اللّه بارك بني إسرائيل
1 «وَ هَسَّعْ أَسْمَعْ، يَا يَعْقُوبْ عَبْدِي،
يَا إِسْرَائِيلْ الْأَنَا عَزَلْتَكْ!
2 دَاهُو اللّٰهْ قَالْ:أَنَا خَلَقْتَكْ
وَ كَوَّنْتَكْ فِي بَطُنْ أَمَّكْ وَ سَاعَدْتَكْ.
مَا تَخَافْ، يَا عَبْدِي يَعْقُوبْ،
يَا إِسْرَائِيلْ الْأَنَا عَزَلْتَكْ!
3 أَشَانْ أَنَا نِنَزِّلْ مَطَرْ فِي الْأَرْض الْعَطْشَانَةْ
وَ نِجَرِّي وُدْيَانْ فِي أَرْض جَفَافْ.
مِثِلْ دَا، نِنَزِّلْ رُوحِي فِي ذُرِّيّتَكْ
وَ بَرَكَتِي فِي عِيَالَكْ.
4 هُمَّنْ يَبْذُرُوا مِثِلْ قَشّ أَخْضَرْ
وَ مِثِلْ شَدَرَةْ الْقَنَ فِي مَجَارِي أَلْمِي.
5 الْوَاحِدْ يُقُولْ: ‹أَنَا هَنَا اللّٰهْ›
وَ الْآخَرْ يِنَادُوهْ بِأُسُمْ يَعْقُوبْ.
وَ الْآخَرْ يَكْتِبْ فِي إِيدَهْ:
‹أَنَا هَنَا اللّٰهْ›
وَ يِسَمُّوهْ بِأُسُمْ إِسْرَائِيلْ.»
لا إلٰـه إلّا اللّه
6 وَ دَاهُو كَلَامْ اللّٰهْ مَلِكْ إِسْرَائِيلْ الْفَدَاهُمْ، هُو اللّٰهْ الْقَادِرْ. هُو قَالْ:
«أَنَا الْأَوَّلْ وَ أَنَا الْأَخِيرْ
وَ لَا إِلٰـهْ إِلَّا أَنَا.
7 يَاتُو مِثْلِي أَنَا؟
خَلِّي يَرْفَعْ حِسَّهْ
وَ يِخَبِّرْ بَيَّهْ.
خَلِّي يِوَصِّفْ قِدَّامِي كُلَّ شَيّءْ الْكَانْ
مِنْ أَنَا خَلَقْت النَّاسْ فِي الْبِدَايَةْ.
خَلِّي يِخَبِّرْنَا
بِالشَّيّءْ الْيُكُونْ فِي الْمُسْتَقْبَلْ.
8 يَا شَعَبِي! مَا تَرْجُفُوا وَ لَا تِنْبَهْتُوا!
أَنَا مَا خَبَّرْتُكُو بَيَّهْ مِنْ زَمَانْ
وَ أَوْرَيْتكُو وَلَّا؟
إِنْتُو شُهُودِي!
هَلْ فِي إِلٰـهْ آخَرْ بَلَايِ أَنَا وَلَّا؟
لَا! أَنَا بَسْ جَبَلْكُو الْقَوِي.
مَا نَعَرِفْ آخَرْ!»
صِناعة الأصْنام
9 الْيَصْنَعَوْا الْأَصْنَامْ،
كُلُّهُمْ مَا يَنْفَعَوْا.
عَمَلْهُمْ الْغَالِي لَيْهُمْ
كُلَ مَا عِنْدَهْ فَايْدَةْ.
شُهُودْهُمْ عَمْيَانِينْ
وَ مَا يَعَرْفُوا شَيّءْ.
وَ فِي شَانْ دَا، يَلْقَوْا الْعَيْب.
10 وَ يَاتُو صَنَعْ إِلٰـهْ
وَ دَقَّ صَنَمْ هَنَا حَدِيدْ
وَ لِقِي فَايْدَةْ؟
11 وَ دَاهُو كُلَّ الْيَعَبُدُوهُمْ
يَلْقَوْا الْعَيْب
وَ الْيَصْنَعَوْهُمْ،
هُمَّنْ نَاسْ بَسْ!
