قدِّمين ضحيّة كفّارة الذنِب
1 وَ اللّٰهْ حَجَّى لِمُوسَى وَ قَالْ: 2 حَجِّي لِبَنِي إِسْرَائِيلْ وَ قُولْ لَيْهُمْ: «أَيِّ وَاحِدْ مِنْكُو الْيِسَوِّي ذَنِبْ بَلَا رَايْه وَ يِخَالِفْ وَاحِدَةْ مِنْ كُلَّ وَصَايَا اللّٰهْ بِسَوِّيِّنْ عَمَلْ مُحَرَّمْ، دَاهُو الشَّيّءْ الْوَاجِبْ يِسَوِّيهْ.
ضحيّة راجِل الدين
3 «وَ كَنْ رَاجِلْ الدِّينْ الْمَسَحَوْه وَ دَرَّجَوْه سَوَّى ذَنِبْ وَ جَابَهْ لِكُلَّ الشَّعَبْ، هُو يِقَدِّمْ لِلّٰهْ تَوْر الْمَا عِنْدَهْ أَيِّ عَيْب فِي شَانْ الذَّنِبْ دَا. وَ دَا يَبْقَى ضَحِيَّةْ لِكَفَّارَةْ الذَّنِبْ. 4 وَ هُو يِجِيبْ التَّوْر فِي مَدَخَلْ خَيْمَةْ الْإِجْتِمَاعْ قِدَّامْ اللّٰهْ وَ يُخُطّ إِيدَهْ فِي رَاسْ التَّوْر وَ يَدْبَحَهْ قِدَّامْ اللّٰهْ.
5 «وَ رَاجِلْ الدِّينْ الْمَسَحَوْه وَ دَرَّجَوْه يِشِيلْ مِنْ دَمّ التَّوْر وَ يِوَدِّيهْ فِي خَيْمَةْ الْإِجْتِمَاعْ. 6 وَ رَاجِلْ الدِّينْ يِدِسّ أُصْبَعَهْ فِي الدَّمّ وَ يُرُشَّهْ سَبْعَةْ مَرَّاتْ قِدَّامْ اللّٰهْ، مُقَابِلْ السِّتَارَةْ فِي الْبَكَانْ الْمُقَدَّسْ. 7 وَ رَاجِلْ الدِّينْ يَمْسَحْ بِالدَّمّ دَا قُرُونْ مُخْبَرْ الْبَخُورْ الْمُعَطَّرْ الْقَاعِدْ فِي خَيْمَةْ الْإِجْتِمَاعْ قِدَّامْ اللّٰهْ. وَ هُو يِدَفِّقْ كُلَّ دَمّ التَّوْر الْفَضَّلْ فِي قَعَرْ الْمَدْبَحْ هَنَا الضَّحَايَا الْمُحَرَّقِينْ الْقَاعِدْ بَرَّا فِي مَدَخَلْ خَيْمَةْ الْإِجْتِمَاعْ.
8 «وَ هُو يِشِيلْ كُلَّ الشَّحَمْ هَنَا التَّوْر الْيِقَدُّمُوهْ ضَحِيَّةْ لِكَفَّارَةْ الذَّنِبْ وَ دَا الشَّحَمْ الْمُغَطَّي الْبُطُونْ وَ الشَّحَمْ الْفِي الْبُطُونْ 9 وَ الْكِلَاوَةْ بِشَحَمْهُمْ وَ شَحَمْ النَّوَايِطْ وَ نُصّ الْكِبْدَةْ الْمَرَقَهْ مَعَ الْكِلَاوَةْ. 10 وَ دَا مِثِلْ الْيِشِيلَهْ مِنْ تَوْر ضَحِيَّةْ السَّلَامَةْ. وَ رَاجِلْ الدِّينْ يِحَرِّقَهْ فِي الْمَدْبَحْ هَنَا الضَّحَايَا الْمُحَرَّقِينْ.
11 «وَ لَاكِنْ يِشِيلْ فَرْوَةْ التَّوْر وَ كُلَّ لَحَمَهْ الْفَضَّلْ وَ الرَّاسْ وَ الضَّلَافَيْ وَ الْبُطُونْ وَ الْبَعَرْ 12 يَعْنِي كُلَّ الْفَضَّلْ مِنْ التَّوْر وَ يِوَدِّيهْ بَرَّا مِنْ الْفَرِيقْ. وَ دَا فِي الْبَكَانْ الطَّاهِرْ الْيِدَفُّقُوا فَوْقَهْ الرُّمَادْ الْمُدَهَّنْ. وَ يِحَرِّقَهْ فِي النَّارْ بِحَطَبْ فِي الْبَكَانْ هَنَا الرُّمَادْ الْمُدَهَّنْ.
