أيُّوب يحجّي بحِزِن قلْبه
1 الْحَيَاةْ بَغَّضَتْ لَيِّ.
أَنَا مَا نِخَلِّي شَكْوِتِي
وَ نِحَجِّي بِحِزْنِي الْفِي قَلْبِي.
2 وَ نُقُولْ لِرَبِّي:
«مَا تَجْعَلْنِي خَاطِي!
أَوْرِينِي مَالَا تَهْرِجْنِي؟
3 هَلْ عَدِيلْ لَيْك تَظْلُمْنِي؟
مَالَا تَابَانِي أَنَا خَلِيقْتَكْ
وَ تِنَوِّرْ خِطَّةْ الْعَاصِيِينْ وَلَّا؟
4 عُيُونَكْ مِثِلْ عُيُونْ الْمَخْلُوقِينْ وَلَّا؟
وَ تِشِيفْ مِثِلْ بَنِي آدَم وَلَّا؟
5 هَلْ أَيَّامَكْ مِثِلْ أَيَّامْ
بَنِي آدَم وَلَّا؟
وَ سِنِينَكْ مِثِلْ سِنِينْ
الْإِنْسَانْ وَلَّا؟
6 مَالَا تِفَتِّشْ فِي خَطَايِ
وَ تَسْأَلْ مِنْ ذُنُوبِي؟
7 إِنْتَ تَعَرِفْ كَدَرْ أَنَا مَا خَاطِي
لَاكِنْ مَا فِي نَادُمْ الْيِنَجِّينِي مِنَّكْ.
8 إِنْتَ خَلَقْتِنِي
وَ إِيدَيْنَكْ عَدَّلَوْنِي بِالْكَامِلْ
لَاكِنْ هَسَّعْ تِدَوْر تِدَمِّرْنِي!
9 مِنْ فَضْلَكْ، أَذَّكَّرْ
إِنْتَ خَلَقْتِنِي مِنْ الطِّينَةْ.
لَاكِنْ هَسَّعْ،
تِدَوْر تِقَبِّلْنِي فِي التُّرَابْ وَلَّا؟
10 إِنْتَ صَبَّيْتنِي مِثِلْ لَبَنْ
وَ جَمَّدْتِنِي مِثِلْ جِبْنَةْ.
11 إِنْتَ بَنَيْتنِي بِعَصَبْ وَ عُضَامْ
وَ كَسَيْتنِي بِلَحَمْ وَ فَرْوَةْ.
12 وَ أَنْطَيْتنِي الْحَيَاةْ وَ الرَّحْمَةْ
وَ مُرَاقَبَتَكْ حَفَضَتْ رُوحِي.»
الدود الطارِد
13 «لَاكِنْ دَاهُو الْإِنْتَ لَبَّدْتَهْ فِي قَلْبَكْ
وَ أَنَا عِرِفْت الْفِي فِكْرَكْ.
14 كَنْ نَذْنِبْ، إِنْتَ تِشِيفْنِي
وَ مَا تَجْعَلْنِي بَرِي مِنْ خَطَايِ.
15 وَ كَنْ بِقِيتْ خَاطِي،
الْعَذَابْ لَيِّ!
وَ كَنْ صَالِحْ،
مَا نَقْدَرْ نَرْفَعْ رَاسِي.
أَنَا شَبْعَانْ مِنْ الْإِهَانَةْ
وَ مُدَيِّقْ مِنْ التَّعَبْ.
16 وَ كَنْ نَرْفَعْ رَاسِي،
تِطَارِدْنِي مِثِلْ دُودْ،
وَ تَضْرُبْنِي بَتَّانْ بِقُدُرْتَكْ الْعَجِيبَةْ.
17 إِنْتَ تِجَدِّدْ هَجَمَاتَكْ ضِدِّي
وَ تِزِيدْ غَضَبَكْ فَوْقِي
وَ دُيُوشْ يَجُوا يَهْجُمُونِي.
18 «مَالَا خَلَّيْتنِي
مَرَقْت مِنْ بَطُنْ أَمِّي؟
كَنْ أَوَّلْ مُتّْ،
مَا فِي عَيْن تِشِيفْنِي.
19 وَ نَبْقَى مَا فِينِي،
وَ مِنْ بَطُنْ أَمِّي بَسْ
يِوَدُّونِي فِي الْقَبُرْ.
20 وَ أَيَّامِي كَتِيرِينْ وَلَّا؟
خَلِّي يَقِيفُوا مِنِّي
وَ بَيْدَا، نَقْدَرْ نَفْرَحْ.
21 وَ دَا، قَبُلْ مَا نِقَبِّلْ
فِي بَلَدْ الضَّلَامْ،
الضَّلَامْ الْهَالِكْ.
22 أَيْوَى، نِقَبِّلْ فِي بَلَدْ زَرْقَةْ
مِثِلْ الضَّلَامْ
وَ فِي الضَّلَامْ الْهَالِكْ
الْعِنْدَهْ بَرْجَالْ.
وَ فِي الْبَكَانْ دَا،
النُّورْ مِثِلْ الضَّلَامْ.»
© La Bible en arabe tchadien © Alliance biblique du Tchad, 2019
