أوّل كلام صُوفَر
1 وَ صُوفَرْ الْمِنْ نَعْمَةْ شَالْ الْكَلَامْ وَ قَالْ:
2 كَتَرَةْ الْكَلَامْ دِي
مَا تَلْقَى رَدّ وَلَّا؟
وَ النَّادُمْ الْيَعَرِفْ يِحَجِّي
يَلْقَى الْحَقّ وَلَّا؟
3 وَ كَلَامَكْ الْكَتِيرْ دَا
يِسَكِّتْ النَّاسْ وَلَّا؟
إِنْتَ تِشَّمَّتْ
وَ مَا فِي الْيِخَجِّلَكْ وَلَّا؟
4 إِنْتَ قُلْت: «عِلْمِي صَافِي
وَ أَنَا كُلَ صَافِي قِدَّامَكْ.»
5 أَيْوَى! كَنْ الرَّبّ كَلَّمْ
وَ كَنْ هُو حَجَّى لَيْك
6 وَ كَنْ خَبَّرَكْ بِسِرّ حِكْمَتَهْ،
الْعَقْلَكْ مَا يَقْبَلَهْ.
وَ خَلَاصْ بَيْدَا، إِنْتَ تَعَرِفْ
الرَّبّ خَلَّى وَاحِدِينْ مِنْ خَطَاكْ.
7 هَلْ تَقْدَرْ تَعَرِفْ أَسْرَارْ الرَّبّ؟
وَلَّا تَقْدَرْ تَعَرِفْ كَمَالْ الْقَادِرْ؟
8 هُمَّنْ دَوْل عَالِيِينْ مِنْ السَّمَاءْ،
إِنْتَ تَقْدَرْ تِسَوِّي شُنُو؟
هُمَّنْ غَرِيقِينْ مِنْ الْقَبُرْ،
إِنْتَ تَعَرِفْ شُنُو؟
9 طُولْهُمْ زِيَادَةْ مِنْ الْأَرْض
وَ عُرْضُهُمْ زِيَادَةْ مِنْ الْبَحَرْ.
10 وَ كَنْ الرَّبّ قَمَّ يِسِدّ نَادُمْ فِي السِّجِنْ
أَوْ يِنَادِيهْ فِي شَرِيعْتَهْ،
يَاتُو يَقْدَرْ يَمْنَعَهْ؟
11 أَشَانْ هُو يَعَرِفْ الْكَدَّابِينْ
وَ يِشِيفْ الْفَسَالَةْ،
وَ مَا يَجْعَلْهَا وَلَّا؟
12 أَشَانْ الْإِنْسَانْ الْفِهِمَهْ مِثِلْ الْمُغَفَّلْ،
هُو مِثِلْ وِلَيْد حُمَارْ الْكَدَادَةْ.
13 وَ لَاكِنْ إِنْتَ، يَا أَيُّوبْ،
وَاجِبْ تِثَبِّتْ قَلْبَكْ
وَ وَاجِبْ تِمِدّ إِيدَيْنَكْ عَلَيَّهْ.
14 وَ كَنْ فِي شَرّ فِي إِيدَيْنَكْ،
أَزْقُلَهْ بَعِيدْ
وَ خَلِّي الْفَسَالَةْ
مَا تَسْكُنْ فِي خِيَمَكْ.
15 وَ خَلَاصْ، إِنْتَ تَرْفَعْ رَاسَكْ بَلَا عَيْب
وَ تُكُونْ ثَابِتْ وَ مَا تَخَافْ.
16 أَشَانْ إِنْتَ تَنْسَى تَعَبَكْ
وَ تِشِيفَهْ مِثِلْ أَلْمِي الْجَرَى وَ فَاتْ.
17 وَ حَيَاتَكْ تِضَوِّي زِيَادَةْ
مِنْ نُورْ الْقَايْلَةْ
وَ الضَّلَامْ يَبْقَى لَيْك
مِثِلْ نُورْ الصَّبَاحْ.
18 وَ إِنْتَ تِأَكِّدْ كَدَرْ عِنْدَكْ عَشَمْ
وَ كَنْ عِنْدَكْ شَكّ كُلَ،
تُنُومْ بِأَمَانْ.
19 وَكِتْ تِنْجَمَّ،
مَا فِي نَادُمْ يِبَشْتِنَكْ
وَ كَتِيرِينْ يِفَتُّشُوا رِضَاكْ.
20 وَ لَاكِنْ عُيُونْ الْعَاصِيِينْ يَعَيَوْا
وَ مَا فِي أَيِّ مَلْجَأْ لَيْهُمْ
وَ مَا عِنْدُهُمْ عَشَمْ إِلَّا الْمَوْت بَسْ.
© La Bible en arabe tchadien © Alliance biblique du Tchad, 2019