ضحيّة مُجْتمع بني إسرائيل
13 «وَ كَنْ كُلَّ مُجْتَمَعْ بَنِي إِسْرَائِيلْ يِسَوُّوا خَطَا بَلَا رَايْهُمْ وَ مَا يَعَرْفُوهْ، دَا عَمَلْ مُحَرَّمْ فِي وَصَايَا اللّٰهْ. وَ خَلَاصْ، بَيْدَا يَبْقَوْا خَاطِيِّينْ. 14 وَ وَكِتْ يَعَرْفُوا خَطَاهُمْ، الْمُجْتَمَعْ يِقَدِّمْ تَوْر ضَحِيَّةْ لِكَفَّارَةْ الذَّنِبْ وَ يِوَدُّوهْ قِدَّامْ خَيْمَةْ الْإِجْتِمَاعْ. 15 وَ كُبَارَاتْ الْمُجْتَمَعْ يُخُطُّوا إِيدَيْهُمْ فِي رَاسْ التَّوْر قِدَّامْ اللّٰهْ وَ يَدْبَحَوْه قِدَّامَهْ.
16 «وَ رَاجِلْ الدِّينْ الْمَسَحَوْه وَ دَرَّجَوْه يِوَدِّي مِنْ دَمّ التَّوْر دَا فِي لُبّ خَيْمَةْ الْإِجْتِمَاعْ. 17 وَ يِدِسّ أُصْبَعَهْ فِي الدَّمّ وَ يُرُشَّهْ سَبْعَةْ مَرَّاتْ قِدَّامْ اللّٰهْ مُقَابِلْ السِّتَارَةْ. 18 وَ رَاجِلْ الدِّينْ يَمْسَحْ بِالدَّمّ دَا قُرُونْ مُخْبَرْ الْبَخُورْ الْقَاعِدْ فِي خَيْمَةْ الْإِجْتِمَاعْ قِدَّامْ اللّٰهْ. وَ يِدَفِّقْ كُلَّ دَمّ التَّوْر الْفَضَّلْ فِي قَعَرْ الْمَدْبَحْ هَنَا الضَّحَايَا الْمُحَرَّقِينْ الْقَاعِدْ بَرَّا فِي مَدَخَلْ خَيْمَةْ الْإِجْتِمَاعْ.
19 «وَ يِشِيلْ كُلَّ الشَّحَمْ وَ يِحَرِّقَهْ فِي الْمَدْبَحْ. 20 وَ يِسَوِّي بِالتَّوْر دَا مِثِلْ هُو سَوَّاهْ بِالتَّوْر هَنَا ضَحِيَّةْ كَفَّارَةْ الذَّنِبْ. وَ بِمِثِلْ دَا، رَاجِلْ الدِّينْ يِسَوِّي لَيْهُمْ كَفَّارَةْ وَ هُمَّنْ يَلْقَوْا الْغُفْرَانْ. 21 وَ يِوَدِّي الْفَضَّلْ مِنْ التَّوْر بَرَّا مِنْ الْفَرِيقْ وَ يِحَرِّقَهْ مِثِلْ هُو حَرَّقْ التَّوْر الْأَوَّلْ. وَ دَا يَبْقَى ضَحِيَّةْ لِكَفَّارَةْ الذَّنِبْ هَنَا الْمُجْتَمَعْ.
ضحيّة الشَيْخ
22 «وَ كَنْ شَيْخ سَوَّى ذَنِبْ بَلَا رَايْه، دَا عَمَلْ مُحَرَّمْ فِي وَصَايَا اللّٰهْ إِلٰـهَهْ وَ خَلَاصْ، هُو يَبْقَى خَاطِي. 23 وَ كَنْ عَرَّفَوْه ذَنْبَهْ السَّوَّاهْ، هُو يِقَدِّمْ ضَحِيَّةْ هَنَا تَيْس الْمَا عِنْدَهْ أَيِّ عَيْب. 24 وَ هُو يُخُطّ إِيدَهْ فِي رَاسْ التَّيْس وَ يَدْبَحَهْ فِي الْبَكَانْ الْيَدْبَحَوْا فَوْقَهْ الضَّحَايَا الْمُحَرَّقِينْ قِدَّامْ اللّٰهْ. وَ دَا يَبْقَى ضَحِيَّةْ لِكَفَّارَةْ الذَّنِبْ.
25 «وَ رَاجِلْ الدِّينْ يِشِيلْ بِأُصْبَعَهْ مِنْ دَمّ الضَّحِيَّةْ هَنَا كَفَّارَةْ الذَّنِبْ وَ يَمْسَحَهْ فِي قُرُونْ الْمَدْبَحْ هَنَا الضَّحَايَا الْمُحَرَّقِينْ. وَ يِدَفِّقْ الدَّمّ الْفَضَّلْ فِي قَعَرْ الْمَدْبَحْ دَا. 26 وَ يِحَرِّقْ كُلَّ الشَّحَمْ فِي الْمَدْبَحْ مِثِلْ هُو سَوَّاهْ بِالشَّحَمْ هَنَا ضَحِيَّةْ السَّلَامَةْ. وَ بِمِثِلْ دَا، رَاجِلْ الدِّينْ يِسَوِّي كَفَّارَةْ الذَّنِبْ لِلشَّيْخ وَ هُو يَلْقَى الْغُفْرَانْ.
