أَبِيمَلِك بِقي ملك في شَكِيم
1 وَ أَبِيمَلِكْ وِلَيْد يَرْبَعْل مَشَى شَكِيمْ لِيَلْقَى أَخْوَانْ أَمَّهْ وَ كُلَّ عَايِلَةْ أَبُو أَمَّهْ. وَ قَالْ لَيْهُمْ: 2 «قُولُوا لِكُلَّ سُكَّانْ شَكِيمْ: ‹أَخَيْر يَحْكُمُوكُو 70 حُكَّامْ كُلُّهُمْ مِنْ أَوْلَادْ يَرْبَعْل أَوْ يَحْكِمْكُو رَاجِلْ وَاحِدْ بَسْ؟ وَ أَعَرْفُوا كَدَرْ أَنَا دَا مِنْ دَمُّكُو وَ لَحَمْكُو.›»
3 وَ أَخْوَانْ أَمَّهْ كَلَّمَوْا كُلَّ كَلَامْ أَبِيمَلِكْ لِسُكَّانْ شَكِيمْ وَ هُمَّنْ دَوَّرَوْه أَشَانْ قَالَوْا أَمْبَيْنَاتْهُمْ: «هُو دَا أَخُونَا.» 4 وَ هُمَّنْ أَنْطَوْه 70 حَجَرْ فُضَّةْ مِنْ بَيْت إِلٰـهُّمْ بَعَلْ بَرِيتْ لِأَبِيمَلِكْ. وَ بِالْفُضَّةْ دِي، هُو أَجَّرْ نَاسْ مَا نَافْعِينْ وَ رَبَّاطِينْ دُرُوبْ لِيِتَابُعُوهْ. 5 وَ هُو قَبَّلْ لِبَيْت أَبُوهْ فِي عُفْرَةْ وَ كَتَلْ كُلَّ أَخْوَانَهْ عِيَالْ أَبُوهْ يَرْبَعْل، هُمَّنْ السَّبْعِينْ، كُلُّهُمْ فِي حَجَرْ وَاحِدْ. وَ إِلَّا يُوتَامْ الصَّغَيَّرْ وِلَيْد يَرْبَعْل فَضَّلْ مِنْهُمْ أَشَانْ هُو دَا أَلَّبَّدْ. 6 وَ كُلَّ سُكَّانْ شَكِيمْ وَ كُلَّ شَعَبْ بَيْت مِلُّو مَشَوْا لِلشَّدَرَةْ الْكَبِيرَةْ الْقَاعِدَةْ جَنْب الْحَجَرْ الْغَزَّوْه فِي شَكِيمْ. وَ هِنَاكْ دَرَّجَوْا أَبِيمَلِكْ مَلِكْ.
حِجَي هنا يُوتَام
7 وَ وَكِتْ خَبَّرَوْا يُوتَامْ، هُو مَشَى طَلَعْ فِي رَاسْ جَبَلْ قَرِزِيمْ وَ صَرَخْ بِحِسّ عَالِي وَ قَالْ: «أَسْمَعَوْنِي، يَا سُكَّانْ شَكِيمْ، وَ الرَّبّ كُلَ يَسْمَعْكُو. 8 يَوْم مِنْ الْأَيَّامْ، كُلَّ شَدَرْ الْغَابَةْ قَمَّوْا لِيَمْسَحَوْا وَ يِدَرُّجُوا لَيْهُمْ مَلِكْ وَ قَالَوْا لِشَدَرْ الزَّيْتُونْ: ‹أَبْقَى فَوْقنَا مَلِكْ.› 9 وَ شَدَرْ الزَّيْتُونْ قَالْ: ‹هَلْ نِخَلِّي دِهْنِي الْبِسَبَبَهْ الرَّبّ وَ النَّاسْ كُلَ شَكَرَوْنِي وَ نَمْشِي نَبْقَى كَبِيرْ فِي الشَّدَرْ وَلَّا؟› 10 وَ شَدَرْ الْغَابَةْ قَالَوْا لِشَدَرْ التِّينْ: ‹تَعَالْ وَ أَبْقَى فَوْقنَا مَلِكْ.