الملك أمر يعبُدوا الصنم
1 وَ بَعَدْ دَا، الْمَلِكْ نَبُوخَدْنَصَرْ سَوَّى صَنَمْ هَنَا دَهَبْ طُولَهْ 60 دُرَاعْ وَ عُرْضَهْ 6 دُرَاعْ. وَ خَطَّاهْ فِي السَّهَلَةْ الْأُسُمْهَا دُورَا فِي وُلَايَةْ بَابِلْ. 2 وَ الْمَلِكْ عَزَمْ كُلَّ الْمُوَكَّلِينْ وَ الْمُحَافِظِينْ وَ رُؤَسَاءْ الْوُلَايَاتْ وَ الْمُسْتَشَارِينْ وَ الْمُوَكَّلِينْ بِحَفِضِينْ الْمَالْ وَ الْقُضْيَاءْ وَ نَاسْ الشَّرِيعَةْ وَ كُلَّ الْمَسَائِيلْ هَنَا الْمَنَاطِقْ أَشَانْ يَجُوا يَحْضَرَوْا فِي الْعَازُومَةْ هَنَا الْمَلِكْ التُّخُصّ الصَّنَمْ. 3 وَ خَلَاصْ، كُلَّ الْمُوَكَّلِينْ وَ الْمُحَافِظِينْ وَ رُؤَسَاءْ الْوُلَايَاتْ وَ الْمُسْتَشَارِينْ وَ الْمُوَكَّلِينْ بِحَفِضِينْ الْمَالْ وَ الْقُضْيَاءْ وَ نَاسْ الشَّرِيعَةْ وَ كُلَّ الْمَسَائِيلْ هَنَا الْمَنَاطِقْ جَوْا فِي الْعَازُومَةْ دِي وَ وَقَفَوْا قِدَّامْ الصَّنَمْ الْخَطَّاهْ الْمَلِكْ نَبُوخَدْنَصَرْ.
4 وَ الْمُنَظِّمْ هَنَا الْعَازُومَةْ نَادَى بِحِسّ عَالِي وَ قَالْ: «يَا النَّاسْ اللَّامِّينْ مِنْ الشُّعُوبْ وَ الْأُمَمْ وَ اللُّغَّاتْ، دَاهُو الْأَمُرْ بُقُولْ كَيْ: 5 ‹مِنْ سِمِعْتُوا حِسّ الْبُوقْ وَ الصُّفَّارَةْ وَ الْجِقِنْدِيَّةْ وَ أَمْ سِبَيْبَةْ وَ الْقِتَارْ وَ كُلَّ نَفَرْ هَنَا آلَاتْ الْمُسِيقَى، وَاجِبْ تِدَنْقُرُوا وَ تَسْجُدُوا قِدَّامْ الصَّنَمْ هَنَا الدَّهَبْ الْخَطَّاهْ الْمَلِكْ نَبُوخَدْنَصَرْ. 6 وَ أَيِّ نَادُمْ الْأَبَى مَا يِدَنْقِرْ وَ يَسْجُدْ لِلصَّنَمْ دَا، طَوَّالِي يِشِيلُوهْ وَ يَرْمُوهْ فِي نَارْ أَمْ لَهِيبْ الشَّدِيدَةْ.›»
7 وَ فِي شَانْ دَا، كُلَّ النَّاسْ مِنْ الشُّعُوبْ وَ الْأُمَمْ وَ اللُّغَّاتْ وَكِتْ سِمْعَوْا حِسّ الْبُوقْ وَ الصُّفَّارَةْ وَ الْجِقِنْدِيَّةْ وَ أَمْ سِبَيْبَةْ وَ الْقِتَارْ وَ كُلَّ نَفَرْ هَنَا آلَاتْ الْمُسِيقَى، خَلَاصْ دَنْقَرَوْا وَ سَجَدَوْا لِلصَّنَمْ هَنَا الدَّهَبْ الْخَطَّاهْ الْمَلِكْ نَبُوخَدْنَصَرْ.
