يَهُوشَفَط بِقي ملك في يَهُوذَا
1 وَ يَهُوشَفَطْ وِلَيْد آسَا حَكَمْ فِي بَدَلْ أَبُوهْ. وَ هُو قَوَّى مَمْلَكَتَهْ ضِدّ مَمْلَكَةْ إِسْرَائِيلْ. 2 وَ يَهُوشَفَطْ خَطَّ عَسْكَرْ فِي كُلَّ الْمُدُنْ الْقَوِيِّينْ هَنَا مَمْلَكَةْ يَهُوذَا وَ مُعَسْكَرَاتْ فِي كُلَّ بَلَدْ يَهُوذَا وَ فِي حِلَّالْ أَفْرَايِمْ الشَّالَاهُمْ أَبُوهْ آسَا. 3 وَ اللّٰهْ كَانْ مَعَ يَهُوشَفَطْ أَشَانْ هُو شَالْ الدَّرِبْ الْعَدِيلْ هَنَا جِدَّهْ دَاوُدْ. هُو مَا تَابَعْ دَرِبْ هَنَا إِلٰـهْ بَعَلْ. 4 وَ لَاكِنْ هُو تَابَعْ دَرِبْ اللّٰهْ رَبّ جُدُودَهْ وَ طَبَّقْ وَصِيَّاتَهْ وَ مَا سَوَّى مِثِلْ بَنِي إِسْرَائِيلْ سَوَّوْه. 5 وَ فِي شَانْ دَا، اللّٰهْ ثَبَّتْ مُلُكْ يَهُوشَفَطْ وَ كُلَّ نَاسْ مَمْلَكَةْ يَهُوذَا قَاعِدِينْ يِقَدُّمُوا لَيَّهْ هَدَايَا لِلْمَلِكْ. وَ بِقِي غَنِيْ مَرَّةْ وَاحِدْ وَ عِنْدَهْ شَرَفْ كَتِيرْ. 6 وَ هُو قَاعِدْ يِشِيلْ دَرِبْ اللّٰهْ بِكُلَّ قَلْبَهْ لَحَدِّي هَدَّمْ الْبَكَانَاتْ الْعَالِيِينْ وَ الْعِيدَانْ الْغَزَّوْهُمْ لِعِبَادَةْ أَشِيرَةْ الْفِي بَلَدْ يَهُوذَا.
7 وَ فِي السَّنَةْ التَّالْتَةْ هَنَا حُكْمَهْ، يَهُوشَفَطْ رَسَّلْ كُبَارَاتَهْ بَنْحَايِلْ وَ عُبَدْيَا وَ زَكَرِيَّا وَ نَتَنِيلْ وَ مِكَايَا لِيِعَلُّمُوا سُكَّانْ حِلَّالْ بَلَدْ يَهُوذَا. 8 وَ مَشَوْا مَعَاهُمْ لَاوِيِّينْ وَ هُمَّنْ شَمَعْيَا وَ نَتَنْيَا وَ زَبَدْيَا وَ عَسَاحِيلْ وَ شَمِيرَمُوتْ وَ يُونَتَانْ وَ أَدُنِيَّا وَ طُوبِـيَّا وَ تَوْب أَدُنِيَّا. وَ مَشَوْا مَعَاهُمْ رُجَالْ دِينْ أَلِشَمَعْ وَ يَهُورَامْ. 9 وَ شَالَوْا مَعَاهُمْ كِتَابْ تَوْرَاةْ اللّٰهْ وَ مَشَوْا فِي كُلَّ حِلَّالْ بَلَدْ يَهُوذَا لِيِعَلُّمُوا الشَّعَبْ. 10 وَ خَوْف اللّٰهْ كَرَبْ كُلَّ مَمَالِكْ الْبُلْدَانْ الْمُحَوِّقِينْ بَلَدْ يَهُوذَا وَ وَاحِدْ مِنْهُمْ كُلَ مَا قِدِرْ يِحَارِبْ يَهُوشَفَطْ. 11 وَ الْفِلِسْطِيِّينْ جَابَوْا لِيَهُوشَفَطْ هَدَايَا هَنَا فُضَّةْ. وَ الْعَرَبْ كُلَ جَابَوْا لَيَّهْ 7 700 كُبْشَانْ وَ 7 700 تُيُوسْ.
قُدْرة عسْكر يَهُوشَفَط
12 وَ يَهُوشَفَطْ بِقِي شَدِيدْ زِيَادَةْ. هُو بَنَى مُدُنْ قَوِيِّينْ فِي بَلَدْ يَهُوذَا وَ حِلَّالْ الْيَبْقَوْا لَيَّهْ مَخَازِنْ. 13 وَ ضَمَّ مَعَاشْ كَتِيرْ فِي حِلَّالْ بَلَدْ يَهُوذَا. وَ رُجَالْ مُحَارِبِينْ وَ فُرَّاسْ قَاعِدِينْ فِي مَدِينَةْ الْقُدُسْ. 14 وَ دَاهُو الرُّجَالْ مُقَسَّمِينْ عَلَيْ مَجْمُوعَاتْ عَايِلَاتْهُمْ.
مِنْ قَبِيلَةْ يَهُوذَا،
قَايِدْ فِي آلَافْ هُو عَدْنَاوَ هُو قَايِدْ فِي 300 000 رَاجِلْ فَارِسْ
15 وَ مَعَايَهْ يُوحَنَانْوَ هُو قَايِدْ فِي 280 000 عَسْكَرْ
16 وَ مَعَايَهْ أَمَصْيَا وِلَيْد زِكْرِيهُو الْبِنِيّتَهْ دَوَّرْ يَخْدِمْ لِلّٰهْ
وَ هُو قَايِدْ فِي 200 000 رَاجِلْ فَارِسْ.
17 مِنْ قَبِيلَةْ بَنْيَامِينْ،
أَلِيَادَعْ رَاجِلْ فَارِسْوَ هُو قَايِدْ فِي 200 000 عَسْكَرْ
مُسَلَّحِينْ بِنُشَّابْ وَ دَرَقْ
18 وَ مَعَايَهْ يَهُزَبَادْوَ هُو قَايِدْ فِي 180 000 عَسْكَرْ مُسَلَّحِينْ.
19 وَ كُلَّ الْعَسْكَرْ دَوْل قَاعِدِينْ يَخْدُمُوا لِلْمَلِكْ فِي مَدِينَةْ الْقُدُسْ. وَ دَا بَلَا الْعَسْكَرْ الْآخَرِينْ الْخَطَّاهُمْ الْمَلِكْ فِي الْمُدُنْ الْقَوِيِّينْ هَنَا كُلَّ بَلَدْ يَهُوذَا.
© La Bible en arabe tchadien © Alliance biblique du Tchad, 2019
