المسيح سلّموه لبِلَاطُس
1 وَ وَكِتْ الْوَطَاةْ أَصْبَحَتْ، كُبَارَاتْ رُجَالْ الدِّينْ وَ الشُّيُوخْ وَ الْعُلَمَاءْ وَ كُلَّ نَاسْ الْمَجْلَسْ لَمَّوْا وَ أَشَّاوَرَوْا. وَ عِيسَى رَبَطَوْه وَ وَدَّوْه وَ سَلَّمَوْه لِبِلَاطُسْ الْوَالِي الرَّوْمَانِي. 2 وَ بِلَاطُسْ سَأَلَهْ وَ قَالْ: «إِنْتَ مَلِكْ الْيَهُودْ وَلَّا؟» وَ عِيسَى رَدَّ لَيَّهْ وَ قَالْ: «مِثِلْ إِنْتَ قُلْتَهْ.»
3 وَ كُبَارَاتْ رُجَالْ الدِّينْ خَطَّوْا فَوْق عِيسَى تُهَمْ كَتِيرِينْ. 4 وَ بِلَاطُسْ سَأَلَهْ بَتَّانْ وَ قَالْ: «مَا تِدَوْر تُرُدّ لَيْهُمْ وَلَّا؟ خَطَّوْا فَوْقَكْ كَلَامْ كَتِيرْ.» 5 وَ عِيسَى مَا رَدَّ لَيَّهْ بَتَّانْ وَ بِلَاطُسْ أَلْعَجَّبْ بِلْحَيْن.
قَرَار بِلَاطُس
6 وَ فِي أَيِّ عِيدْ الْفِصْحَ، الْوَالِي فِي عَادْتَهْ يَمْرُقْ مِنْ السِّجِنْ مَسْجُونْ وَاحِدْ النَّاسْ يَطُلْبُوهْ. 7 وَ مُجْرِمْ وَاحِدْ قَاعِدْ فِي السِّجِنْ أُسْمَهْ بَرَابَاسْ وَ هُو مِنْ النَّاسْ الْمَرَقَوْا ثَوْرَةْ ضِدّ الرَّوْمَانِيِّينْ وَ كَتَلَوْا دِمَّةْ. 8 وَ النَّاسْ قَرَّبَوْا لِلْوَالِي وَ بَدَوْا يَطُلْبُوا مِنَّهْ أَشَانْ هُو يِسَوِّي لَيْهُمْ مِثِلْ فِي عَادْتَهْ. 9 وَ بِلَاطُسْ سَأَلَاهُمْ وَ قَالْ: «تِدَوْرُوا أَنَا نَطْلِقْ لَيْكُو مَلِكْ الْيَهُودْ وَلَّا؟» 10 وَ قَالْ الْكَلَامْ دَا أَشَانْ عِرِفْ كُبَارَاتْ رُجَالْ الدِّينْ سَلَّمَوْا لَيَّهْ عِيسَى بِسَبَبْ حُسُدْهُمْ.
11 وَ لَاكِنْ كُبَارَاتْ رُجَالْ الدِّينْ حَرَّشَوْا النَّاسْ أَشَانْ يَسْأَلَوْا بِلَاطُسْ يَطْلِقْ بَرَابَاسْ فِي بَدَلْ عِيسَى. 12 وَ بِلَاطُسْ حَجَّى لَيْهُمْ بَتَّانْ وَ قَالْ: «وَ عِيسَى الْيُقُولُوا لَيَّهْ مَلِكْ الْيَهُودْ، نِسَوِّي لَيَّهْ شُنُو؟» 13 وَ عَاطَوْا بَتَّانْ وَ قَالَوْا: «أَكْتُلَهْ فِي الصَّلِيبْ!» 14 وَ بِلَاطُسْ سَأَلَاهُمْ وَ قَالْ: «مَالَا؟ شُنُو الْفَسِلْ السَّوَّاهْ؟» وَ لَاكِنْ عَاطَوْا بَتَّانْ بِزِيَادَةْ وَ قَالَوْا: «أَكْتُلَهْ فِي الصَّلِيبْ!»