خَلِّي كُلُّهُمْ يِلِمُّوا وَ يَجُوا
وَ كُلُّهُمْ سَوَا يَرْجُفُوا وَ يَلْقَوْا الْعَيْب.
12 لِيِسَوِّي صَنَمْ،
الْحَدَّادِي يِدِسّ الْحَدِيدْ فِي النَّارْ
وَ يُدُقَّهْ بِمِطْرَقَةْ
وَ بِدُرَاعَهْ الْقَوِي، يِسَوِّيهْ.
وَ لَاكِنْ كَنْ الْحَدَّادِي دَا يُجُوعْ، قُدُرْتَهْ تِكَمِّلْ
وَ كَنْ الْعَطَشْ يَكُرْبَهْ، يَكْسَلْ.
13 وَ نَجَّارْ الْخَشَبْ يِقَاوِسَهْ بِخَيْط
وَ يَرْسِمَهْ بِفَحَمْ
وَ يَنْجُرَهْ بِنَجَّارَةْ
وَ يَرْسِمَهْ بِآلَةْ.
وَ يِسَوِّي صُورَةْ إِنْسَانْ
وَ يِجَمِّلَهْ مِثِلْ نَادُمْ
وَ يُخُطَّهْ فِي بَيْت.
14 أَوَّلْ هُو قَطَعْ شَدَرْ الْأَرْز
وَ شَالْ شَدَرْ السِّنْدِيَانْ وَ الْبَلُّوطْ
وَ كَبَّرَاهُمْ مَعَ شَدَرْ الْغَابَةْ
وَ مَقَّنْ شَدَرْ الصَّنَوْبَرْ
وَ الْمَطَرْ كَبَّرَهْ.
15 وَ دَوْل يَبْقَوْا لِلْإِنْسَانْ حَطَبْ لِلنَّارْ
وَ يِشِيلْهُمْ وَ يِدَّفَّ بَيْهُمْ
وَ يِدِسُّهُمْ فِي النَّارْ لِيِسَوِّي بَيْهُمْ أَكِلْ.
وَ بِالْفَضَّلْ مِنْ الْحَطَبْ، يِسَوِّي إِلٰـهْ
وَ يَرْكَعْ لَيَّهْ.
أَيْوَى! يِسَوِّي صَنَمْ
وَ يَسْجُدْ قِدَّامَهْ!
16 وَ هُو يَحْرِقْ نُصّ حَطَبَهْ فِي النَّارْ
وَ يِنَجِّضْ بَيَّهْ لَحَمَهْ
وَ يَقْلِيهْ وَ يَاكُلَهْ.
وَ يِدَّفَّ فِي النَّارْ وَ يُقُولْ:
«هَا! هَا! نِدَّفَّ وَ نِشِيفْ حَمَارْهَا.»
17 وَ لَاكِنْ بِالْفَضَّلْ مِنْ الْحَطَبْ،
هُو يِعَدِّلْ إِلٰـهْ.
أَيْوَى، يِسَوِّي صَنَمْ
وَ يَرْكَعْ وَ يَسْجُدْ قِدَّامَهْ!
وَ يَسْأَلَهْ وَ يُقُولْ لَيَّهْ:
«نَجِّينِي أَشَانْ إِنْتَ بَسْ إِلٰـهِي!»
18 وَ النَّاسْ دَوْل وَ لَا يَعَرْفُوا
وَ لَا يَفْهَمَوْا.
أَشَانْ عُيُونْهُمْ مِسْدُودِينْ، مَا يِشِيفُوا
وَ هُمَّنْ مُقَفَّلِينْ، مَا يَفْهَمَوْا.
19 وَ مَا فِي إِنْسَانْ الْقَلْبَهْ يِقَبِّلَهْ
لِلْمَعْرَفَةْ وَ الْفِهِمْ لِيُقُولْ:
«أَنَا حَرَّقْت نُصّ حَطَبِي فِي النَّارْ
وَ سَوَّيْت خُبْزَةْ بِالْجَمُرْ
وَ قَلَيْت لَحَمْ وَ أَكَلْتَهْ.
