أيُّوب يشّمّت لفزع بِلْدَد
1 وَ أَيُّوبْ شَالْ الْكَلَامْ وَ قَالْ:
2 شُنُو الْفَزَعْ الْإِنْتَ جِبْتَهْ لَيِّ، يَا بِلْدَدْ؟
أَنَا الْمَا عِنْدِي قُدْرَةْ!
أَيْوَى، إِنْتَ تَحْسِبْ تِنَجِّي
الدُّرَاعْ الْمَا شَدِيدْ وَلَّا؟
3 وَ إِنْتَ تَقْدَرْ تَنْطِي وَصِيَّةْ
لِلْمَا عِنْدَهْ حِكْمَةْ وَلَّا؟
وَ تِعَرِّفْ بِكَتَرَةْ عِلْمَكْ وَلَّا؟
4 وَ لَاكِنْ كَلَامَكْ دَا،
مُوَجَّهْ لِيَاتُو؟
وَ لِقِيتْ الْوَحِي دَا مِنْ يَاتُو؟
كلام بِلْدَد في اللّه القادِر
5 الْمَيْتِينْ يَرْجُفُوا تِحِتْ الْأَلْمِي
وَ تِحِتْ السَّاكْنِينْ فَوْقَهْ.
6 قِدَّامْ الرَّبّ،
كُلَّ الْقُبُورْ مُكْشُوفِينْ
أَيْوَى، بَكَانْ الْهَلَاكْ
مَا مُغَطَّى مِنَّهْ.
7 هُو يِمِدّ السَّمَاءْ الْمُنْشَاقِي فِي الْفَاضِي
وَ يِعَلِّقْ الْأَرْض فِي الْهَوَاءْ.
8 هُو يَخْزِنْ الْأَلْمِي فِي السَّحَابْ
وَ السَّحَابْ مَا يِنْفَجِرْ مِنْ تَقَلَتَهْ.
9 هُو يِغَطِّي عَرْشَهْ
وَ يِسِدَّهْ بِسَحَابَهْ.
10 الرَّبّ سَوَّى دَايِرَةْ فِي الْأَلْمِي
لَحَدِّي الْحُدُودْ الْبَيْن النُّورْ وَ الضَّلَامْ.
11 عَمَدْ السَّمَاءْ يِنْهَزَّوْا
وَ يِنْبَهْتُوا مِنْ تَهْدِيدَهْ.
12 بِقُدُرْتَهْ،
هُو هَيَّجْ الْبَحَرْ
وَ بِعِلْمَهْ،
دَمَّرْ رَهَبْ غُولْ الْبَحَرْ.
13 بِنَفْخَتَهْ، السَّمَاءْ بِقِي صَافِي
وَ إِيدَهْ كَتَلْ الدَّابِي الْمُعَرِّدْ.
14 وَ دَوْل الْأَصْغَرْ فِي عَمَلَهْ
وَ دِي بَسْ الْمُخَالَةْ النَّسْمَعَوْهَا.
كَنْ مِثِلْ دَا،
يَاتُو يَفْهَمْ رَعَدْ قُدُرْتَهْ؟
© La Bible en arabe tchadien © Alliance biblique du Tchad, 2019