15 وَ بِلَاطُسْ دَوَّرْ النَّاسْ يَرْضَوْا بَيَّهْ وَ أَشَانْ دَا مَرَقْ لَيْهُمْ بَرَابَاسْ وَ عِيسَى جَلَدَوْه. وَ خَلَاصْ، سَلَّمَهْ لِلْعَسْكَرْ أَشَانْ يَكْتُلُوهْ فِي الصَّلِيبْ.
العسْكر أشّمّتوا للمسيح
16 وَ الْعَسْكَرْ وَدَّوْا عِيسَى دَاخَلْ فِي قَصِرْ الْوَالِي وَ نَادَوْا الْعَسْكَرْ الْآخَرِينْ يَجُوا يِلِمُّوا فَوْقَهْ. 17 وَ لَبَّسَوْه خَلَقْ لَوْنَهْ قَرَضِي مِثِلْ خَلَقْ الْمَلِكْ. وَ سَوَّوْا لَيَّهْ تَاجْ هَنَا شَوْك مَضْفُورْ وَ خَطَّوْه فِي رَاسَهْ. 18 وَ قَمَّوْا يِسَلُّمُوهْ بِشَمَاتَةْ وَ يُقُولُوا: «سَلَامْ عَلَيْك، يَا مَلِكْ الْيَهُودْ!»
19 وَ قَاعِدِينْ يُدُقُّوهْ بِعَصَاةْ فِي رَاسَهْ وَ يِبَزُّقُوا فَوْقَهْ وَ يَسْجُدُوا قِدَّامَهْ. 20 وَ وَكِتْ كَمَّلَوْا شَمَاتِتْهُمْ، شَالَوْا مِنَّهْ الْخَلَقْ الْقَرَضِي وَ لَبَّسَوْه خُلْقَانَهْ حَلَالَهْ. وَ قَمَّوْا يِوَدُّوهْ فِي الْبَكَانْ الْيَصْلُبُوهْ فَوْقَهْ.
عِيسَى المسيح في الصليب
21 وَ الْعَسْكَرْ عَصَرَوْا رَاجِلْ وَاحِدْ الْجَايْ مِنْ الْكَدَادَةْ لِيِشِيلْ الصَّلِيبْ الْيِدَوْرُوا يَكْتُلُوا فَوْقَهْ عِيسَى. وَ هُو أُسْمَهْ سِمْعَانْ الْمِنْ حِلَّةْ الْقَيْرَوَانْ، أَبُو إِسْكَنْدَرْ وَ رُوفُسْ. 22 وَ وَدَّوْا عِيسَى لِلْبَكَانْ الْأُسْمَهْ جُلْجُثَةْ مَعَنَاتَهْ بَكَانْ الْجُمْجُمَةْ. 23 وَ قَدَّمَوْا لَيَّهْ خَمَرْ مُخَلْبَطْ بِصِبِرْ أَشَانْ يِبَرِّدْ لَيَّهْ الْوَجَعْ. وَ لَاكِنْ عِيسَى أَبَاهْ مَا شِرِبَهْ.
