الملك دَارِيُوس ردّ في جوابهم
1 وَ مِثِلْ دَا، الْمَلِكْ دَارِيُوسْ أَنْطَى أَمُرْ يِفَتُّشُوا مَكْتُوبْ قَرَارْ الْمَلِكْ كُورَشْ فِي مَكْتَبَةْ الْمَلِكْ الْفِي مَدِينَةْ بَابِلْ. 2 وَ مَا لِقَوْه هِنَاكْ وَ لَاكِنْ لِقَوْا كِتَابْ مَكْتُوبْ فِي وَرَقَةْ مَلْفُوفَةْ فِي الْقَصِرْ هَنَا مَدِينَةْ أَحْمَتَا الْفِي بَلَدْ مَادِي. وَ الْكَلَامْ الْفِي الْمَكْتُوبْ دَا بُقُولْ:
3 فِي السَّنَةْ الْأَوَّلْ هَنَا مُلْكَهْ، الْمَلِكْ كُورَشْ مَرَقْ قَرَارْ وَ قَالْ:بَيْت اللّٰهْ الْفِي مَدِينَةْ الْقُدُسْ وَاجِبْ يِنْبَنِي فِي أَسَاسَهْ الْأَوَّلْ أَشَانْ يِقَدُّمُوا فَوْقَهْ ضَحَايَا. وَ طُولَهْ الْفَوْق يَبْقَى 60 دُرَاعْ وَ عُرْضَهْ كُلَ 60 دُرَاعْ. 4 وَ الْبُنَى يَبْقَى مِثِلْ دَا. بَعَدْ تَلَاتَةْ رَوْق هَنَا حَجَرْ، يُخُطُّوا رَوْق وَاحِدْ هَنَا خَشَبْ. وَ كِلْفَةْ الْبُنَى كَمَانْ يَمُرْقُوهَا مِنْ صَنْدُوقْ الْمَلِكْ. 5 وَ بِزِيَادَةْ، الْمُعِدَّاتْ هَنَا الدَّهَبْ وَ الْفُضَّةْ الْأَوَّلْ شَالَاهُمْ الْمَلِكْ نَبُوخَدْنَصَرْ مِنْ بَيْت اللّٰهْ مِنْ مَدِينَةْ الْقُدُسْ وَ وَدَّاهُمْ فِي بَابِلْ، الْمُعِدَّاتْ دَوْل خَلِّي يِقَبُّلُوهُمْ فِي بَيْت اللّٰهْ فِي مَدِينَةْ الْقُدُسْ وَ يُخُطُّوهُمْ فِي بَكَانَاتْهُمْ فِي بَيْت اللّٰهْ.6 وَ مِثِلْ دَا، الْمَلِكْ دَارِيُوسْ كَتَبْ جَوَابْ لِتَتَّنَايْ الْوَالِي هَنَا الْمَنْطَقَةْ الْغَرِبْ لِبَحَرْ الْفُرَاتْ وَ لِشَتَرْ بُوزْنَايْ وَ لِرُفْقَانْهُمْ الْهُمَّنْ كُبَارَاتْ الْمَنْطَقَةْ دِي. وَ الْجَوَابْ قَالْ:
مَا تِدَّخَّلَوْا فِي الْكَلَامْ دَا! 7 خَلُّوا خِدْمَةْ بُنَى بَيْت اللّٰهْ تَمْشِي قِدَّامْ. وَ وَالِي الْيَهُودْ بِشُيُوخْهُمْ كُلَ، خَلُّوهُمْ يَبْنُوا بَيْت اللّٰهْ فِي بَكَانَهْ الْأَوَّلْ.8 وَ دَاهُو الْأَمُرْ النَّنْطِيهْ فِي الشَّيّءْ التِّسَوُّوهْ مَعَ شُيُوخْ الْيَهُودْ أَشَانْ يَبْنُوا بَيْت اللّٰهْ. مِنْ مَالْ الْمَلِكْ هَنَا الْمِيرِي الْيَجِي مِنْ الْمَنْطَقَةْ الْغَرِبْ لِبَحَرْ الْفُرَاتْ، أَنْطُوهُمْ كِلْفَةْ الْبُنَى عَجَلَةْ أَشَانْ خِدْمَةْ الْبُنَى مَا تَقِيفْ. 9 وَاجِبْ تَنْطُوا الشَّيّءْ الْيِدَوْرُوهْ كُلَّ يَوْم بَلَا تَأخِيرْ لِرُجَالْ الدِّينْ هَنَا الْيَهُودْ أَشَانْ يِقَدُّمُوا ضَحَايَا مُحَرَّقِينْ لِرَبّ السَّمَاوَاتْ. وَ الضَّحَايَا دَوْل هُمَّنْ تِيرَانْ وَ كُبْشَانْ وَ حُمْلَانْ وَ قَمَحْ وَ مِلِحْ وَ خَمَرْ وَ دِهِنْ. 10 وَ رُجَالْ الدِّينْ يِقَدُّمُوا الضَّحَايَا دَوْل لِرَبّ السَّمَاوَاتْ أَشَانْ هُو يَرْضَى بِرِيحَةْ الضَّحَايَا. وَ مِثِلْ دَا، هُمَّنْ يَسْأَلَوْا اللّٰهْ لِلْمَلِكْ وَ لِأَوْلَادَهْ أَشَانْ اللّٰهْ يِبَارِكْهُمْ.11 وَ دَاهُو الْأَمُرْ النَّنْطِيهْ فِي الشَّيّءْ التِّسَوُّوهْ فِي أَيِّ نَادُمْ الْيِخَالِفْ قَرَارِي. يِشِيلُوا مِنْ بَيْتَهْ عُودْ طَرِينْ وَ يَطْعَنَوْه بَيَّهْ وَ يِعَلُّقُوهْ. وَ يِدَمُّرُوا بَيْتَهْ وَ يَبْقَى مِثِلْ دُنْقُسْ. 12 وَ كَنْ أَيِّ شَعَبْ أَوْ أَيِّ مَلِكْ يِدَوْر يِغَيِّرْ قَرَارِي وَ يِدَوْر يِدَمِّرْ بَيْت اللّٰهْ فِي مَدِينَةْ الْقُدُسْ الْخَطَّ فَوْقَهْ أُسْمَهْ، خَلِّي اللّٰهْ يِدَمِّرَهْ. أَنَا دَارِيُوسْ مَرَقْت الْقَرَارْ دَا وَ خَلِّي يِطَبُّقُوهْ طَوَّالِي.13 وَ مِثِلْ دَا، تَتَّنَايْ وَالِي الْمَنْطَقَةْ الْغَرِبْ لِبَحَرْ الْفُرَاتْ وَ شَتَرْ بُوزْنَايْ وَ رُفْقَانْهُمْ طَبَّقَوْا طَوَّالِي كَلَامْ الْمَلِكْ دَارِيُوسْ الرَّسَّلَهْ لَيْهُمْ.