› 11 وَ شَدَرْ التِّينْ قَالْ: ‹هَلْ نِخَلِّي طُعُمْتِي الْحَلُوَّةْ وَ مَا نَلْدَ فَوَاكِهِي الْحَلُوِينْ وَ نَمْشِي نَبْقَى كَبِيرْ فِي الشَّدَرْ وَلَّا؟› 12 وَ شَدَرْ الْغَابَةْ قَالَوْا لِشَدَرْ الْعِنَبْ: ‹تَعَالْ وَ أَبْقَى فَوْقنَا مَلِكْ.› 13 وَ شَدَرْ الْعِنَبْ قَالْ: ‹هَلْ نِخَلِّي عَصِيرِي الْيَفْرَحْ بَيَّهْ الرَّبّ وَ النَّاسْ وَ نَمْشِي نَبْقَى كَبِيرْ فِي الشَّدَرْ وَلَّا؟› 14 وَ خَلَاصْ، كُلَّ شَدَرْ الْغَابَةْ قَالَوْا لِلشَّدَرْ الْعِنْدَهْ شَوْك: ‹تَعَالْ وَ أَبْقَى فَوْقنَا مَلِكْ.› 15 وَ الشَّدَرْ الْعِنْدَهْ شَوْك قَالْ لَيْهُمْ: ‹كَنْ صَحِيحْ كَيْ إِنْتُو تِدَوْرُوا تَمْسَحَوْنِي وَ تِدَرُّجُونِي مَلِكْ فَوْقكُو دَا، تَعَالُوا أَقْعُدُوا تِحْتِي فِي ضُلِّي. وَ لَاكِنْ كَنْ أَبَيْتُوا كَمَانْ، تَمْرُقْ نَارْ مِنِّي وَ تَاكُلْ أَرْز لُبْنَانْ.›»
16 وَ يُوتَامْ قَالْ بَتَّانْ: «هَسَّعْ، يَا سُكَّانْ شَكِيمْ، وَكِتْ دَرَّجْتُوا أَبِيمَلِكْ مَلِكْ، هَلْ دَرَّجْتُوهْ بِالْحَقّ وَ الْعَدَالَةْ؟ وَ هَلْ سَوَّيْتُوا الْخَيْر مَعَ يَرْبَعْل وَ عَايِلْتَهْ وَلَّا؟ وَ هَلْ فَكَّرْتُوا فِي الشَّيّءْ الْهُو سَوَّاهْ لَيْكُو؟ 17 أَبُويِ حَارَبْ فِي شَانْكُو وَ دَسَّ نَفْسَهْ فِي الْخُطُورَةْ وَ نَجَّاكُو مِنْ الْمِدْيَانِيِّينْ. 18 وَ الْيَوْم، إِنْتُو قَمَّيْتُوا ضِدّ عَايِلْتَهْ وَ كَتَلْتُوا أَوْلَادَهْ السَّبْعِينْ فِي حَجَرْ وَاحِدْ. وَ أَبِيمَلِكْ وِلَيْد سِرِّيتَهْ بَسْ دَرَّجْتُوهْ مَلِكْ فِي سُكَّانْ شَكِيمْ أَشَانْ هُو أَخُوكُو. 19 وَ كَنْ الْيَوْم إِنْتُو قَمَّيْتُوا مَعَ يَرْبَعْل وَ مَعَ عَايِلْتَهْ بِالْحَقّ وَ الْعَدَالَةْ، خَلَاصْ أَفْرَحَوْا بِأَبِيمَلِكْ وَ خَلِّي أَبِيمَلِكْ كُلَ يَفْرَحْ بَيْكُو. 20 وَ كَنْ أَبَيْتُوا كَمَانْ، خَلِّي نَارْ تَمْرُقْ مِنْ أَبِيمَلِكْ وَ تَاكُلْ سُكَّانْ شَكِيمْ وَ شَعَبْ بَيْت مِلُّو. وَ خَلِّي نَارْ تَمْرُقْ مِنْ سُكَّانْ شَكِيمْ وَ شَعَبْ بَيْت مِلُّو وَ تَاكُلْ أَبِيمَلِكْ.»
21 وَ خَلَاصْ، يُوتَامْ جَرَى وَ مَشَى لِحِلَّةْ بِيرْ وَ سَكَنْ هِنَاكْ بَعِيدْ مِنْ أَخُوهْ أَبِيمَلِكْ.