ضحيّة أيِّ نادم
27 «وَ كَنْ نَادُمْ مِنْ بَنِي إِسْرَائِيلْ سَوَّى ذَنِبْ بَلَا رَايْه، دَا عَمَلْ مُحَرَّمْ فِي وَصَايَا اللّٰهْ، خَلَاصْ بَيْدَا هُو يَبْقَى خَاطِي. 28 وَ كَنْ عَرَّفَوْه ذَنْبَهْ السَّوَّاهْ، هُو يِقَدِّمْ ضَحِيَّةْ هَنَا عَنْزَايْ الْمَا عِنْدَهَا أَيِّ عَيْب فِي شَانْ الذَّنِبْ الْهُو سَوَّاهْ. 29 وَ هُو يُخُطّ إِيدَهْ فِي رَاسْ الضَّحِيَّةْ الْيِقَدِّمْهَا لِكَفَّارَةْ الذَّنِبْ. وَ يَدْبَحْ الضَّحِيَّةْ دِي فِي الْبَكَانْ الْيَدْبَحَوْا فَوْقَهْ الضَّحَايَا الْمُحَرَّقِينْ.
30 «وَ رَاجِلْ الدِّينْ يِشِيلْ بِأُصْبَعَهْ مِنْ دَمّ الضَّحِيَّةْ وَ يَمْسَحَهْ فِي قُرُونْ الْمَدْبَحْ دَا. وَ يِدَفِّقْ كُلَّ الدَّمّ الْفَضَّلْ فِي قَعَرْ الْمَدْبَحْ هَنَا الضَّحَايَا الْمُحَرَّقِينْ. 31 وَ يِشِيلْ كُلَّ الشَّحَمْ مِثِلْ قَاعِدِينْ يِشِيلُوهْ مِنْ ضَحِيَّةْ السَّلَامَةْ وَ رَاجِلْ الدِّينْ يِحَرِّقَهْ فِي الْمَدْبَحْ وَ رِيحْتَهْ اللّٰهْ يَرْضَى بَيْهَا. وَ رَاجِلْ الدِّينْ يِسَوِّي لَيَّهْ كَفَّارَةْ وَ هُو يَلْقَى الْغُفْرَانْ.
32 «وَ كَنْ يِقَدِّمْ مِنْ الْغَنَمْ ضَحِيَّةْ لِكَفَّارَةْ الذَّنِبْ، خَلِّي يِقَدِّمْ أَنْتَايْ الْمَا عِنْدَهَا أَيِّ عَيْب. 33 وَ هُو يُخُطّ إِيدَهْ فِي رَاسْ الضَّحِيَّةْ الْيِقَدِّمْهَا لِكَفَّارَةْ الذَّنِبْ وَ يَدْبَحْ الضَّحِيَّةْ لِكَفَّارَةْ الذَّنِبْ دِي فِي الْبَكَانْ الْيَدْبَحَوْا فَوْقَهْ الضَّحَايَا الْمُحَرَّقِينْ.
34 «وَ رَاجِلْ الدِّينْ يِشِيلْ بِأُصْبَعَهْ مِنْ دَمّ الضَّحِيَّةْ هَنَا كَفَّارَةْ الذَّنِبْ وَ يَمْسَحَهْ فِي قُرُونْ الْمَدْبَحْ هَنَا الضَّحَايَا الْمُحَرَّقِينْ. وَ يِدَفِّقْ كُلَّ الدَّمّ الْفَضَّلْ فِي قَعَرْ الْمَدْبَحْ. 35 وَ رَاجِلْ الدِّينْ يِشِيلْ كُلَّ الشَّحَمْ مِثِلْ قَاعِدِينْ يِشِيلُوهْ مِنْ الْكَبِشْ هَنَا ضَحِيَّةْ السَّلَامَةْ وَ يِحَرِّقَهْ فِي الْمَدْبَحْ مِنْ فَوْق لِلضَّحَايَا الْمُحَرَّقِينْ الْقَاعِدِينْ فِي النَّارْ قِدَّامْ اللّٰهْ. وَ رَاجِلْ الدِّينْ يِسَوِّي لَيَّهْ كَفَّارَةْ لِلذَّنِبْ الْهُو سَوَّاهْ وَ هُو يَلْقَى الْغُفْرَانْ.»
© La Bible en arabe tchadien © Alliance biblique du Tchad, 2019
