يِفْتَاح بِقي قايِد في قِلْعَاد
1 وَ يِفْتَاحْ الْمِنْ تُرَابْ قِلْعَادْ هُو رَاجِلْ فَارِسْ. وَ أَمَّهْ مَرَةْ شَرْمُوطَةْ وَ أَبُوهْ أُسْمَهْ قِلْعَادْ. 2 وَ الْمَرَةْ الْآخَرَةْ هِنْت قِلْعَادْ جَابَتْ لَيَّهْ عِيَالْ آخَرِينْ. وَكِتْ الْعِيَالْ دَوْل كِبْرَوْا، هُمَّنْ طَرَدَوْه لِيِفْتَاحْ وَ قَالَوْا لَيَّهْ: «إِنْتَ مَا تَلْقَى وَرَثَةْ مَعَ عَايِلِتْنَا أَشَانْ أَمَّكْ آخَرَةْ.» 3 وَ يِفْتَاحْ عَرَّدْ بَعِيدْ مِنْ أَخْوَانَهْ وَ مَشَى سَكَنْ فِي بَلَدْ تَوْب. وَ نَاسْ وَاحِدِينْ مَا نَافْعِينْ أَنْضَمَّوْا مَعَ يِفْتَاحْ وَ قَاعِدِينْ يِحَارُبُوا مَعَايَهْ.
4 وَ فِي الْوَكِتْ دَا، بَنِي عَمُّونْ قَمَّوْا يِحَارُبُوا بَنِي إِسْرَائِيلْ. 5 وَ وَكِتْ قَمَّوْا ضِدُّهُمْ، كُبَارَاتْ قِلْعَادْ مَشَوْا فَتَّشَوْا يِفْتَاحْ فِي بَلَدْ تَوْب. 6 وَ هُمَّنْ قَالَوْا لَيَّهْ: «تَعَالْ أَبْقَى فَوْقنَا قَايِدْ لِنِحَارُبُوا بَنِي عَمُّونْ.» 7 وَ يِفْتَاحْ قَالْ لِكُبَارَاتْ قِلْعَادْ: «إِنْتُو بَسْ مَا كِرِهْتُونِي وَ طَرَدْتُونِي مِنْ عَايِلَةْ أَبُويِ؟ وَ مَالَا الْيَوْم وَكِتْ أَضَّايَقْتُوا، جِيتُوا لَيِّ؟» 8 وَ كُبَارَاتْ قِلْعَادْ قَالَوْا لِيِفْتَاحْ: «هَسَّعْ أَنِحْنَ جِينَا لَيْك أَشَانْ تَمْشِي مَعَانَا وَ نِحَارُبُوا بَنِي عَمُّونْ. وَ تَبْقَى كَبِيرْ فَوْقنَا وَ فِي كُلَّ سُكَّانْ قِلْعَادْ.» 9 وَ يِفْتَاحْ قَالْ لِكُبَارَاتْ قِلْعَادْ: «كَنْ تِقَبُّلُونِي لِنِحَارِبْ بَنِي عَمُّونْ وَ كَنْ اللّٰهْ سَلَّمَاهُمْ لَيِّ فِي إِيدِي، أَنَا نَبْقَى كَبِيرْ فَوْقكُو.» 10 وَ كُبَارَاتْ قِلْعَادْ قَالَوْا لِيِفْتَاحْ: «اللّٰهْ يَشْهَدْ أَمْبَيْنَاتْنَا كَنْ مَا سَوَّيْنَا مِثِلْ إِنْتَ قُلْتَهْ.» 11 وَ خَلَاصْ، يِفْتَاحْ مَشَى مَعَ كُبَارَاتْ قِلْعَادْ وَ الشَّعَبْ خَطَّوْه فَوْقهُمْ كَبِيرْ وَ قَايِدْ. وَ فِي حِلَّةْ مِصْفَةْ قِدَّامْ اللّٰهْ، يِفْتَاحْ ثَبَّتْ الْعَلَاقَةْ السَّوَّاهَا مَعَ كُبَارَاتْ قِلْعَادْ.
