أيُّوب لعن يوم والودْته
1 وَ بَعَدْ دَا، أَيُّوبْ فَتَحْ خَشْمَهْ وَ لَعَنْ الْيَوْم الْوِلْدَوْه بَيَّهْ. 2 أَيُّوبْ حَجَّى وَ قَالْ:
3 خَلِّي يِدَّمَّرْ الْيَوْم
الْوِلْدَوْنِي بَيَّهْ
وَ اللَّيْلَةْ الْقَالَوْا فَوْقهَا:
«غِلْبَوْا بِوِلَيْد!»
4 الْيَوْم دَا، خَلِّي يَبْقَى ضَلَامْ
وَ الرَّبّ مِنْ فَوْق مَا يَجْعَلَهْ
وَ مَا يِنَوِّرَهْ بِنُورَهْ.
5 وَ خَلِّي الضَّلَامْ وَ السَّوَادْ
يَطُلْبُوا الْيَوْم دَا
وَ السَّحَابْ يَقْعُدْ مِنْ فَوْق لَيَّهْ
وَ يِنْبَهِتْ مِنْ شِدَّةْ الضَّلَامْ.
6 اللَّيْلَةْ دِي، خَلِّي تَبْقَى ضَلْمَةْ مَرَّةْ وَاحِدْ
وَ مَا تِلِمّ مَعَ أَيَّامْ السَّنَةْ
وَ مَا يَحْسُبُوهَا مِنْ الشُّهُورْ.
7 أَيْوَى، خَلِّي اللَّيْلَةْ دِي تَبْقَى عَاقْرَةْ
وَ مَا يُكُونْ فَوْقهَا فَرَحْ
جَيَّةْ الْمَوْلُودْ.
8 وَ النَّاسْ الْيَلْعَنَوْا النَّهَارْ
خَلِّي يَلْعَنَوْهَا!
أَيْوَى، هُمَّنْ دَوْل
الْيَعَرْفُوا يِقَوُّمُوا لُيَاتَانْ غُولْ الْبَحَرْ.
9 خَلِّي نُجُومْ مَغْرِبْهَا يِضَلُّمُوا
وَ مَا تُخُطّ عَشَمْهَا فِي النُّورْ
وَ مَا تِشِيفْ شَقَاقْ الصَّبَاحْ.
10 أَشَانْ اللَّيْلَةْ دِي مَا سَدَّتْ
بَطُنْ أَمِّي فَوْقِي!
وَ مَا لَبَّدَتْ التَّعَبْ
الْأَنَا قَاعِدْ نِشِيفَهْ.
11 مَالَا مَا مُتّْ
وَكِتْ أَنَا قَاعِدْ فِي بَطُنْ أَمِّي؟
وَ مَالَا رُوحِي مَا مَرَقَتْ
مِنْ أَنَا مَارِقْ مِنْ بَطُنْهَا؟
12 مَالَا رِكَبْ إِتْنَيْن رَحَّبَوْا بَيِّ؟
وَ مَالَا دُيُودْ إِتْنَيْن رَضَّعَوْنِي؟
13 وَ كَنْ أَوَّلْ بِقِي مِثِلْ دَا،
أَنَا نَرْقُدْ وَ نِرَّيَّحْ
وَ نُنُومْ وَ خَلَاصْ، نِنْجَمَّ.
14 وَ نُكُونْ مَعَ مُلُوكْ
وَ مُسْتَشَارِينْ الْأَرْض
الْبَنَوْا لِنُفُوسْهُمْ قُصُورْ
الْبَعَدَيْن يِلْهَدَّمَوْا.
15 أَوْ نُكُونْ مَعَ مَسَائِيلْ الْعِنْدُهُمْ دَهَبْ
وَ بُيُوتْهُمْ مَلَانِينْ فُضَّةْ.
16 أَوْ نَبْقَى مَا فِينِي،
مِثِلْ رُمَايَةْ الْمُلَبَّدَةْ
وَ مِثِلْ أَطْفَالْ
الْمَا شَافَوْا الْحَرَّايْ.
17 وَ هِنَاكْ، الْفَسْلِينْ مَا يِلْحَرَّكَوْا
وَ النَّاسْ الْقُدْرِتْهُمْ كَمَّلَتْ
يِنْجَمَّوْا فِي الْبَكَانْ دَا.
18 الْمَسَاجِينْ كُلَ يِعِيشُوا بِالسَّلَامْ
وَ مَا يَسْمَعَوْا حِسّ الْمُضَايِقْ.
19 كَبِيرْ وَ صَغِيرْ كُلُّهُمْ سَوَا
وَ الْعَبِدْ يَلْقَى الْحُرِّيَّةْ مِنْ سِيدَهْ.
شُنو فايْدة الحياة؟
20 مَالَا الرَّبّ يَنْطِي
النُّورْ لِلتَّعْبَانِينْ
وَ الْحَيَاةْ لِلْحَزْنَانِينْ؟
21 هُمَّنْ قَاعِدِينْ يَرْجَوْا الْمَوْت
وَ مَا جَاءْ لَيْهُمْ
وَ يِفَتُّشُوهْ زِيَادَةْ مِنْ الْكَنْز.
22 هُمَّنْ يَفْرَحَوْا وَ يِنْبَسْطُوا زِيَادَةْ
وَكِتْ يَجُوا فِي الْقَبُرْ.
23 وَ مَالَا يَنْطِي الْحَيَاةْ لِلنَّادُمْ
الْمَا يَعَرِفْ الدَّرِبْ الْيِشِيلَهْ؟
وَ مَالَا لَيَّهْ هُو
الرَّبّ سَدَّاهْ مِنْ كُلِّ جِيهَةْ؟
24 قَنِيتِي بِقِي أَكْلِي
وَ دُمُوعِي يِسِيلُوا مِثِلْ أَلْمِي.
25 أَشَانْ الرُّعُبْ الْبَرْجَلْنِي لِحِقْنِي
وَ النَّخَافْ مِنَّهْ جَانِي.
26 وَ لَيِّ أَنَا، مَا فِي هُدُوءْ
وَ لَا رَاحَةْ وَ لَا جُمَّةْ.
إِلَّا التَّعَبْ بَسْ جَاءْ لَيِّ.
© La Bible en arabe tchadien © Alliance biblique du Tchad, 2019