رُفْقان دَنْيال أبوا ما يسْجُدوا
8 وَ فِي نَفْس الْوَكِتْ دَا بَسْ، نَاسْ وَاحِدِينْ مِنْ الْبَابِلِيِّيْن جَوْا وَ قَدَّمَوْا شَكْوَةْ ضِدّ الْيَهُودْ. 9 وَ هُمَّنْ قَالَوْا لِلْمَلِكْ نَبُوخَدْنَصَرْ: «اللّٰهْ يَنْصُرَكْ! 10 يَا الْمَلِكْ، إِنْتَ أَنْطَيْت أَمُرْ لِأَيِّ نَادُمْ السِّمِعْ حِسّ الْبُوقْ وَ الصُّفَّارَةْ وَ الْجِقِنْدِيَّةْ وَ أَمْ سِبَيْبَةْ وَ الْقِتَارْ وَ كُلَّ نَفَرْ هَنَا آلَاتْ الْمُسِيقَى، وَاجِبْ يِدَنْقِرْ وَ يَسْجُدْ لِلصَّنَمْ هَنَا الدَّهَبْ. 11 وَ كَنْ نَادُمْ أَبَى مَا يِدَنْقِرْ وَ يَسْجُدْ لِلصَّنَمْ، يِشِيلُوهْ وَ يَرْمُوهْ فِي نَارْ أَمْ لَهِيبْ الشَّدِيدَةْ. 12 يَا الْمَلِكْ، دَاهُو فِيَّهْ نَاسْ وَاحِدِينْ مِنْ الْيَهُودْ الْإِنْتَ أَنْطَيْتهُمْ الْإِدَارَةْ هَنَا وُلَايَةْ بَابِلْ وَ هُمَّنْ شَدْرَاكْ وَ مِشَاكْ وَ عَبْد الْنَغُو. وَ الرُّجَالْ دَوْل مَا كَرَّمَوْا أَمْرَكْ وَ مَا عَبَدَوْا إِلٰـهَاتَكْ وَ مَا سَجَدَوْا لِصَنَمَكْ هَنَا الدَّهَبْ الْإِنْتَ خَطَّيْتَهْ.»
13 وَ فِي الْبَكَانْ دَا، الْمَلِكْ نَبُوخَدْنَصَرْ زِعِلْ زَعَلْ شَدِيدْ وَ أَمَرْ يِجِيبُوا لَيَّهْ شَدْرَاكْ وَ مِشَاكْ وَ عَبْد الْنَغُو. وَ خَلَاصْ، جَابَوْهُمْ قِدَّامْ الْمَلِكْ. 14 وَ الْمَلِكْ سَأَلَاهُمْ وَ قَالْ: «صَحِيحْ كَيْ إِنْتُو شَدْرَاكْ وَ مِشَاكْ وَ عَبْد الْنَغُو مَا قَاعِدِينْ تَعَبُدُوا إِلٰـهَاتِي وَ مَا تَسْجُدُوا لِلصَّنَمْ هَنَا الدَّهَبْ الْأَنَا خَطَّيْتَهْ وَلَّا؟ 15 وَ هَسَّعْ دَا كَنْ إِنْتُو جَاهِزِينْ، مِنْ سِمِعْتُوا حِسّ الْبُوقْ وَ الصُّفَّارَةْ وَ الْجِقِنْدِيَّةْ وَ أَمْ سِبَيْبَةْ وَ الْقِتَارْ وَ كُلَّ نَفَرْ هَنَا آلَاتْ الْمُسِيقَى، طَوَّالِي دَنْقُرُوا وَ أَسْجُدُوا لِلصَّنَمْ هَنَا الدَّهَبْ الْأَنَا الْمَلِكْ نَبُوخَدْنَصَرْ خَطَّيْتَهْ. وَ كَنْ أَبَيْتُوا مَا تَعَبُدُوهْ كَمَانْ، طَوَّالِي يِشِيلُوكُو وَ يَرْمُوكُو فِي النَّارْ أَمْ لَهِيبْ الشَّدِيدَةْ دِي. وَ نِشِيفْ الْإِلٰـهْ الْيَقْدَرْ يَمْرُقْكُو مِنْ إِيدِي أَنَا!»