24 وَ خَلَاصْ، طَقَّوْا عِيسَى فِي الصَّلِيبْ وَ رَفَعَوْه فَوْق. وَ الْعَسْكَرْ سَوَّوْا أَمْ عِيَيْدَاتْ أَشَانْ يِقَسُّمُوا أَمْبَيْنَاتْهُمْ خُلْقَانَهْ. 25 وَ خَطَّوْا عِيسَى فِي الصَّلِيبْ بِفَجُرْ حَوَالَيْ سَاعَةْ تِسْعَةْ. 26 وَ الْمَكْتُوبْ الْيِوَصِّفْ التُّهْمَةْ الْخَطَّوْهَا فَوْقَهْ يُقُولْ: «مَلِكْ الْيَهُودْ.» 27 وَ طَقَّوْا جَنْبَهْ مُجْرِمِينْ إِتْنَيْن، الْوَاحِدْ فِي صَلِيبْ بِنُصَّهْ الزَّيْنَايْ وَ الْآخَرْ فِي صَلِيبْ بِنُصَّهْ الْإِسْرَايْ. 28 وَ مِثِلْ دَا، الْكَلَامْ الْمَكْتُوبْ فِي الْكِتَابْ تَمَّ. مَكْتُوبْ: <حَسَبَوْه مَعَ الْعَاصِيِينْ.>
29 وَ النَّاسْ الْمَاشِينْ فِي الدَّرِبْ دَا قَاعِدِينْ يِعَيُّرُوهْ وَ يِهِزُّوا رُوسَيْهُمْ وَ يُقُولُوا: «هَايْ، إِنْتَ الْقُلْت تِكَسِّرْ بَيْت اللّٰهْ وَ تَبْنِيهْ بَتَّانْ فِي تَلَاتَةْ يَوْم! 30 نَجِّي نَفْسَكْ! دَلِّي مِنْ الصَّلِيبْ!»
31 وَ كُبَارَاتْ رُجَالْ الدِّينْ مَعَ الْعُلَمَاءْ قَاعِدِينْ يِحَجُّوا أَمْبَيْنَاتْهُمْ وَ هُمَّنْ كُلَ قَاعِدِينْ يِشَّمَّتَوْا لَيَّهْ وَ يُقُولُوا: «هُو نَجَّى نَاسْ آخَرِينْ لَاكِنْ مَا يَقْدَرْ يِنَجِّي نَفْسَهْ. 32 خَلِّي الْمَسِيحْ مَلِكْ بَنِي إِسْرَائِيلْ يِدَلِّي هَسَّعْ مِنْ الصَّلِيبْ أَشَانْ نِشِيفُوهْ وَ نِآمُنُوا بَيَّهْ!» وَ النَّاسَيْن الصَّلَبَوْهُمْ مَعَايَهْ، كُلَ أَشَّمَّتَوْا لَيَّهْ.
مَوْت المسيح
33 وَ بِقِي نُصّ النَّهَارْ. وَ الْوَطَاةْ بِقَتْ ضَلْمَةْ فِي كُلَّ الْبَلَدْ لَحَدِّي الْعَصُرْ. 34 وَ قَرِيبْ السَّاعَةْ تَلَاتَةْ، عِيسَى عَاطْ بِحِسّ عَالِي بِكَلَامْ عِبْرَانِي وَ قَالْ: «إِيلِي إِيلِي لَمَا شَبَقْتَنِي» وَ مَعَنَاتَهْ <إِلٰـهِي، إِلٰـهِي، مَالَا خَلَّيْتنِي؟>
35 وَ وَاحِدِينْ مِنْ النَّاسْ الْوَاقْفِينْ هِنَاكْ سِمْعَوْا كَلَامَهْ وَ قَالَوْا: «شِيفُوا، هُو قَاعِدْ يِنَادِي النَّبِي إِلِيَاسْ!» 36 وَ وَاحِدْ مِنْهُمْ جَرَى لَيَّهْ وَ شَالْ قِطْعَةْ وَ بَلَّاهَا فِي شَرَابْ حَامُضْ وَ شَعَقْهَا فِي رَاسْ عَقَيْقَايْ وَ قَدَّمَهْ لِعِيسَى أَشَانْ يَشْرَبْ مِنَّهْ وَ قَالْ: «أَقِيفُوا شِيَّةْ. خَلِّي نِشِيفُوا كَنْ إِلِيَاسْ يَجِي يِدَلِّيهْ مِنْ الصَّلِيبْ.»