كمّلوا بُنى بيت اللّه
14 وَ الْأَنْبِيَاء زَكَرِيَّا الْمِنْ ذُرِّيَّةْ عِدُّو وَ حَقَّاي قَاعِدِينْ يِشَجُّعُوا شُيُوخْ الْيَهُودْ الْقَاعِدِينْ يَبْنُوا بَيْت اللّٰهْ. وَ خِدْمِتْهُمْ مَاشَةْ عَدِيلْ. وَ كَمَّلَوْا بُنَى الْبَيْت حَسَبْ قَرَارْ اللّٰهْ إِلٰـهْ بَنِي إِسْرَائِيلْ وَ حَسَبْ قَرَارْ مُلُوكْ بَلَدْ فَارِسْ الْهُمَّنْ كُورَشْ وَ دَارِيُوسْ وَ أَرْتَحَشْتَا. 15 وَ كَمَّلَوْا بُنَى بَيْت اللّٰهْ فِي الْيَوْم التَّالِتْ هَنَا الشَّهَرْ الْأُسْمَهْ أَدَارْ فِي السَّنَةْ السَّادْسَةْ هَنَا حُكُمْ الْمَلِكْ دَارِيُوسْ.
16 وَ رُجَالْ الدِّينْ وَ اللَّاوِيِّينْ وَ الْفَضَّلَوْا مِنْ بَنِي إِسْرَائِيلْ الْقَبَّلَوْا مِنْ الْغُرْبَةْ، كُلُّهُمْ فَتَحَوْا بَيْت اللّٰهْ بِفَرْحَةْ. 17 وَ وَكِتْ فَتَحَوْا الْبَيْت دَا، قَدَّمَوْا 100 تَوْر وَ 200 كَبِشْ وَ 400 حَمَلْ. وَ قَدَّمَوْا 12 تَيْس ضَحَايَا لِكَفَّارَةْ الذَّنِبْ لِكُلَّ بَنِي إِسْرَائِيلْ حَسَبْ عَدَدْ قَبَايِلْهُمْ. 18 وَ مِثِلْ مَكْتُوبْ فِي تَوْرَاةْ مُوسَى، بَنِي إِسْرَائِيلْ قَمَّوْا دَرَّجَوْا رُجَالْ الدِّينْ وَ اللَّاوِيِّينْ حَسَبْ مَجْمُوعَاتْهُمْ أَشَانْ يَخْدُمُوا لِلّٰهْ فِي مَدِينَةْ الْقُدُسْ.
عيّدوا عيد الْفِصْح
19 النَّاسْ الْقَبَّلَوْا مِنْ الْغُرْبَةْ عَيَّدَوْا عِيدْ الْفِصْحَ فِي يَوْم 14 هَنَا الشَّهَرْ الْأَوَّلْ. 20 رُجَالْ الدِّينْ وَ اللَّاوِيِّينْ كُلَ شَالَوْا نِيَّةْ وَ طَهَّرَوْا نُفُوسْهُمْ وَ كُلُّهُمْ بِقَوْا طَاهِرِينْ خَلَاصْ. وَ اللَّاوِيِّينْ دَبَحَوْا بَهَايِمْ لِعِيدْ الْفِصْحَ لِكُلَّ النَّاسْ الْقَبَّلَوْا مِنْ الْغُرْبَةْ وَ لِأَخْوَانْهُمْ رُجَالْ الدِّينْ وَ لِنُفُوسْهُمْ كُلَ. 21 وَ بَنِي إِسْرَائِيلْ الْقَبَّلَوْا مِنْ الْغُرْبَةْ أَكَلَوْا مَعَ كُلَّ النَّاسْ الْخَلَّوْا نَجَاسَةْ نَاسْ الْبَلَدْ دِي وَ تَابَعَوْا اللّٰهْ إِلٰـهْ بَنِي إِسْرَائِيلْ مَعَاهُمْ سَوَا. 22 وَ بَعَدْ دَا، عَيَّدَوْا عِيدْ الْخُبْزَةْ بَلَا تَوَّارَةْ بِفَرْحَةْ لِمُدَّةْ سَبْعَةْ يَوْم. وَ فِرْحَوْا أَشَانْ اللّٰهْ غَيَّرْ قَلِبْ مَلِكْ بَلَدْ أَشُورْ لِيِوَجِّهْ عَلَيْهُمْ وَ يِسَاعِدْهُمْ فِي بُنَى بَيْت اللّٰهْ إِلٰـهْ بَنِي إِسْرَائِيلْ.
© La Bible en arabe tchadien © Alliance biblique du Tchad, 2019