وَ بِالْفَضَّلْ،
سَوَّيْت شَيّءْ مُحَرَّمْ
وَ نَرْكَعْ قِدَّامْ قِطَعْ الْحَطَبْ!»
20 هُو يِنْرَبِطْ فِي رُمَادْ
وَ قَلْبَهْ الْمَغْشُوشْ يِوَدِّرَهْ.
هُو مَا يِنَجِّي نَفْسَهْ وَ لَا يُقُولْ:
«الْفِي إِيدِي الزَّيْنَةْ مَا غَشّ وَلَّا؟»
اللّه يفْدى شعبه
21 فَكِّرْ فِي الْكَلَامْ دَا، يَا يَعْقُوبْ!
أَشَانْ إِنْتَ عَبْدِي، يَا إِسْرَائِيلْ!
أَنَا خَلَقْتَكْ لِتَبْقَى عَبْدِي،
يَا إِسْرَائِيلْ، أَنَا مَا نَنْسَاكْ.
22 مِثِلْ الرِّيحْ تِشِيلْ السَّحَابْ،
أَنَا مَحَيْت ذُنُوبَكْ.
وَ مِثِلْ الرِّيحْ تِشِيلْ الْغَمَامْ،
أَنَا قَشَّيْت خَطَايَاكْ.
قَبِّلْ لَيِّ
أَشَانْ أَنَا فَدَيْتَكْ.
23 يَا السَّمَاوَاتْ، زَغْرُطُوا
أَشَانْ اللّٰهْ سَوَّى الشَّيّءْ دَا!
أَفْرَحَيْ، يَا أَرْض التِّحِتْ!
وَ يَا جِبَالْ
وَ إِنْتُو الْغَابَاتْ وَ كُلَّ شَدَرْكُو،
غَنُّوا بِالْفَرَحْ!
أَشَانْ اللّٰهْ فَدَى يَعْقُوبْ
وَ يِوَصِّفْ مَجْدَهْ فِي إِسْرَائِيلْ.
24 وَ دَاهُو كَلَامْ اللّٰهْ الْفَدَاكْ وَ كَوَّنَاكْ فِي بَطُنْ أَمَّكْ. هُو قَالْ:
«أَنَا بَسْ اللّٰهْ!
أَنَا خَلَقْت كُلَّ شَيّءْ.
أَنَا وِحَيْدِي فَلَّيْت السَّمَاوَاتْ
وَ وَكِتْ فَرَشْت الْأَرْض، يَاتُو مَعَايِ؟
25 أَنَا فَشَّلْت عَلَامَاتْ الْكَدَّابِينْ وَ الشَّوَّافِينْ
أَشَانْ مَا عِنْدُهُمْ مَعَنَى.
وَ قَلَبْت كَلَامْ الْحُكُمَاءْ
وَ عِلِمْهُمْ، سَوَّيْتَهْ مَا عِنْدَهْ فَايْدَةْ.
26 أَنَا نِحَقِّقْ كَلَامْ عَبْدِي
وَ نِتِمّ خِطَّةْ رُسُلِي.
نُقُولْ لِمَدِينَةْ الْقُدُسْ:
‹خَلِّي يَسْكُنُوهَا!›
وَ لِحِلَّالْ بَلَدْ يَهُوذَا:
‹خَلِّي يَبْنُوهُمْ مِنْ جَدِيدْ!›
وَ نِقَوِّمْ دَرَادِرْهُمْ
الدَّفَّقَوْا.
27 وَ نُقُولْ لِلْأَلْمِي الْغَرِيقْ:
‹أَبْقَى يَابِسْ وَ نِيَبِّسْ بُحُورَكْ!›
28 وَ نُقُولْ لِلْمَلِكْ كُورَشْ :
‹إِنْتَ رَاعِيِّ!›
وَ هُو يِحَقِّقْ كُلَّ شَيّءْ
الْأَنَا نِدَوْرَهْ.
وَ هُو يُقُولْ لِمَدِينَةْ الْقُدُسْ:
‹خَلِّي تِنْبَنِي!›
وَ يُقُولْ لِبَيْت اللّٰهْ:
‹أَلأَسَّسْ بَتَّانْ!›»
© La Bible en arabe tchadien © Alliance biblique du Tchad, 2019