37 وَ عِيسَى عَاطْ بِحِسّ شَدِيدْ وَ خَلَاصْ مَاتْ. 38 وَ السِّتَارْ الْفِي بَيْت اللّٰهْ أَنْشَقَّ مِنْ فَوْق لَحَدِّي تِحِتْ. 39 وَ كَبِيرْ الْعَسْكَرْ وَاقِفْ مُقَابِلَهْ. وَ وَكِتْ هُو شَافْ كِكَّيْف عِيسَى مَاتْ، هُو قَالْ: «بِالصَّحِيحْ الرَّاجِلْ دَا إِبْن اللّٰهْ!»
40 وَ فِيَّهْ عَوِينْ قَاعِدَاتْ يِشِيفَنْ مِنْ بَعِيدْ. وَ هِنَّ مَرْيَمْ الْمَقْدَلِيَّةْ وَ مَرْيَمْ أَمّ يَعْقُوبْ الصَّغَيَّرْ وَ يُوسِي، هِي كُلَ قَاعِدَةْ مَعَاهِنْ. وَ بَتَّانْ سَلُومَةْ كُلَ مَعَاهِنْ. 41 وَ أَوَّلْ الْعَوِينْ دَيْل تَابَعَنْ عِيسَى وَ خَدَمَنْ لَيَّهْ وَكِتْ هُو قَاعِدْ فِي دَارْ الْجَلِيلْ. وَ فِي عَوِينْ آخَرَاتْ كَتِيرَاتْ كُلَ جِنْ مَعَايَهْ فِي مَدِينَةْ الْقُدُسْ.
المسيح دفنوه
42 وَ خَلَاصْ بِقِي عَشِيَّةْ وَ دَا الْيَوْم الْيِجَهُّزُوا فَوْقَهْ لِيَوْم السَّبْت. 43 وَ فِيَّهْ رَاجِلْ وَاحِدْ أُسْمَهْ يُوسُفْ. هُو مِنْ حِلَّةْ الرَّامَةْ وَ هُو نَادُمْ مُكَرَّمْ مِنْ الْمَجْلَسْ الْكَبِيرْ وَ مُؤمِنْ بِمَمْلَكَةْ اللّٰهْ الْجَايَةْ. وَ هُو شَدَّ حَيْلَهْ وَ مَشَى لِبِلَاطُسْ وَ سَأَلَهْ جَنَازَةْ عِيسَى. 44 وَ بِلَاطُسْ أَلْعَجَّبْ وَ دَوَّرْ يِأَكِّدْ كَدَرْ عِيسَى مَاتْ خَلَاصْ. أَشَانْ دَا، نَادَى كَبِيرْ الْعَسْكَرْ وَ سَأَلَهْ كَنْ بِصَحِيحْ عِيسَى مَيِّتْ. 45 وَ وَكِتْ سِمِعْ كَلَامْ كَبِيرْ الْعَسْكَرْ، هُو أَنْطَى إِذِنْ لِيُوسُفْ أَشَانْ يِشِيلْ الْجَنَازَةْ.
46 وَ يُوسُفْ شَرَى كَفَنْ غَالِي وَ دَلَّى جَنَازَةْ عِيسَى مِنْ الصَّلِيبْ وَ كَفَّنَاهَا وَ وَدَّاهَا دَسَّاهَا فِي قَبُرْ وَاحِدْ مِثِلْ كَرْكُورْ النَّكَتَوْه فِي الْحَجَرْ. وَ دَرْدَقْ حَجَرْ كَبِيرْ أَشَانْ يِسِدّ خَشُمْ الْقَبُرْ. 47 وَ مَرْيَمْ الْمَقْدَلِيَّةْ وَ مَرْيَمْ أَمّ يُوسِي شَافَنْ الْبَكَانْ الْخَطَّوْا فَوْقَهْ جَنَازَةْ عِيسَى.
© La Bible en arabe tchadien © Alliance biblique du Tchad, 2019
