وصيّة الأبو
1 أَسْمَعَوْا، يَا عِيَالِي، وَصِيَّةْ أَبُوكُو
وَ لِتَفْهَمَوْا، خُطُّوا بَالْكُو
2 أَشَانْ الْمَعْرَفَةْ النَّنْطِيهَا لَيْكُو عَدِيلَةْ.
أَبَداً مَا تِخَلُّوا تَعْلِيمِي.
3 وَكِتْ أَنَا صَغَيَّرْ مَعَ أَبُويِ
وَ أَمِّي تِحِبِّنِي
أَنَا وِلَيْدهَا الْوَحِيدْ،
4 أَبُويِ عَلَّمَانِي وَ قَالْ:
«خَلِّي قَلْبَكْ يَكْرُبْ كَلَامِي
وَ أَحْفَضْ وَصِيّتِي
وَ بَيْدَا، تِعِيشْ فِي رَاحَةْ.
5 فَتِّشْ الْحِكْمَةْ وَ الْفِهِمْ
وَ مَا تَنْسَى وَ لَا تِخَلِّي كَلَامِي.
6 حِبّ الْحِكْمَةْ وَ مَا تِخَلِّيهَا
أَشَانْ هِي تَحْفَضَكْ وَ تَحْمِيكْ.
7 أَوَّلاً، فَتِّشْ الْحِكْمَةْ
لِتَبْقَى حَكِيمْ
وَ أَنْطِي كُلَّ الْعِنْدَكْ
لِتَلْقَى الْفِهِمْ.
8 الْحِكْمَةْ تِعَلِّيكْ وَكِتْ تَكْرُبْهَا
وَ هِي تِشَرِّفَكْ وَكِتْ تَحْضِنْهَا.
9 الْحِكْمَةْ تُخُطّ فِي رَاسَكْ تَاجْ النِّعْمَةْ
وَ تِجَمِّلَكْ بِكَدْمُولْ الشَّرَفْ.»
10 أَسْمَعْ، يَا وِلَيْدِي، وَ شِيلْ كَلَامِي
وَ دَا يِكَتِّرْ سِنِينْ حَيَاتَكْ.
11 أَنَا عَلَّمْتَكْ طَرِيقْ الْحِكْمَةْ
وَ وَصَّفْتَكْ دُرُوبْ الْعَدَالَةْ.
12 كَنْ تَمْشِي، تَمْشِي بِسُهُولَةْ
وَ كَنْ تَجْرِي، أَبَداً مَا تِتَّرْتَعْ.
13 أَكْرُبْ الْوَصِيَّةْ وَ أَحْفَضْهَا.
مَا تِخَلِّيهَا
أَشَانْ هِي أَسَاسْ حَيَاتَكْ.
14 مَا تَمْشِي فِي طَرِيقْ الْعَاصِيِينْ
وَ لَا تِشِيلْ دَرِبْ الْفَسْلِينْ.
15 خَلِّيهْ، بَيَّهْ مَا تَمْشِي.
بَارِي بِطَرِيقْ آخَرْ وَ أَمْشِي.
16 النَّاسْ دَوْل مَا يُنُومُوا
كَنْ مَا سَوَّوْا الْفَسِلْ
وَ مَا يَنْعَسَوْا
كَنْ مَا رَمَوْا نَادُمْ.
17 أَكِلْهُمْ جَايِ مِنْ الشَّرّ
وَ شَرَابْهُمْ جَايِ مِنْ الْعُنُفْ.
18 طَرِيقْ الصَّالِحِينْ مِثِلْ ضَيّ الصَّبَاحْ
وَ نُورَهْ يِزِيدْ
لَحَدِّي الْحَرَّايْ تَطْلَعْ.
19 لَاكِنْ دَرِبْ الْعَاصِيِينْ
مِثِلْ اللَّيْل الْأَضْلَمْ.
فِي الضَّلَامْ، مَا يِشِيفُوا
الشَّيّءْ الْيَرْمِيهُمْ.
20 يَا وِلَيْدِي، خُطّ بَالَكْ لِوَصِيّتِي
وَ أَفْتَحْ أَدَانَكْ وَ أَسْمَعْ كَلَامِي.
21 كَلَامِي،
مَا تِبَعِّدَهْ مِنْ عَقْلَكْ
وَ وَصِيّتِي،
أَحْفَضْهَا فِي دَاخِلْ قَلْبَكْ.
22 الْيَلْقَاهُمْ، يَلْقَى الْحَيَاةْ
وَ يَلْقَى الْعَافَيْ لِكُلَّ جِسْمَهْ.
23 أَحْفَضْ قَلْبَكْ زِيَادَةْ
مِنْ كُلَّ شَيّءْ آخَرْ
أَشَانْ مِنَّهْ هُو تِسِيلْ الْحَيَاةْ.
24 مَا تَمْرُقْ مِنْ خَشْمَكْ
الْكَلَامْ الْكِدِبْ
وَ بَعِّدْ مِنْ لِسَانَكْ
الْكَلَامْ الْخَبِيثْ.
25 شِيفْ عَدِيلْ قِدَّامَكْ
وَ ثَبِّتْ عُيُونَكْ فِي دَرْبَكْ.
26 عَدِّلْ الدَّرِبْ لِرِجِلَيْنَكْ
وَ بَيْدَا، كُلَّ دُرُوبَكْ يَبْقَوْا ثَابْتِينْ.
27 مَا تِلِفّ وَ لَا إِسْرَةْ وَ لَا زَيْنَةْ
وَ بَعِّدْ نَفْسَكْ مِنْ الشَّرّ.
© La Bible en arabe tchadien © Alliance biblique du Tchad, 2019