شعب شَكِيم قمّوا ضِدّ أَبِيمَلِك
22 وَ أَبِيمَلِكْ حَكَمْ فِي إِسْرَائِيلْ مُدَّةْ تَلَاتَةْ سَنَةْ. 23 وَ بَعَدْ دَا، الرَّبّ رَسَّلْ رُوحْ فَسْلَةْ جَابَتْ خِلَافْ أَمْبَيْن أَبِيمَلِكْ وَ سُكَّانْ شَكِيمْ وَ هُمَّنْ قَمَّوْا خَانَوْه. 24 وَ بِسَبَبْ دِمَّةْ أَوْلَادْ يَرْبَعْل السَّبْعِينْ، الْعِقَابْ وَقَعْ فِي رَاسْ أَخُوهُمْ أَبِيمَلِكْ الْكَتَلْهُمْ وَ فِي رَاسْ سُكَّانْ شَكِيمْ اللَّزَّوْه فِي الْكَتِلْ. 25 وَ سُكَّانْ شَكِيمْ قَمَّوْا يَرْبُطُوا لَيَّهْ كَمِينْ فِي رُوسَيْ الْجِبَالْ وَ يَقْلَعَوْا خُمَامْ كُلَّ النَّاسْ الْيِعَدُّوا بَيَّهْ. وَ خَلَاصْ، جَوْا خَبَّرَوْا أَبِيمَلِكْ.
26 وَ يَوْم وَاحِدْ، رَاجِلْ وَاحِدْ الْبِنَادُوهْ قَعَلْ وِلَيْد عَابَدْ جَاءْ مَعَ أَخْوَانَهْ فِي شَكِيمْ وَ سُكَّانْ شَكِيمْ آمَنَوْه. 27 وَ السُّكَّانْ مَرَقَوْا فِي الْكَدَادَةْ وَ قَطَعَوْا جِنَيْنَاتْهُمْ هَنَا الْعِنَبْ وَ عَصَرَوْه وَ سَوَّوْا عَازُومَةْ. وَ مَشَوْا لِبَيْت إِلٰـهُّمْ وَ أَكَلَوْا وَ شِرْبَوْا وَ لَعَنَوْا أَبِيمَلِكْ. 28 وَ قَعَلْ وِلَيْد عَابَدْ قَالْ: «أَبِيمَلِكْ هُو يَاتُو لَحَدِّي أَنِحْنَ نَاسْ شَكِيمْ نَقْعُدُوا تِحْتَهْ؟ هُو وِلَيْد يَرْبَعْل بَسْ وَ الْمَسْؤُولْ فِي الْحِلَّةْ دِي، هُو زَبُولْ. نَقْعُدُوا تِحِتْ ذُرِّيَّةْ حَمُورْ أَبُو شَكِيمْ. مَالَا نِدَوْرُوا نَقْعُدُوا تِحِتْ حُكُمْ أَبِيمَلِكْ؟ 29 كَنْ كُلَّ النَّاسْ آمَنَوْا بَيِّ، أَنَا نِطَرِّفْ أَبِيمَلِكْ. وَ نُقُولْ لِأَبِيمَلِكْ: ‹لِمّ عَسْكَرَكْ وَ أَمْرُقْ لِلْحَرِبْ!›»
30 وَ زَبُولْ حَاكِمْ الْحِلَّةْ زِعِلْ زَعَلْ شَدِيدْ وَكِتْ سِمِعْ كَلَامْ قَعَلْ وِلَيْد عَابَدْ. 31 وَ هُو رَسَّلْ نَاسْ بِسِرّ لِيِخَبُّرُوا أَبِيمَلِكْ وَ قَالَوْا لَيَّهْ: «دَاهُو قَعَلْ وِلَيْد عَابَدْ وَ أَخْوَانَهْ جَوْا فِي شَكِيمْ وَ قَوَّمَوْا كُلَّ نَاسْ الْحِلَّةْ ضِدَّكْ. 32 وَ هَسَّعْ دَا، قُمّ بِاللَّيْل، إِنْتَ وَ عَسْكَرَكْ وَ أَمْشِي أَرْبُطْ لَيْهُمْ كَمِينْ فِي الْكَدَادَةْ. 33 وَ بِفَجُرْ وَكِتْ الْحَرَّايْ تَطْلَعْ، أَمْشِي وَ أَهْجِمْ الْحِلَّةْ. وَ وَكِتْ قَعَلْ وَ النَّاسْ الْمَعَايَهْ يَمُرْقُوا لِيِحَارُبُوكْ، خَلَاصْ سَوِّي فَوْقَهْ أَيِّ شَيّءْ التِّدَوْرَهْ.»
