اللّه وصّف قُدُرْته لمُوسَى
1 وَ خَلَاصْ، مُوسَى قَالْ لِلّٰهْ: «نِسَوِّي شُنُو كَنْ بَنِي إِسْرَائِيلْ مَا يِصَدُّقُونِي وَ لَا يَسْمَعَوْا كَلَامِي وَ يُقُولُوا: ‹اللّٰهْ مَا بَانْ لَيْك!›» 2 وَ اللّٰهْ قَالْ لَيَّهْ: «عِنْدَكْ شُنُو فِي إِيدَكْ؟» وَ مُوسَى قَالْ: «عِنْدِي عَصَاةْ.» 3 وَ اللّٰهْ قَالْ لَيَّهْ: «أَزْقُلْهَا فِي التُّرَابْ.» وَ مُوسَى زَقَلْهَا فِي التُّرَابْ وَ الْعَصَاةْ بِقَتْ دَابِي وَ هُو جَرَى مِنَّهْ. 4 وَ اللّٰهْ قَالْ لَيَّهْ: «مِدّ إِيدَكْ وَ أَكُرْبَهْ مِنْ دَنَبَهْ.» خَلَاصْ، مُوسَى قَمَّ كَرَبَهْ وَ الدَّابِي قَبَّلْ بِقِي عَصَاةْ. 5 وَ اللّٰهْ قَالْ: «دَا بَسْ الشَّيّءْ التِّسَوِّيهْ لِبَنِي إِسْرَائِيلْ يِصَدُّقُوا كَدَرْ اللّٰهْ رَبّ جُدُودْهُمْ إِبْرَاهِيمْ وَ إِسْحَاقْ وَ يَعْقُوبْ بَانْ لَيْك.»
6 وَ بَتَّانْ اللّٰهْ قَالْ لَيَّهْ: «دِسّ إِيدَكْ فِي صَدْرَكْ بِدَاخَلْ لِخَلَقَكْ.» وَ مُوسَى خَطَّ إِيدَهْ فِي صَدْرَهْ بِدَاخَلْ لِخَلَقَهْ. وَ وَكِتْ مَرَقْ إِيدَهْ مِنْ خَلَقَهْ، إِيدَهْ بِقَتْ بَرْصَاءْ وَ عِنْدَهَا قِشِرْ. 7 وَ بَتَّانْ قَالْ لَيَّهْ: «قَبِّلْ إِيدَكْ فِي صَدْرَكْ.» هُو قَبَّلْ إِيدَهْ فِي صَدْرَهْ وَ بَتَّانْ مَرَقْهَا وَ قَبَّلَتْ فِي حَالْهَا مِثِلْ أَوَّلْ. 8 وَ اللّٰهْ قَالْ لَيَّهْ: «كَنْ بَنِي إِسْرَائِيلْ مَا سِمْعَوْا كَلَامَكْ وَ لَا صَدَّقَوْا بِالْعَجَبْ الْأَوَّلْ دَا، يِصَدُّقُوا بِالْعَجَبْ التَّانِي. 9 وَ كَنْ مَا صَدَّقَوْا بِالْعَجَايِبْ الْإِتْنَيْن دَوْل وَ لَا سِمْعَوْا كَلَامَكْ، شِيلْ أَلْمِي مِنْ بَحَرْ النِّيلْ وَ صُبَّهْ فِي الْأَرْض. وَ خَلَاصْ، الْأَلْمِي دَا يِشَقْلِبْ دَمّ.»
