ 34 وَ زَنُوحْ وَ عَيْن قَنِّيمْ وَ تَفُوحْ وَ عِنَامْ 35 وَ يَرْمُوتْ وَ عَدُلَّامْ وَ سُوكُو وَ عَزِيقَةْ 36 وَ شَعَرَايِمْ وَ عَدِتَايِمْ وَ قَدِيرَةْ وَ قَدِيرُوتَايِمْ. وَ بِالْجُمْلَةْ 14 مَدِينَةْ وَ حِلَّالْهُمْ التَّابْعِينْ لَيْهُمْ.
37 وَ وَرَثَوْا بَتَّانْ صِنَانْ وَ حَدَاشَةْ وَ مِقْدَلْ قَادْ 38 وَ دِلْعَانْ وَ مِصْفَةْ وَ يَقْتِيلْ 39 وَ لَكِيشْ وَ بُصْقَتْ وَ عَقْلُونْ 40 وَ كَبُّونْ وَ لَحْمَاسْ وَ كِتْلِيشْ 41 وَ قَدِيرُوتْ وَ بَيْت دَقُون وَ نَعْمَةْ وَ مَقِيدَةْ. وَ بِالْجُمْلَةْ 16 مَدِينَةْ وَ حِلَّالْهُمْ التَّابْعِينْ لَيْهُمْ.
42 وَ وَرَثَوْا بَتَّانْ لِبْنَةْ وَ عَاتَرْ وَ عَشَنْ 43 وَ يِفْتَاحْ وَ أَشْنَةْ وَ نَصِيبْ 44 وَ قَعِيلَةْ وَ أَكْزِيبْ وَ مَرِيشَةْ. وَ بِالْجُمْلَةْ 9 مَدِينَةْ وَ حِلَّالْهُمْ التَّابْعِينْ لَيْهُمْ.
45 وَ وَرَثَوْا عَقْرُونْ وَ الْحِلَّالْ التَّابْعِينْ لَيْهَا. 46 وَ مِنْ عَقْرُونْ حُدُودْهُمْ يَمْشُوا غَرِبْ لِأَشْدُودْ وَ حِلَّالْهَا. 47 وَرَثَوْا أَشْدُودْ وَ الْحِلَّالْ التَّابْعِينْ لَيْهَا وَ غَزَّةْ وَ الْحِلَّالْ التَّابْعِينْ لَيْهَا وَ لَحَدِّي وَادِي مَصِرْ فِي خَشُمْ الْبَحَرْ الْأَبْيَضْ.
48 وَ وَرَثَوْا بَتَّانْ مُدُنْ الْقَاعِدِينْ فِي الْجِبَالْ وَ هُمَّنْ شَمِيرْ وَ يَتِّيرْ وَ سُوكُو 49 وَ دَنَّةْ وَ قَرْيَةْ سَنَّةْ يَعْنِي دَبِيرْ 50 وَ عَنَابْ وَ أَشْتِمُو وَ عَنِيمْ 51 وَ قَوْشَنْ وَ حُلُونْ وَ قِيلُو. وَ بِالْجُمْلَةْ 11 مَدِينَةْ وَ حِلَّالْهُمْ التَّابْعِينْ لَيْهُمْ.
52 وَ وَرَثَوْا بَتَّانْ فِي أَرَابْ وَ رُومَةْ وَ إِشْعَانْ 53 وَ يَانُومْ وَ بَيْت تَفُوحْ وَ أَفِيقَةْ 54 وَ حُمْطَةْ وَ قَرْيَةْ أَرْبَعَةْ يَعْنِي حِبْرُونْ وَ صِيعُورْ. وَ بِالْجُمْلَةْ 9 مَدِينَةْ وَ حِلَّالْهُمْ التَّابْعِينْ لَيْهُمْ.
55 وَ وَرَثَوْا بَتَّانْ فِي مَاعَوْن وَ كَرْمَلْ وَ زِيفْ وَ يُطَّةْ 56 وَ يَزْرَعِيلْ وَ يَقْدَعَامْ وَ زَنُوحْ 57 وَ قَيِينْ وَ قِبَيْعَةْ وَ تِمْنَةْ. وَ بِالْجُمْلَةْ 10 مَدِينَةْ وَ حِلَّالْهُمْ التَّابْعِينْ لَيْهُمْ.
58 وَ وَرَثَوْا بَتَّانْ لِقَوْا حَلْحُولْ وَ بَيْت صُورْ وَ قَدُورْ 59 وَ مَعَارَتْ وَ بَيْت عَنُوتْ وَ أَلِتَقُونْ. وَ بِالْجُمْلَةْ 6 مَدِينَةْ وَ حِلَّالْهُمْ التَّابْعِينْ لَيْهُمْ.
60 وَ وَرَثَوْا بَتَّانْ قَرْيَةْ بَعَلْ يَعْنِي قَرْيَةْ يَعَرِيمْ وَ رَبَّةْ. بِالْجُمْلَةْ 2 مَدِينَةْ وَ حِلَّالْهُمْ التَّابْعِينْ لَيْهُمْ.
61 وَ فِي الصَّحَرَاء، وَرَثَوْا بَيْت عَرَبَةْ وَ مِدِّينْ وَ سِكَاكَةْ 62 وَ نِبْشَانْ وَ مَدِينَةْ الْمِلِحْ وَ عَيْن جِدِي. بِالْجُمْلَةْ 6 مَدِينَةْ وَ حِلَّالْهُمْ التَّابْعِينْ لَيْهُمْ.
63 وَ لَاكِنْ قَبِيلَةْ يَهُوذَا مَا قِدْرَوْا شَالَوْا أَرْض الْيَبُوسِيِّينْ السَّاكْنِينْ فِي أُورُشَلِيمْ. وَ الْيَبُوسِيِّينْ قَاعِدِينْ يَسْكُنُوا فِي أُورُشَلِيمْ فِي أُسُطْ قَبِيلَةْ يَهُوذَا لَحَدِّي الْيَوْم.
© La Bible en arabe tchadien © Alliance biblique du Tchad, 2019