12 وَ بَعَدْ دَا، يِفْتَاحْ رَسَّلْ نَاسْ لِمَلِكْ بَنِي عَمُّونْ وَ قَالْ لَيَّهْ: «شُنُو الْبَيْنِي وَ بَيْنَكْ لِتَجِي تِحَارِبْنِي فِي بَلَدِي؟» 13 وَ مَلِكْ بَنِي عَمُّونْ قَالْ لِلنَّاسْ الرَّسَّلْهُمْ يِفْتَاحْ: «وَكِتْ بَنِي إِسْرَائِيلْ مَرَقَوْا مِنْ بَلَدْ مَصِرْ شَالَوْا كُلَّ أَرْضِي مِنْ وَادِي أَرْنُونْ لِوَادِي يَبُّوقْ وَ لَحَدِّي بَحَرْ الْأُرْدُنْ. وَ هَسَّعْ دَا، قَبُّلُوا لَيِّ أَرْضِي بِالسَّلَامَةْ.»
14 وَ بَتَّانْ يِفْتَاحْ رَسَّلْ نَاسْ لِمَلِكْ بَنِي عَمُّونْ 15 لِيُقُولُوا لَيَّهْ: «دَاهُو يِفْتَاحْ قَالْ لَيْك: ‹بَنِي إِسْرَائِيلْ مَا شَالَوْا بَلَدْ مُوَابْ وَ لَا بَلَدْ بَنِي عَمُّونْ. 16 وَكِتْ مَرَقَوْا مِنْ بَلَدْ مَصِرْ، بَنِي إِسْرَائِيلْ شَقَّوْا الصَّحَرَاء لَحَدِّي الْبَحَرْ الْأَحْمَرْ وَ جَوْا فِي قَادِشْ. 17 وَ رَسَّلَوْا نَاسْ لِمَلِكْ أَدَوْم وَ قَالَوْا لَيَّهْ: ”مِنْ فَضْلَكْ، خَلِّينَا نُشُقُّوا بَلَدَكْ.“ وَ لَاكِنْ مَلِكْ أَدَوْم أَبَى مَا سِمِعْ كَلَامْهُمْ. وَ لِمَلِكْ مُوَابْ كُلَ، قَدَّمَوْا لَيَّهْ نَفْس الطَّلَبْ وَ لَاكِنْ هُو كُلَ أَبَى. وَ خَلَاصْ، بَنِي إِسْرَائِيلْ قَعَدَوْا فِي قَادِشْ. 18 وَ بَعَدْ دَا، بَنِي إِسْرَائِيلْ قَمَّوْا مَاشِينْ فِي الصَّحَرَاء وَ بَارَوْا بَلَدْ أَدَوْم وَ بَلَدْ مُوَابْ. وَ وَصَّلَوْا صَبَاحْ لِمُوَابْ وَ نَزَلَوْا غَادِي لِوَادِي أَرْنُونْ وَ لَاكِنْ مَا دَخَلَوْا بَلَدْ مُوَابْ أَشَانْ وَادِي أَرْنُونْ دَا حُدُودْ مُوَابْ.
19 «‹وَ بَنِي إِسْرَائِيلْ رَسَّلَوْا نَاسْ لِسِيحُونْ مَلِكْ الْأَمُورِيِّينْ الْقَاعِدْ فِي حَشْبُونْ وَ قَالَوْا لَيَّهْ: ”مِنْ فَضْلَكْ، خَلِّينَا نُشُقُّوا بَلَدَكْ لَحَدِّي نَوْصَلَوْا بَكَانَّا.“ 20 وَ لَاكِنْ سِيحُونْ مَا آمَنَاهُمْ لِبَنِي إِسْرَائِيلْ وَ أَبَى مَا خَلَّاهُمْ يُشُقُّوا بَلَدَهْ. وَ هُو لَمَّ كُلَّ عَسْكَرَهْ وَ خَطَّوْا مُعَسْكَرْهُمْ فِي يَهَاصْ وَ حَارَبَوْا بَنِي إِسْرَائِيلْ. 21 وَ اللّٰهْ إِلٰـهْ بَنِي إِسْرَائِيلْ سَلَّمْ سِيحُونْ وَ كُلَّ شَعَبَهْ لِبَنِي إِسْرَائِيلْ وَ هُمَّنْ أَنَّصَرَوْا فَوْقهُمْ. وَ بَنِي إِسْرَائِيلْ شَالَوْا كُلَّ أَرْض الْأَمُورِيِّينْ السَّاكْنِينْ فِي الْبَلَدْ دِي. 22 وَ شَالَوْا كُلَّ أَرْض الْأَمُورِيِّينْ مِنْ وَادِي أَرْنُونْ لَحَدِّي وَادِي يَبُّوقْ وَ مِنْ الصَّحَرَاء لَحَدِّي بَحَرْ الْأُرْدُنْ.