16 وَ شَدْرَاكْ وَ مِشَاكْ وَ عَبْد الْنَغُو رَدَّوْا وَ قَالَوْا لِلْمَلِكْ: «أَنِحْنَ مَا نَقْدَرَوْا نِحَجُّوا لَيْك شَيّءْ فِي الْكَلَامْ دَا. 17 وَ لَاكِنْ، يَا الْمَلِكْ، إِلٰـهْنَا الْأَنِحْنَ قَاعِدِينْ نَعَبُدُوهْ يَقْدَرْ يِنَجِّينَا مِنْ النَّارْ أَمْ لَهِيبْ الشَّدِيدَةْ وَ مِنْ إِيدَكْ إِنْتَ كُلَ. 18 وَ كَنْ مَا نَجَّانَا كُلَ، أَعَرِفْ يَا الْمَلِكْ، أَنِحْنَ مَا نَعَبُدُوا إِلٰـهَاتَكْ وَ لَا نَسْجُدُوا لِصَنَمَكْ هَنَا الدَّهَبْ الْإِنْتَ خَطَّيْتَهْ.»
19 وَ وَكِتْ الْمَلِكْ نَبُوخَدْنَصَرْ سِمِعْ الْكَلَامْ دَا، زِعِلْ زَعَلْ شَدِيدْ وَ وِجْهَهْ أَلْغَيَّرْ. وَ قَمَّ ضِدّ شَدْرَاكْ وَ مِشَاكْ وَ عَبْد الْنَغُو وَ أَمَرْ يِحَمُّوا النَّارْ دِي سَبْعَةْ مَرَّاتْ زِيَادَةْ مِنْ أَوَّلْ. 20 وَ بَتَّانْ أَمَرْ وَاحِدِينْ مِنْ عَسْكَرَهْ الشُّدَادْ يِرَبُّطُوا شَدْرَاكْ وَ مِشَاكْ وَ عَبْد الْنَغُو وَ يَرْمُوهُمْ فِي النَّارْ أَمْ لَهِيبْ الشَّدِيدَةْ. 21 وَ طَوَّالِي، رَبَّطَوْهُمْ لِلرُّجَالْ دَوْل وَ رَمَوْهُمْ فِي النَّارْ أَمْ لَهِيبْ الشَّدِيدَةْ بِجَلَالِيبْهُمْ وَ سَرَاوِيلْهُمْ وَ طَوَاقِيهُمْ وَ كُلَّ لُبَاسْهُمْ. 22 وَ مِنْ شِدَّةْ أَمُرْ الْمَلِكْ، النَّارْ حَمَّوْهَا زِيَادَةْ لَحَدِّي أَكَلَتْ الْعَسْكَرْ الرَّمَوْهُمْ لِشَدْرَاكْ وَ مِشَاكْ وَ عَبْد الْنَغُو. 23 وَ كَنْ لِلنَّاسْ التَّلَاتَةْ الْهُمَّنْ شَدْرَاكْ وَ مِشَاكْ وَ عَبْد الْنَغُو، رَمَوْهُمْ مُرَبَّطِينْ فِي أُسْط النَّارْ أَمْ لَهِيبْ الشَّدِيدَةْ.
