قسِّم مالك لتحْفضه
1 أَرْمِي خُبْزِتَكْ فِي الْأَلْمِي
أَشَانْ يَوْم وَاحِدْ تَلْقَاهَا.
2 قَسِّمْ مَالَكْ
عَلَيْ سَبْعَةْ أَوْ تَمَانَةْ بَكَانْ
أَشَانْ إِنْتَ مَا تَعَرِفْ الْفَسَالَةْ
التَّجِي فِي الْأَرْض.
3 وَكِتْ السَّحَابْ يِشِيلْ أَلْمِي،
الْمَطَرَةْ تُصُبّ فِي الْأَرْض.
وَ كَنْ شَدَرَةْ وَقَعَتْ
عَلَيْ الْوَطِي أَوْ عَلَيْ الْمُنْشَاقْ،
فِي بَكَانْهَا الْوَقَعَتْ فَوْقَهْ دَا بَسْ،
هِي تَقْعُدْ.
4 الْحَرَّاتِي الْيِشِيفْ الرِّيحْ
يَعَرِفْ الْوَكِتْ الْمَا وَاجِبْ يِتَيْرِبْ.
وَ الْحَرَّاتِي الْيِشِيفْ السَّحَابْ
يَعَرِفْ الْوَكِتْ الْمَا وَاجِبْ يَقْطَعْ.
5 مِثِلْ إِنْتَ مَا تَعَرِفْ وِجْه الرِّيحْ
وَ كِكَّيْف يِلْكَوَّنَوْا عُضَامْ الصَّغِيرْ
فِي بَطُنْ أَمَّهْ،
خَلَاصْ مَا تَقْدَرْ تَفْهَمْ
كِكَّيْف الرَّبّ يِسَوِّي كُلَّ شَيّءْ.
6 بِفَجُرْ، تَيْرِبْ
وَ بِعَشِيَّةْ، مَا تِنْجَمَّ.
أَشَانْ إِنْتَ مَا تَعَرِفْ وَيْنُو الْيَنْجَحْ، دَا وَلَّا دَاكْ،
وَلَّا كَنْ الْإِتْنَيْن كُلُّهُمْ عَدِيلِينْ.
7 نُورْ الصَّبَاحْ حَلُو
وَ عَدِيلْ لِلْعُيُونْ يِشِيفُوا الْحَرَّايْ.
8 كَنْ نَادُمْ يِعِيشْ سِنِينْ كَتِيرِينْ،
خَلِّي يَفْرَحْ بِأَيِّ وَاحِدْ مِنْهُمْ.
وَ لَاكِنْ خَلِّي يِذَّكَّرْ
كَدَرْ أَيَّامْ الْمَوْت أَكْتَرْ.
وَ كُلَّ شَيّءْ الْيَجِي زَايِلْ سَاكِتْ.
أفْرح و فكِّر في الحِساب
9 يَا الصَّبِي! أَفْرَحْ بِأَيَّامْ صُبَاكْ
وَ خَلِّي قَلْبَكْ يَفْرَحْ بِأَيَّامْ شَبَابَكْ.
تَابِعْ كَلَامْ قَلْبَكْ
وَ الْيِشِيفُوهْ عُيُونَكْ.
لَاكِنْ أَعَرِفْ كَدَرْ فِي كُلَّ الشَّيّءْ دَا،
الرَّبّ يِحَاسِبَكْ.
10 بَعِّدْ الْحِزِنْ مِنْ قَلْبَكْ
وَ بَعِّدْ التَّعَبْ مِنْ جِسْمَكْ.
أَشَانْ الصُّبَى وَ الْقُدْرَةْ زَايْلِينْ سَاكِتْ.
© La Bible en arabe tchadien © Alliance biblique du Tchad, 2019