23 «‹وَ هَسَّعْ، اللّٰهْ إِلٰـهْ بَنِي إِسْرَائِيلْ قَلَعْ أَرْض الْأَمُورِيِّينْ وَ أَنْطَاهَا لِشَعَبَهْ بَنِي إِسْرَائِيلْ. وَ إِنْتَ تِدَوْر تَقْلَعْهَا مِنْهُمْ وَلَّا؟ 24 وَ إِنْتَ مَا وَرَثْت الْأَرْض الْأَنْطَاهَا لَيْك إِلٰـهَكْ كَمُوشْ وَلَّا؟ وَ أَنِحْنَ كُلَ عِنْدِنَا حَقّ نَوْرُثُوا الْأَرْض الْأَنْطَاهَا لَيْنَا اللّٰهْ إِلٰـهْنَا. 25 وَلَّا إِنْتَ شَدِيدْ مِنْ بَلَاقْ وِلَيْد صِفُّورْ مَلِكْ مُوَابْ وَلَّا؟ لَاكِنْ هُو مَا هَرَجْ مَعَ بَنِي إِسْرَائِيلْ لَحَدِّي حَارَبَاهُمْ.
26 «‹مِنْ مُدَّةْ 300 سَنَةْ بَنِي إِسْرَائِيلْ سَكَنَوْا فِي حَشْبُونْ وَ حِلَّالْهَا التَّابْعِينْ لَيْهَا وَ فِي عَرُوعِرْ وَ حِلَّالْهَا التَّابْعِينْ لَيْهَا وَ فِي كُلَّ الْمُدُنْ الْفِي خَشُمْ وَادِي أَرْنُونْ. وَ مَالَا إِنْتُو مَا قَلَعْتُوا الْبَلَدْ دِي فِي كُلَّ الْمُدَّةْ دِي؟ 27 وَ كَنْ لَيِّ أَنَا، مَا خِطِيتْ فَوْقَكْ. وَ لَاكِنْ إِنْتَ بَسْ خِطِيتْ فَوْقِي وَ قَاعِدْ تِحَارِبْنِي. وَ خَلِّي اللّٰهْ يَحْكِمْ الْيَوْم بَيْن بَنِي إِسْرَائِيلْ وَ بَنِي عَمُّونْ!›» 28 وَ لَاكِنْ مَلِكْ بَنِي عَمُّونْ مَا سِمِعْ الْكَلَامْ الْيِفْتَاحْ رَسَّلْ وَ قَالَهْ لَيَّهْ.
يِفْتَاح عاهد اللّه
29 وَ بَعَدْ دَا، رُوحْ اللّٰهْ نَزَلْ فِي يِفْتَاحْ. وَ يِفْتَاحْ قَمَّ شَقَّ تُرَابْ قِلْعَادْ وَ تُرَابْ مَنَسَّى. وَ بَعَدْ دَا، مَشَى فِي مِصْفَةْ قِلْعَادْ وَ مِنْهَا وَصَّلْ حُدُودْ بَنِي عَمُّونْ. 30 وَ يِفْتَاحْ عَاهَدْ اللّٰهْ وَ قَالْ: «كَنْ إِنْتَ سَلَّمْت لَيِّ بَنِي عَمُّونْ، 31 وَكِتْ نِقَبِّلْ بِصِحَّةْ وَ سَلَامَةْ مِنْ الْحَرِبْ مَعَ بَنِي عَمُّونْ، أَوَّلْ مَخْلُوقْ الْيَمْرُقْ مِنْ بَيْتِي لِيِلَاقِينِي أَنَا نِخَصِّصَهْ لِلّٰهْ وَ نِقَدِّمَهْ ضَحِيَّةْ مُحَرَّقَةْ.»