هَارُون بِقي خشُم الكلام
10 وَ لَاكِنْ مُوسَى قَالْ لِلّٰهْ: «يَا رَبّ، أَنَا مَا نَادُمْ الْيَقْدَرْ يِحَجِّي عَدِيلْ وَ لَا مِنْ أَوَّلْ وَ لَا مِنْ إِنْتَ نَادَيْتنِي أَنَا عَبْدَكْ. أَنَا خَشْمِي تَقِيلْ وَ مَا نَقْدَرْ نِحَجِّي عَجَلَةْ.» 11 وَ اللّٰهْ قَالْ لَيَّهْ: «يَاتُو أَنْطَى خَشُمْ لِلْإِنْسَانْ؟ وَ يَاتُو يِسَوِّي نَادُمْ أَبْكَمْ وَلَّا طَرْشَانْ؟ وَ يَاتُو يَنْطِي شَوْف لِنَادُمْ وَلَّا يِسَوِّيهْ عَمْيَانْ؟ دَا مَا أَنَا اللّٰهْ وَلَّا؟ 12 خَلَاصْ أَمْشِي. أَنَا نُكُونْ مَعَاكْ وَكِتْ تِحَجِّي وَ نِأَوْرِيكْ الْكَلَامْ التُّقُولَهْ.» 13 وَ مُوسَى قَالْ: «نَشْحَدَكْ، يَا رَبّ. رَسِّلْ نَادُمْ آخَرْ!»
14 خَلَاصْ فِي الْبَكَانْ دَا، اللّٰهْ غِضِبْ مِنْ كَلَامْ مُوسَى وَ قَالْ: «أَخُوكْ هَارُونْ اللَّاوِي مَا قَاعِدْ وَلَّا؟ أَنَا نَعَرِفْ كَدَرْ هُو يَقْدَرْ يِحَجِّي عَدِيلْ. وَ هَسَّعْ، هُو جَايِ فِي الدَّرِبْ لِيِلَاقِيكْ. وَ وَكِتْ يِشِيفَكْ، يَفْرَحْ بِلْحَيْن. 15 وَ إِنْتَ تِحَجِّي لَيَّهْ بِالشَّيّءْ الْوَاجِبْ يُقُولَهْ. وَ أَنَا ذَاتِي نُكُونْ مَعَاكْ إِنْتَ وَ مَعَ هَارُونْ. وَ نِأَوْرِيكُو بِالشَّيّءْ الْوَاجِبْ تِسَوُّوهْ. 16 وَ هُو بَسْ يِحَجِّي لِلشَّعَبْ فِي بَدَلَكْ وَ يَبْقَى لَيْك خَشُمْ الْكَلَامْ. وَ كَلَامَكْ إِنْتَ يَبْقَى لَيَّهْ مِثِلْ كَلَامْ إِلٰـهَهْ. 17 وَ كَنْ لِلْعَصَاةْ دِي، شِيلْهَا فِي إِيدَكْ وَ بَيْهَا هِي بَسْ تِسَوِّي الْعَجَايِبْ.»
مُوسَى قبّل في بلد مَصِر
18-19 وَ وَكِتْ مُوسَى قَاعِدْ فِي بَلَدْ مِدْيَانْ، اللّٰهْ قَالْ لَيَّهْ: «قَبِّلْ أَمْشِي فِي مَصِرْ أَشَانْ كُلَّ النَّاسْ الدَّوَّرَوْا يَكْتُلُوكْ مَاتَوْا.» وَ خَلَاصْ، مُوسَى قَمَّ مَشَى لِيَسْرُونْ نَسِيبَهْ وَ قَالْ لَيَّهْ: «أَنْطِينِي إِذِنْ نَمْشِي نِشِيفْ أَهَلِي فِي مَصِرْ لِنَعَرِفْ كَنْ هُمَّنْ قَاعِدِينْ حَيِّينْ.» وَ يَسْرُونْ قَالْ لِمُوسَى: «أَمْشِي بِالسَّلَامْ.» 20 وَ مُوسَى شَالْ مَرْتَهْ وَ أَوْلَادَهْ وَ رَكَّبَاهُمْ فِي حُمَارَهْ وَ قَمَّ مَاشِي لِبَلَدْ مَصِرْ. وَ شَالْ فِي إِيدَهْ عَصَاةْ اللّٰهْ. 