34 وَ أَبِيمَلِكْ وَ كُلَّ عَسْكَرَهْ قَمَّوْا بِاللَّيْل وَ أَنْقَسَمَوْا عَلَيْ أَرْبَعَةْ مَجْمُوعَاتْ وَ رَبَطَوْا كَمِينْ قَرِيبْ لِحِلَّةْ شَكِيمْ. 35 وَ قَعَلْ وِلَيْد عَابَدْ مَرَقْ وَ وَقَفْ فِي خَشُمْ بَابْ الْحِلَّةْ. وَ خَلَاصْ، أَبِيمَلِكْ وَ عَسْكَرَهْ مَرَقَوْا مِنْ بَكَانَاتْهُمْ الرَّبَطَوْا فَوْقهُمْ كَمِينْ. 36 وَ وَكِتْ شَافْهُمْ، قَعَلْ قَالْ لِزَبُولْ: «دَاهُو رُجَالْ قَاعِدِينْ يِدَّلَّوْا مِنْ الْجِبَالْ.» وَ لَاكِنْ زَبُولْ قَالْ لَيَّهْ: «دَا ضُلّ هَنَا الْجِبَالْ بَسْ وَ إِنْتَ تَحْسِبَهْ نَاسْ.» 37 وَ قَعَلْ قَالْ بَتَّانْ: «دَاهُو نَاسْ قَاعِدِينْ يِدَّلَّوْا مِنْ الْجَبَلْ الْفِي أُسُطْ وَ فِي آخَرِينْ كُلَ جَايِينْ بِدَرِبْ شَدَرَةْ الشَّوَّافِينْ.» 38 وَ زَبُولْ قَالْ لَيَّهْ: «وَيْن كَلَامَكْ الْإِنْتَ أَوَّلْ حَجَّيْتَهْ؟ أَوَّلْ إِنْتَ مَا قُلْت: ‹أَبِيمَلِكْ هُو يَاتُو لَحَدِّي أَنِحْنَ نَقْعُدُوا تِحْتَهْ؟› وَ دَاهُو النَّاسْ الْإِنْتَ حَقَرْتُهُمْ. هَسَّعْ دَا، أَمْرُقْ وَ حَارِبْهُمْ!» 39 وَ خَلَاصْ، قَعَلْ مَرَقْ فِي رَاسْ سُكَّانْ شَكِيمْ وَ حَارَبْ أَبِيمَلِكْ. 40 وَ لَاكِنْ أَبِيمَلِكْ أَنَّصَرْ فِي قَعَلْ وَ طَرَدَهْ قِدَّامَهْ لَحَدِّي خَشُمْ بَابْ الْحِلَّةْ وَ نَاسْ كَتِيرْ مَاتَوْا. 41 وَ بَعَدْ دَا، أَبِيمَلِكْ مَشَى قَعَدْ فِي أَرُومَةْ. وَ زَبُولْ طَرَدْ قَعَلْ وَ أَخْوَانَهْ وَ مَا يِخَلِّيهُمْ يَسْكُنُوا فِي شَكِيمْ.
42 وَ فِي الْيَوْم التَّانِي، شَعَبْ شَكِيمْ مَشَوْا فِي زِرَاعِتْهُمْ وَ أَبِيمَلِكْ سِمِعْ بِالْخَبَرْ دَا. 43 وَ أَبِيمَلِكْ شَالْ عَسْكَرَهْ وَ قَسَّمَاهُمْ عَلَيْ تَلَاتَةْ مَجْمُوعَاتْ وَ رَبَطْ كَمِينْ فِي الْكَدَادَةْ. وَ وَكِتْ شَافَوْا الشَّعَبْ مَرَقَوْا مِنْ الْحِلَّةْ، الْعَسْكَرْ قَمَّوْا ضِدُّهُمْ وَ كَتَلَوْهُمْ. 44 وَ أَبِيمَلِكْ وَ الْمَجْمُوعَةْ الْمَعَايَهْ مَشَوْا كَرَبَوْا خَشُمْ بَابْ الْحِلَّةْ وَ قَعَدَوْا فَوْقَهْ. وَ الْمَجْمُوعْتَيْن الْآخَرِينْ هَجَمَوْا كُلَّ النَّاسْ الْقَاعِدِينْ فِي الزِّرَاعَةْ وَ كَتَلَوْهُمْ. 45 وَ طُولْ النَّهَارْ دَا، أَبِيمَلِكْ قَاعِدْ يِحَارِبْ فِي الْحِلَّةْ وَ بَعَدْ دَا، شَالْهَا. وَ كَتَلْ كُلَّ الشَّعَبْ وَ دَمَّرْ الْحِلَّةْ وَ صَبَّ فِي بَكَانْهَا مِلِحْ.
