الملك العادِل
1 أَيْوَى، يَجِي يَوْم الْفَوْقَهْ
الْمَلِكْ يَمْلُكْ بِالْعَدَالَةْ
وَ الْكُبَارَاتْ يَحْكُمُوا بِالْحَقّ.
2 وَ أَيِّ وَاحِدْ مِنْهُمْ يَبْقَى
مِثِلْ بَكَانْ الْيِلَّبَّدَوْا فَوْقَهْ مِنْ الرِّيحْ
وَ مِثِلْ بَكَانْ الْيَحْمِي مِنْ الْمَطَرَةْ الشَّدِيدَةْ.
وَ يَبْقَى مِثِلْ مَجَارِي أَلْمِي فِي بَكَانْ الْيَابِسْ
وَ مِثِلْ ضُلّ الْجَبَلْ فِي أَرْض جَفَافْ.
3 وَ عُيُونْ النَّاسْ الْيِشِيفُوا
أَبَداً مَا يِغَمُّضُوا.
وَ أُدْنَيْ النَّاسْ الْيَسْمَعَوْا
يِنْفَتْحُوا مَرَّةْ وَاحِدْ.
4 وَ فِي الْيَوْم دَا، النَّاسْ الْمُسَّعْجِلِينْ فِي الْكَلَامْ
يِفَكُّرُوا وَ يَفْهَمَوْا.
وَ لِسَانْ النَّاسْ الْعِنْدُهُمْ تَمْتَامَةْ
يِحَجِّي عَجَلَةْ بِكَلَامْ وَاضِحْ.
5 وَ أَبَداً مَا يِنَادُوا الْمَطْمُوسْ مَسْؤُولْ
وَ الْغَشَّاشْ مَا يِنَادُوهْ حَكِيمْ.
6 أَشَانْ الْمَطْمُوسْ يُقُولْ كَلَامْ شَيْن
وَ فِي قَلْبَهْ يُضُمّ الشَّرّ.
هُو يِسَوِّي الْفَسَالَةْ وَ يَكْفُرْ
وَ يَكْدِبْ فِي اللّٰهْ.
وَ يَمْنَعْ الْأَكِلْ لِلْجِيعَانْ
وَ الْأَلْمِي لِلْعَطْشَانْ.
7 الْغَشَّاشْ عَمَلَهْ فَسِلْ.
هُو يِخَطِّطْ الْفَسَالَةْ
لِيِدَمِّرْ الْمَسَاكِينْ بِكَلَامْ كِدِبْ
وَكِتْ يِدَافُعُوا لِحُقُوقْهُمْ.
8 وَ لَاكِنْ الْحَكِيمْ
يِخَطِّطْ عَمَلْ عَدِيلْ
وَ عَلَيْ الْعَمَلْ الْعَدِيلْ دَا،
هُو يِنْتَكِلْ.
تحْذير لعوين مدينة القدس
9 يَا الْعَوِينْ الْمُنْجَمَّاتْ،
قُمَّنْ وَ أَسْمَعَنْ حِسِّي.
يَا الْبَنَاتْ الْقَاعِدَاتْ بِأَمَانْ،
خُطَّنْ أُدْنَيْكَنْ لِكَلَامِي.
10 بَعَدْ سَنَةْ وَ أَيَّامْ،
تَرْجِفَنْ، يَا الْقَاعِدَاتْ بِأَمَانْ.
أَشَانْ قَطِعْ الْعِنَبْ يَبْقَى مَا فِيهْ
بَتَّانْ مَا فِي لَمِّينْ هَنَا مَعَاشْ.
11 بَرْجِلَنْ، يَا الْمُنْجَمَّاتْ!
أَرْجِفَنْ، يَا الْقَاعِدَاتْ بِأَمَانْ!
أَسَّلَّبَنْ وَ أَقْعُدَنْ عَرْيَانَاتْ
وَ أَرْبُطَنْ فِرَادْ فِي صَلَبَاكَنْ.
12 أَكُرْبَنْ دُيُودْكَنْ وَ أَبْكَنْ
أَشَانْ الزِّرَاعَةْ اللَّذِيذَةْ
وَ جِنَيْنَةْ الْعِنَبْ الْوَلَّادَةْ
بِقَوْا مَا فِيهُمْ.
13 أَشَانْ أَرْض شَعَبِي
قَمَّ فَوْقهَا شَوْك وَ أَنْدِرَيْسَةْ.
أَيْوَى، نُوحَنْ لِكُلَّ بُيُوتْ السُّرُورْ
وَ مَدِينَةْ الْفَرَحْ.
14 أَشَانْ قَصِرْ الْمَلِكْ خَلَّوْه
وَ الْمَدِينَةْ السِّيَادْهَا كَتِيرِينْ، أَبَوْهَا.
حَارَةْ عُفَلْ وَ قَصِرْ الْمُرَاقَبَةْ
يَبْقَوْا مِثِلْ كَرَاكِيرْ إِلَى الْأَبَدْ.
وَ حَمِيرْ الْكَدَادَةْ يِنَطُّطُوا فَوْقهُمْ مِنْ الْفَرَحْ
وَ الْبَهَايِمْ يَسْرَحَوْا فَوْقهُمْ
15 لَحَدِّي يَوْم اللّٰهْ يِنَزِّلْ رُوحَهْ
فَوْقنَا مِنْ السَّمَاءْ.
خَلَاصْ الصَّحَرَاء تَبْقَى جِنَيْنَةْ
وَ الْجِنَيْنَةْ تَبْقَى مِثِلْ غَابَةْ.
16 وَ خَلَاصْ، الْحَقّ يَسْكُنْ فِي الصَّحَرَاء
وَ الْعَدَالَةْ تَقْعُدْ فِي الْجِنَيْنَةْ.
17 نَتِيجَةْ الْعَدَالَةْ تَبْقَى السَّلَامْ
وَ الْعَدَالَةْ تِجِيبْ الْهُدُوءْ
وَ الْأَمِنْ الدَّايِمْ.
18 وَ شَعَبِي يَقْعُدُوا فِي بَكَانْ هَنَا سَلَامْ
فِي بُيُوتْ أَمِينِينْ وَ هَادِيِينْ
وَ بَكَانْ هَنَا جُمَّةْ.
19 وَ لَاكِنْ الْغَابَةْ تِدَّمَّرْ تِحِتْ الْبَرَدْ
وَ الْمَدِينَةْ تِلْهَدَّمْ مَرَّةْ وَاحِدْ.
20 وَ لَاكِنْ الْفَرَحْ لَيْكُو إِنْتُو التِّتَيْرُبُوا
فِي أَيِّ بَكَانْ الْعِنْدَهْ أَلْمِي
وَ تَطُلْقُوا بَقَرْكُو وَ حَمِيرْكُو
بَلَا قُيُودْ.
© La Bible en arabe tchadien © Alliance biblique du Tchad, 2019
