أَلِيهُو زِعِل ضِدّ الرُفْقان التلاتة
1 وَ خَلَاصْ، أَلِفَازْ وَ بِلْدَدْ وَ صُوفَرْ وَقَّفَوْا كَلَامْهُمْ مَعَ أَيُّوبْ أَشَانْ هُو يِشِيفْ نَفْسَهْ صَالِحْ. 2 وَ بِسَبَبْ دَا، أَلِيهُو وِلَيْد بَرَكِيلْ الْمِنْ حِلَّةْ بُوزْ مِنْ خَشُمْ بَيْت رَامْ زِعِلْ زَعَلْ شَدِيدْ. وَ زَعَلَهْ دَا ضِدّ أَيُّوبْ أَشَانْ أَيُّوبْ سَوَّى نَفْسَهْ صَالِحْ زِيَادَةْ مِنْ الرَّبّ. 3 وَ أَلِيهُو زِعِلْ زَعَلْ شَدِيدْ ضِدّ الرُّفْقَانْ التَّلَاتَةْ كُلَ، أَشَانْ هُمَّنْ مَا قِدْرَوْا يُرُدُّوا لِأَيُّوبْ. وَ بِمِثِلْ دَا، هُمَّنْ سَوَّوْا أَيُّوبْ خَاطِي. 4 وَ أَلِيهُو صَبَرْ مَا كَلَّمْ لِأَيُّوبْ أَشَانْ هُمَّنْ كُلُّهُمْ كُبَارْ مِنَّهْ فِي السِّنّ. 5 وَ لَاكِنْ وَكِتْ أَلِيهُو شَافْ كَدَرْ الرُّجَالْ التَّلَاتَةْ دَوْل مَا عِنْدُهُمْ كَلَامْ الْيُرُدُّوهْ لَيَّهْ، زِعِلْ زَعَلْ شَدِيدْ.
أوّل كلام أَلِيهُو
6 وَ خَلَاصْ، أَلِيهُو وِلَيْد بَرَكِيلْ الْمِنْ حِلَّةْ بُوزْ شَالْ الْكَلَامْ وَ قَالْ:
أَنَا صَبِي وَ إِنْتُو شِيَّابْ
وَ فِي شَانْ دَا، أَنَا خُفْت وَ رَجَفْت
وَ مَا قِدِرْت نِخَبِّرْكُو بِمَعْرَفَتِي.
7 وَ فِي نَفْسِي أَنَا قُلْت:
«الشِّيَّابْ وَاجِبْ يِحَجُّوا أَوَّلْ
وَ الْعِنْدُهُمْ سِنِينْ كَتِيرِينْ يِعَرُّفُوا بِالْحِكْمَةْ.»
8 وَ لَاكِنْ فِي الصَّحِيحْ،
الْإِنْسَانْ عِنْدَهْ رُوحْ
وَ النَّفَسْ الْجَايِ مِنْ الْقَادِرْ،
يَنْطِيهْ الْفِهِمْ.
9 السِّنِينْ الْكَتِيرِينْ بَسْ
مَا يَنْطُوا حِكْمَةْ
وَ مَا كُلَّ الشِّيَّابْ
يَفْهَمَوْا الْعَدَالَةْ.
10 وَ فِي شَانْ دَا، أَنَا نُقُولْ: «أَسْمَعْنِي!
أَنَا كُلَ نِخَبِّرْ بِمَعْرَفَتِي.»
11 أَنَا أَرَّجَّيْت كَلَامْكُو
وَ خَطَّيْت أَدَانِي لِحُجِّتْكُو
لَحَدِّي إِنْتُو حَقَّقْتُوا مِنْ كَلَامْكُو.
12 أَنَا خَطَّيْت بَالِي فَوْقكُو
وَ دَاهُو وَاحِدْ مِنْكُو كُلَ
مَا قِدِرْ يُلُومْ أَيُّوبْ
وَ وَاحِدْ مِنْكُو مَا قِدِرْ
يُرُدّ لَيَّهْ.
13 وَ لَاكِنْ مَا وَاجِبْ تُقُولُوا:
«أَنِحْنَ لِقِينَا الْحِكْمَةْ.
الرَّبّ بَسْ يَقْدَرْ فَوْقَهْ،
مَا إِنْسَانْ.»
14 وَ أَيُّوبْ مَا كَلَامْ كَلَامَهْ لَيِّ أَنَا
وَ أَنَا كُلَ مَا نُرُدّ لَيَّهْ بِكَلَامْكُو إِنْتُو.
15 هُمَّنْ خَافَوْا
وَ مَا يَقْدَرَوْا يُرُدُّوا بَتَّانْ
وَ الْكَلَامْ كُلَ وَدَّرْ لَيْهُمْ.
16 أَنَا أَرَّجَّيْت أَشَانْ هُمَّنْ مَا حَجَّوْا
أَشَانْ هُمَّنْ وَقَفَوْا وَ سَكَتَوْا وَ أَبَوْا مَا يُرُدُّوا.
17 وَ جَاءْ دَوْرِي أَنَا. أَنَا كُلَ نُرُدّ
وَ نِخَبِّرْ بِمَعْرَفَتِي.
18 أَشَانْ أَنَا مَلَانْ بِكَلَامْ
وَ رُوحْ فِي دَاخِلِي تَجْبُرْنِي لِنِكَلِّمْ.
19 قَلْبِي فِي دَاخِلِي فَارْ
مِثِلْ خَمَرْ مَسْدُودْ
أَوْ مِثِلْ قِرْبَةْ جَدِيدَةْ مَلَانَةْ التِّدَوْر تِنْفَجِرْ.
20 أَنَا نِحَجِّي لِنِرَيِّحْ نَفْسِي
وَ نَفْتَحْ خَشْمِي وَ نُرُدّ.
21 أَنَا مَا نِشِيفْ نَادُمْ أَخَيْر مِنْ نَادُمْ
وَ مَا نُغُشّ إِنْسَانْ.
22 أَشَانْ أَنَا مَا نَعَرِفْ نُغُشّ
وَ كَنْ غَشَّيْت كُلَ،
الْخَلَقَانِي يِشِيلْنِي بِسُرْعَةْ.
© La Bible en arabe tchadien © Alliance biblique du Tchad, 2019