اللّه نجّى الرُفْقان من النار
24 وَ طَوَّالِي، الْمَلِكْ نَبُوخَدْنَصَرْ أَنْبَهَتْ وَ سَأَلْ مَسَائِيلَهْ وَ قَالْ: «مَا رَمَيْنَا تَلَاتَةْ نَاسْ مُرَبَّطِينْ فِي أُسْط النَّارْ وَلَّا؟» وَ هُمَّنْ رَدَّوْا لَيَّهْ وَ قَالَوْا: «أَيْوَى، يَا الْمَلِكْ.» 25 وَ الْمَلِكْ رَدَّ لَيْهُمْ وَ قَالْ: «دَاهُو أَنَا قَاعِدْ نِشِيفْ أَرْبَعَةْ نَاسْ مُفَرْتَقِينْ وَ رَايْغِينْ فِي أُسْط النَّارْ وَ شَيّءْ وَاحِدْ كُلَ مَا سَوَّاهُمْ. وَ الرَّابِعْ دَا بِشَابِهْ إِبْن الْإِلٰـهَاتْ!»
26 وَ الْمَلِكْ قَرَّبْ لِخَشُمْ النَّارْ أَمْ لَهِيبْ الشَّدِيدَةْ وَ نَادَى وَ قَالْ: «يَا شَدْرَاكْ وَ مِشَاكْ وَ عَبْد الْنَغُو، يَا عَبِيدْ اللّٰهْ الْعَالِي! أَمُرْقُوا مِنْ النَّارْ وَ تَعَالُوا!» وَ خَلَاصْ، شَدْرَاكْ وَ مِشَاكْ وَ عَبْد الْنَغُو مَرَقَوْا مِنْ أُسْط النَّارْ وَ جَوْا. 27 وَ كُلَّ الْمُوَكَّلِينْ وَ الْمُحَافِظِينْ وَ رُؤَسَاءْ الْوُلَايَاتْ وَ الْمَسَائِيلْ هَنَا الْمَلِكْ جَوْا حَوَّقَوْهُمْ وَ شَافَوْا كَدَرْ النَّارْ مَا أَكَلَتْ جِسِمْهُمْ وَ صُوفَايْ وَاحِدَةْ مِنْ رُوسَيْهُمْ كُلَ مَا حِرْقَتْ. وَ خُلْقَانْهُمْ كُلَ مَا غَيَّرَوْا وَ رِيحَةْ النَّارْ كُلَ فَوْقهُمْ مَا تِنْشَمَّ.
28 وَ نَبُوخَدْنَصَرْ قَالْ: «بَارَكْ اللّٰهْ إِلٰـهْ شَدْرَاكْ وَ مِشَاكْ وَ عَبْد الْنَغُو الرَّسَّلْ مَلَكَهْ أَشَانْ يِنَجِّي عَبِيدَهْ الْهُمَّنْ أَتْوَكَّلَوْا عَلَيَّهْ. وَ خَالَفَوْا أَمْرِي أَنَا الْمَلِكْ وَ قَصَّدَوْا بِالْمَوْت كُلَ أَخَيْر لَيْهُمْ مِنْ يَعَبُدُوا وَ يَسْجُدُوا لِإِلٰـهْ آخَرْ الْمَا إِلٰـهُّمْ. 29 أَسْمَعَوْا، يَا النَّاسْ! مِنْ بَعَدْ الْيَوْم، أَيِّ نَادُمْ مِنْ أَيِّ شَعَبْ أَوْ أُمَّةْ أَوْ لُغَّةْ كَنْ قَالْ كَلَامْ ضِدّ إِلٰـهْ شَدْرَاكْ وَ مِشَاكْ وَ عَبْد الْنَغُو، نِقَطِّعَهْ لَحَمَايْ لَحَمَايْ وَ نِدَمِّرْ بَيْتَهْ وَ يَبْقَى مِثِلْ دُنْقُسْ أَشَانْ مَا فِي إِلٰـهْ آخَرْ الْيَقْدَرْ يِنَجِّي بِطَرِيقَةْ مِثِلْ دِي.»
30 وَ بَعَدْ دَا، الْمَلِكْ أَنْطَى قِيمَةْ لِشَدْرَاكْ وَ مِشَاكْ وَ عَبْد الْنَغُو فِي وُلَايَةْ بَابِلْ.
© La Bible en arabe tchadien © Alliance biblique du Tchad, 2019