46 وَ وَكِتْ كُلَّ رُجَالْ مِقْدَلْ شَكِيمْ سِمْعَوْا الْخَبَرْ دَا، هُمَّنْ مَشَوْا أَلَّبَّدَوْا فِي النُّقْرَةْ الْقَاعِدَةْ تِحِتْ بَيْت الْعِبَادَةْ هَنَا إِيلْ بَرِيتْ. 47 وَ جَوْا خَبَّرَوْا أَبِيمَلِكْ كَدَرْ كُلَّ رُجَالْ مِقْدَلْ شَكِيمْ لَمَّوْا بَكَانْ وَاحِدْ. 48 وَ خَلَاصْ، أَبِيمَلِكْ وَ كُلَّ عَسْكَرَهْ طَلَعَوْا فِي جَبَلْ سَلْمُونْ. وَ أَبِيمَلِكْ شَالْ فَاسْ وَ قَطَعْ فِرِعْ يَابِسْ وَ خَطَّاهْ فِي كِتْفَهْ وَ قَالْ لِعَسْكَرَهْ: «عَجَلَةْ، سَوُّوا مِثِلْ أَنَا سَوَّيْتَهْ.» 49 وَ أَيِّ وَاحِدْ مِنْ عَسْكَرَهْ قَطَعْ فِرِعْ يَابِسْ وَ تَابَعَوْا أَبِيمَلِكْ. وَ هُمَّنْ خَطَّوْا الْفُرُوعْ دَوْل فِي خَشُمْ النُّقْرَةْ دِي وَ تَشَّوْهَا. وَ كُلَّ نَاسْ مِقْدَلْ شَكِيمْ الْقَاعِدِينْ فِي لُبّ النُّقْرَةْ دِي مَاتَوْا، عَوِينْ وَ رُجَالْ عَدَدْهُمْ قَرِيبْ 1 000.
مَوْت أَبِيمَلِك
50 وَ بَعَدْ دَا، أَبِيمَلِكْ شَالْ دَرِبْ حِلَّةْ تِيبِصْ وَ حَاصَرْهَا وَ شَالْهَا. 51 وَ فِيَّهْ قَصِرْ قَوِي فِي أُسْط الْحِلَّةْ وَ كُلَّ السُّكَّانْ، عَوِينْ وَ رُجَالْ، دَخَلَوْا فَوْقَهْ. وَ بَعَدْ سَدَّوْا الْبَابْ، طَلَعَوْا فِي رَاسْ الْقَصِرْ. 52 وَ أَبِيمَلِكْ جَاءْ هَجَمْ الْقَصِرْ الْقَوِي دَا. هُو جَاءْ قَرِيبْ لِبَابَهْ أَشَانْ يِتِشَّهْ. 53 وَ خَلَاصْ، مَرَةْ وَاحِدَةْ زَرَقَتْ أَبِيمَلِكْ بِمُرْحَاكَةْ وَ كَسَّرَتْ رَاسَهْ. 54 وَ طَوَّالِي، أَبِيمَلِكْ نَادَى الصَّبِي الشَّايِلْ لَيَّهْ سِلَاحَهْ وَ قَالْ لَيَّهْ: «سِلّ سَيْفَكْ وَ أَكْتُلْنِي أَشَانْ مَا يُقُولُوا: ‹مَرَةْ بَسْ كَتَلَتَهْ.›» وَ الصَّبِي طَعَنَهْ وَ هُو مَاتْ. 55 وَ وَكِتْ رُجَالْ بَنِي إِسْرَائِيلْ شَافَوْا أَبِيمَلِكْ مَاتْ، أَيِّ وَاحِدْ مَشَى بَيْتَهْ.
56 وَ الرَّبّ قَبَّلْ فِي رَاسْ أَبِيمَلِكْ الْفَسَالَةْ الْهُو سَوَّاهَا لِأَبُوهْ وَكِتْ كَتَلْ أَخْوَانَهْ السَّبْعِينْ. 57 وَ الرَّبّ قَبَّلْ فِي رَاسْ سُكَّانْ شَكِيمْ كُلَّ الْفَسَالَةْ الْهُمَّنْ سَوَّوْهَا. وَ بِمِثِلْ دَا، اللَّعَنَةْ اللَّعَنَاهُمْ بَيْهَا يُوتَامْ وِلَيْد يَرْبَعْل كُلَ لِحْقَتْهُمْ.
© La Bible en arabe tchadien © Alliance biblique du Tchad, 2019