32 وَ يِفْتَاحْ قَطَعْ حُدُودْ بَنِي عَمُّونْ وَ حَارَبَاهُمْ. وَ اللّٰهْ سَلَّمَاهُمْ لَيَّهْ فِي إِيدَهْ. 33 وَ هُو أَنَّصَرْ فَوْقهُمْ مِنْ حِلَّةْ عَرُوعِرْ لَحَدِّي قَرِيبْ لِمِنِّيتْ وَ دَا 20 مُدُنْ وَ لَحَدِّي آبِلْ كَرَامِيمْ. وَ الْهَزِيمَةْ بِقَتْ كَبِيرَةْ لَحَدِّي بَنِي عَمُّونْ قَعَدَوْا تِحِتْ بَنِي إِسْرَائِيلْ.
34 وَ وَكِتْ يِفْتَاحْ جَايِ لِبَيْتَهْ فِي مِصْفَةْ، هُو شَافْ بِنْتَهْ مَرَقَتْ لِتِلَاقِيهْ قَاعِدَةْ تُدُقّ تَنْبَلْ وَ تَلْعَبْ. وَ دِي بِنَيِّتَهْ الْوَاحِدَةْ وَ بَلَاهَا، مَا عِنْدَهْ وَ لَا بِنْت وَ لَا وَلَدْ. 35 وَ مِنْ هُو شَافْ بِنْتَهْ، طَوَّالِي قَمَّ شَرَّطْ خُلْقَانَهْ وَ قَالْ: «يَا خَسَارْتِي! يَا بِنَيِّتِي، رَمَيْتِينِي فِي الْحِزِنْ! إِنْتِ بَسْ جِبْتِ لَيِّ التَّعَبْ! أَنَا عَاهَدْت اللّٰهْ وَ بَتَّانْ مَا نَقْدَرْ نَنْقُضْ الْعَهَدْ.» 36 وَ لَاكِنْ هِي قَالَتْ لَيَّهْ: «يَا أَبُويِ، كَنْ إِنْتَ عَاهَدْت اللّٰهْ، سَوِّي فَوْقِي مِثِلْ إِنْتَ قُلْتَهْ أَشَانْ اللّٰهْ شَالْ لَيْك التَّارْ فِي عُدْوَانَكْ بَنِي عَمُّونْ.» 37 وَ بَتَّانْ قَالَتْ لِأَبُوهَا: «نَطْلُبْ مِنَّكْ بَسْ مُدَّةْ شَهَرَيْن نَمْشِي فِي الْجِبَالْ أَنَا وَ رَفِيقَاتِي أَشَانْ نَبْكِي لِبَنَاتِيّتِي.» 38 وَ هُو قَالْ لَيْهَا: «أَمْشِي.» وَ هُو خَلَّاهَا مَشَتْ لِمُدَّةْ شَهَرَيْن مَعَ رَفِيقَاتْهَا لِتَبْكِي لِبَنَاتِيِّتْهَا فِي الْجِبَالْ. 39 وَ بَعَدْ شَهَرَيْن، هِي قَبَّلَتْ لِأَبُوهَا وَ هُو طَبَّقْ عَهَدَهْ الْقَالَهْ. وَ هِي مَا شَافَتْ رَاجِلْ. وَ دَا بِقِي عَادَةْ فِي بَنِي إِسْرَائِيلْ، 40 كَدَرْ أَيِّ سَنَةْ، بَنَاتْ بَنِي إِسْرَائِيلْ يَمْشَنْ يَحْزَنَنْ لِمُدَّةْ أَرْبَعَةْ يَوْم لِبِنْت يِفْتَاحْ الْمِنْ تُرَابْ قِلْعَادْ.
© La Bible en arabe tchadien © Alliance biblique du Tchad, 2019