21 وَ بَتَّانْ اللّٰهْ قَالْ لِمُوسَى: «دَاهُو إِنْتَ مَاشِي لِمَصِرْ. وَ كَنْ وَصَّلْت، وَصِّفْ لِفِرْعَوْن مَلِكْ مَصِرْ كُلَّ الْعَجَايِبْ الْأَنَا أَنْطَيْتَكْ قُدْرَةْ لِتِسَوِّيهُمْ. وَ أَنَا نِقَوِّي رَاسَهْ وَ هُو مَا يِخَلِّي بَنِي إِسْرَائِيلْ يَمُرْقُوا. 22 وَ بَعَدْ دَا، إِنْتَ تُقُولْ لِلْمَلِكْ: ‹دَاهُو اللّٰهْ قَالْ: ”بَنِي إِسْرَائِيلْ هُمَّنْ مِثِلْ وِلَيْدِي الْبِكِرْ. 23 وَ أَنَا أَمَرْتَكْ تِخَلِّي وِلَيْدِي يَمْرُقْ مِنْ بَلَدَكْ أَشَانْ يَعَبُدْنِي. وَ كَنْ إِنْتَ أَبَيْت مَا تِخَلِّيهْ يَمْرُقْ، خَلَاصْ أَنَا نَكْتُلْ وِلَيْدَكْ الْبِكِرْ.“›»
24 فِي الدَّرِبْ فِي الْبَكَانْ الْمُوسَى رَاقِدْ فَوْقَهْ، اللّٰهْ قَرَّبْ لَيَّهْ لِيَكْتُلَهْ. 25 وَ طَوَّالِي، مَرْتَهْ صِفُّورَةْ شَالَتْ حَجَرْ طَرِينْ وَ طَهَّرَتْ وِلَيْدهَا. وَ لِمْسَتْ رِجِلَيْن مُوسَى بِالْفَرْوَةْ الْقَطَعَتَهْ مِنْ وِلَيْدهَا وَ قَالَتْ: «إِنْتَ بِقِيتْ لَيِّ زَوْج هَنَا دَمّ.» 26 وَ بَيْدَا، اللّٰهْ مَا كَتَلْ مُوسَى. وَ فِي شَانْ الطَّهُورَةْ دِي، خَلَاصْ صِفُّورَةْ قَالَتْ: «إِنْتَ بِقِيتْ لَيِّ زَوْج هَنَا دَمّ.»
27 وَ أَوَّلْ، اللّٰهْ قَالْ لِهَارُونْ: «أَمْشِي غَادِي لِلصَّحَرَاء أَشَانْ تِلَاقِي مُوسَى.» وَ هَارُونْ مَشَى لَاقَى أَخُوهْ مُوسَى فِي جَبَلْ اللّٰهْ وَ سَلَّمَهْ وَ حَبَّاهْ. 28 وَ مُوسَى خَبَّرْ هَارُونْ بِالْكَلَامْ الْكَلَّفَهْ بَيَّهْ اللّٰهْ لِيُقُولَهْ وَ بِكُلَّ الْعَجَايِبْ الْأَمَرَهْ بَيْهُمْ اللّٰهْ لِيِسَوِّيهُمْ.
29 وَ وَكِتْ مُوسَى وَ هَارُونْ وِصْلَوْا فِي مَصِرْ، لَمَّوْا كُلَّ شُيُوخْ بَنِي إِسْرَائِيلْ. 30 وَ هَارُونْ كَلَّمَاهُمْ بِكُلَّ كَلَامْ اللّٰهْ الْقَالَهْ لِمُوسَى وَ سَوَّوْا الْعَجَايِبْ قِدَّامْ الشَّعَبْ. 31 وَ بَنِي إِسْرَائِيلْ صَدَّقَوْا. وَ وَكِتْ عِرْفَوْا كَدَرْ اللّٰهْ شَافْ تَعَبْهُمْ وَ دَوَّرْ يِنَجِّيهُمْ، خَلَاصْ كُلُّهُمْ دَنْقَرَوْا وَ سَجَدَوْا.
© La Bible en arabe tchadien © Alliance biblique du Tchad, 2019
